ទូច ស្រីល័ក្ខ ដាច់ចិត្តបង្ហោះសំពះសុំសប្បុរសជនឱ្យជួយជីវិតតារាចម្រៀង យូ ឌីស្កូ

តារាចម្រៀងនិងសម្តែងជើងចាស់ យូ ឌីស្កូ អតីតសមាជិកក្រុមរៃមាសតោមាស បានធ្វើឱ្យមហាជនភ្ញាក់ផ្អើលសាជាថ្មីក្រោយឃើញរូបភាពលោកស្គមស្គាំងត្រូវបញ្ជូលទៅសង្គ្រោះនៅឥណ្ឌាព្រោះតែជាតិពុលឡើងខ្លាំង។ កំពុងស្ថិតនៅក្នុងដំណាក់កាលលាងឈាមថវិកាមិនគ្រប់គ្រាន់ អ្នកនាង ទូច ស្រីល័ក្ខ ដាច់ចិត្តសំពះសុំឱ្យសប្បុរជនជួយជីវិតលោក យូ ឌីស្កូ ខណៈក្តីសង្ឃឹមមានតែ៥០%ប៉ុណ្ណោះ។

បន្ទាប់វះកាត់ក្រលៀនបានដោយជោគជ័យកាលពី៨ឆ្នាំមុននិងបានវិលមកបម្រើអាជីពសិល្បៈវិញ នៅដើមឆ្នាំ២០២៦នេះស្រាប់តែទទួលដំណឹងថាលោក យូ ឌីស្កូ បានជួបប្រទះបញ្ហាសុខភាពម្តងទៀតដោយសារតែជាតិពុលកើនឡើងខ្ពស់។ តាមរយៈសំណេររបស់តារាចម្រៀង ទូច ស្រីល័ក្ខ បង្ហោះនៅថ្ងៃទី២៩ ខែមករា នេះបានឱ្យដឹងថា « អារម្មណ៍របស់ខ្ញុំក្តុកក្តួលណាស់មួយយប់គេងមិនលក់ដោយសារបានដឹងថាបងយូឌីស្កូត្រូវបញ្ជូលទៅប្រទេសឥណ្ឌាបន្ទាន់ដោយសារជាតិពុលឡើងខ្លាំងកំរិតធ្ងន់សំលេងបងបានប្រាប់ថាល័ក្ខអូនបងគ្មានអ្វីទៀតទេសល់តែ៥០ភាគរយនៃក្តីសង្ឃឹមនៅពេលនេះ»។

តារាចម្រៀងរូបនេះបន្តថា «ខ្ញុំមិនអាចឈរមើលបងដោយដង្ហើមហត់មួយនេះបានទេ។ ខ្ញុំនឹងលើកដៃសុំពីមិត្តភ័ក្រ្តនិងរាប់អានខ្ញុំដូចគ្នាឱ្យជួយសង្គ្រោះបងម្នាក់តិចៗ។ នេះជាការដើររកជំនួយើកទី២របស់ខ្ញុំសំរាប់បងពេលវេលាលឿនពេកហើយកំពុងលាងឈាមប្រាក់មិនគ្រប់គ្រាន់។ សំលេងយំរបស់បងកំពុងដក់ក្នុងខួរក្បាលរបស់ខ្ញុំហើយពាក្យថាជួយបងផងអូន គាត់គ្មានឱពុកម្តាយទេកំព្រា»។

បន្ទាប់ពីបង្ហោះសំណេរ អ្នកនាង ទូច ស្រីល័ក្ខ បានចេញវីដេអូមួយទៀតនិយាយទាំងអារម្មណ៍ក្តុកក្តួលលាយឡំដោយទឹកភ្នែកទាក់ទងនឹងស្ថានភាពរបស់លោក យូ ឌីស្កូ ដែលអ្នកទាំងពីរគឺជាដៃគូចាស់ជាមួយគ្នា៕