កំពុងដោះស្រាយតាមច្បាប់ Cha Eun Woo ត្រូវបានគេដាក់រហស្សនាមថាជា «មនុស្សឆ្លាតខាងគេចពន្ធ»

តារាចម្រៀងនិងសម្តែង Cha Eun Woo កំពុងប្រឈមមុខនឹងរលកនៃប្រតិកម្មអវិជ្ជមាននៅក្នុងឧស្សាហកម្មផ្សាយពាណិជ្ជកម្មដោយមានប្រ៊េនជាបន្តបន្ទាប់បានលាក់បាំងខ្លឹមសារទាំងអស់ដែលទាក់ទងនឹងលោកនៅលើវេទិកាផ្លូវការរបស់ខ្លួនដោយមិននឹកស្មានដល់ ចំពេលមានការចោទប្រកាន់ថាសិល្បកររូបនេះបានគេចពន្ធចំនួនជាង ២០ ពាន់លានវ៉ុន ប្រមាណ១៣.៦លានដុល្លារអាម៉េរិក។

ស្របពេលមានការចោទប្រកាន់នេះ Cha Eun Woo ត្រូវបានគេចំអកថាជា «មនុស្សឆ្លាតខាងគេចពន្ធ«ជាមួយនឹងចំនួនទឹកប្រាក់នៃការគេចពន្ធដែលជាប់ចំណាត់ថ្នាក់ក្នុងចំណោមសិល្បករកំពូលទាំង ៦ លើពិភពលោក ជាចំនួនខ្ពស់បំផុតដែលមិនធ្លាប់មានលើតារាល្បីម្នាក់នៅក្នុងប្រទេសកូរ៉េខាងត្បូង។ យោងតាម Sports Kyunghyang បានឱ្យដឹងថា Cha Eun Woo ដែលជា «មនុស្សពូកែគេចពន្ធ» មានយុទ្ធសាស្ត្រគេចពន្ធដ៏ស្មុគស្មាញ ល្អិតល្អន់ និងជាប្រព័ន្ធបំផុត ។

ការលើកឡើងបែបនេះ ដោយសារតែក្រុមហ៊ុនដែល Cha Eun Woo កាន់តំណែងជានាយកផ្ទៃក្នុង និងដែលត្រូវបានបង្កើតឡើងដោយម្តាយរបស់លោកបានផ្លាស់ប្តូររចនាសម្ព័ន្ធអង្គការ ឋានៈផ្លូវច្បាប់ និងឈ្មោះក្រុមហ៊ុនរបស់ខ្លួនទាំងស្រុងនៅក្នុងខែកញ្ញា ឆ្នាំ ២០២៤ ដោយបានផ្លាស់ប្តូរទៅជា The Annie LLC Limited Liability Company។

ពីមុនក្រុមហ៊ុនគ្រប់គ្រងរបស់ Cha Eun Woo (ក្នុងទម្រង់ជាក្រុមហ៊ុនភាគហ៊ុនរួមគ្នា) មានទីតាំងនៅ Gimpo ប៉ុន្តែនៅពេលដែលវាបានផ្លាស់ប្តូរទៅជាក្រុមហ៊ុនទទួលខុសត្រូវមានកម្រិត អាសយដ្ឋានស្របច្បាប់ក៏ត្រូវបានផ្លាស់ប្តូរទៅ Ganghwa ផងដែរ ជាកន្លែងដែលភោជនីយដ្ឋាន ត្រូវបានគេជឿថាត្រូវបានគ្រប់គ្រងដោយផ្ទាល់ដោយឪពុកម្តាយរបស់ Cha Eun Woo។ មូលហេតុដែល Cha Eun Woo និងម្តាយរបស់ខ្លួនបានប្តូរពីក្រុមហ៊ុនភាគហ៊ុនរួមគ្នាទៅជាក្រុមហ៊ុនទទួលខុសត្រូវមានកម្រិតត្រូវបានគេជឿថាគឺដើម្បីជៀសវាងការធ្វើសវនកម្មពីខាងក្រៅ។

