ក្រុមប្រឹក្សាសន្តិភាព ប្រកាសស្វាគមន៍កម្ពុជាក្នុងនាមជាសមាជិកស្ថាបនិកផ្លូវការទី៨

នៅថ្ងៃទី២៨ ខែមករា «ក្រុមប្រឹក្សាសន្តិភាព» បានប្រកាសស្វាគមន៍ប្រទេសកម្ពុជា ក្នុងនាមជាសមាជិកស្ថាបនិកនៃស្ថាប័នអន្តរជាតិមួយនេះ។ នេះបើតាមការឲ្យដឹងតាមរយៈទំព័រហ្វេសប៊ុកផ្លូវការរបស់ស្ថានទូតអាមេរិកប្រចាំនៅកម្ពុជា។

យោងតាមរូបភាពដែលបានបង្ហោះនៅលើបណ្ដាញសង្គម X របស់ក្រុមប្រឹក្សាសន្តិភាព ក្នុងចំណោមប្រទេសចំនួន ២៦ នៅទូទាំងពិភពលោកដែលបានយល់ព្រមក្នុងការចូលរួម កម្ពុជាគឺជាប្រទេសទី ៨ ដែលត្រូវបានប្រកាសស្វាគមន៍ក្នុងនាមជាសមាជិកស្ថាបនិកនៃស្ថាប័នអន្តរជាតិថ្មីនេះ។

វត្តមានរបស់កម្ពុជានៅក្នុងក្រុមប្រឹក្សាសន្តិភាពនៅពេលនេះ គឺជាការបង្ហាញឆន្ទៈក្នុងការគាំទ្រ និងរួមចំណែកដល់ការលើកកម្ពស់ការរក្សាសន្តិភាពសកល។ សុច្ឆន្ទៈ ស្រឡាញ់សន្តិភាព ការគាំទ្រ និងរួមចំណែក ដល់ការកសាងនិងរក្សាសន្តិភាពគឺជាគោលការណ៍ដែលកម្ពុជាតែងតែប្រកាន់ខ្ជាប់ជារៀងរហូតមក ជាពិសេសតាមរយៈការបញ្ជូនកង កម្លាំងរក្សាសន្តិភាព ក្រោមឆត្រអង្គការសហប្រជាជាតិទៅបំពេញបេសកកម្មនៅតាមបណ្តាប្រទេសមួយចំនួនដែលរងគ្រោះដោយសារសង្រ្គាម។

ជាមួយគ្នានេះដែរ បើតាមការបញ្ជាក់របស់សម្ដេចធិបតី ហ៊ុន ម៉ាណែត ការចូលរួមជាសមាជិកស្ថាបនិកនៃក្រុមប្រឹក្សាសន្តិភាពសម្រាប់អាណត្តិ៣ឆ្នាំ មិនតម្រូវឱ្យបង់ថវិកាទេ។ ចំពោះការបង់ថវិកា ១ពាន់លានដុល្លារសហរដ្ឋអាមេរិកនោះ គឺសម្រាប់ករណីចូលជាសមាជិករយៈពេលវែង(អចិន្ត្រៃយ៍) តែប៉ុណ្ណោះ។

សូមជម្រាបថា គិតមកត្រឹមថ្ងៃទី២៩ ខែមករា ឆ្នាំ២០២៦ មានប្រទេសក្នុងតំបន់អាស៊ានតែ ៣ ប៉ុណ្ណោះដែលយល់ព្រមចូលរួមក្នុងក្រុមប្រឹក្សាសន្តិភាពតាមការអញ្ជើញរបស់លោកប្រធានាធិបតីអាមេរិក ដូណាល់ត្រាំ។ ប្រទេសទាំង ៣នេះរួមមាន៖ ឥណ្ឌូណេស៊ី, កម្ពុជា និងវៀតណាម ៕