យោងតាមបទប្បញ្ញត្តិ ក្រុមហ៊ុនភាគហ៊ុនរួមគ្នា នៅពេលដែលពួកគេឈានដល់ទំហំជាក់លាក់មួយ ត្រូវបានតម្រូវឱ្យឆ្លងកាត់ការធ្វើសវនកម្មគណនេយ្យឯករាជ្យ ខណៈពេលដែលក្រុមហ៊ុនទទួលខុសត្រូវមានកម្រិតស្ថិតនៅក្នុង “ចំណុចងងឹត” ទាក់ទងនឹងការធ្វើសវនកម្មខាងក្រៅ។ ក្រុមហ៊ុនទទួលខុសត្រូវមានកម្រិតមិនមានកាតព្វកិច្ចបង្ហាញរបាយការណ៍ហិរញ្ញវត្ថុទេ ដែលធ្វើឱ្យការអនុវត្តដូចជាការគេចពន្ធពិបាករកឃើញពីខាងក្រៅ។ ការផ្លាស់ប្តូរអាសយដ្ឋានត្រូវបានវិភាគថាជា «ល្បិចកល» ដើម្បីជៀសវាងពន្ធ។ ស្រុក Ganghwa ត្រូវបានចាត់ថ្នាក់ជាតំបន់គ្រប់គ្រងកំណើនក្រោមច្បាប់ផែនការតំបន់ទីប្រជុំជន ដូច្នេះនៅពេលដែលនីតិបុគ្គលទិញអចលនទ្រព្យ ពួកគេអាចជៀសវាងពន្ធត្រា និងពន្ធចុះបញ្ជីដែលយកពន្ធយ៉ាងខ្លាំង (បីដងនៃអត្រាពន្ធមូលដ្ឋាន)។

តាមពិតទៅ ក្រុមហ៊ុនក៏ត្រូវបានគេរកឃើញថាបានបន្ថែម «ការជួលអចលនទ្រព្យ» ទៅក្នុងសកម្មភាពអាជីវកម្មរបស់ខ្លួន ដែលបង្ហាញពីការប៉ុនប៉ងដ៏មានសក្តានុពលមួយដើម្បីទទួលបានការលើកទឹកចិត្តពន្ធ។ ភោជនីយដ្ឋានដែលដំណើរការដោយឪពុកម្តាយរបស់ Cha Eun Woo និងក្រុមហ៊ុនគ្រប់គ្រងបុគ្គលម្នាក់របស់លោក (ក្នុងទម្រង់ជាក្រុមហ៊ុនទទួលខុសត្រូវមានកម្រិត) តាមពិតមានអាសយដ្ឋានដូចគ្នា ដែលបង្កើនការសង្ស័យថានេះមិនមែនជាកន្លែងធ្វើការពិតប្រាកដទេ ប៉ុន្តែគ្រាន់តែជាអាសយដ្ឋានខ្ចីប៉ុណ្ណោះដែលជាលក្ខណៈនៃ «ក្រុមហ៊ុនខ្មោច»។

ដោយផ្អែកលើកត្តាទាំងនេះ សេវាពន្ធជាតិបានសន្និដ្ឋានថា Cha Eun Woo បានបង្វែរប្រាក់ចំណូលផ្ទាល់ខ្លួនទៅឱ្យនីតិបុគ្គលគ្រួសារមួយ ដើម្បីជៀសវាងពន្ធលើប្រាក់ចំណូលផ្ទាល់ខ្លួនអតិបរមា ៤៥% ផ្ទុយទៅវិញបានអនុវត្តអត្រាពន្ធសាជីវកម្មទាបជាងប្រហែល ២០% ហើយបានប្រកាសថាខ្លួននឹងប្រមូលពន្ធត្រឡប់មកវិញប្រហែល២០ ពាន់លានវ៉ុន ពី Cha Eun Woo។ តួលេខនេះត្រូវបានចាត់ទុកថាជាតួលេខច្រើនបំផុតនៅក្នុងឧស្សាហកម្មកម្សាន្តកូរ៉េខាងត្បូង ហើយក៏ស្ថិតក្នុងចំណោមតួលេខខ្ពស់បំផុតនៅលើពិភពលោកសម្រាប់ការគេចវេសពន្ធរបស់តារាល្បីៗផងដែរ។

Cha Eun Woo បានចូលបម្រើកងទ័ពកាលពីខែកក្កដា ឆ្នាំ២០២៥ ដោយបម្រើការក្នុងក្រុមតន្រ្តីកងទ័ព។ លោកត្រូវបានជ្រើសរើសឱ្យដើរតួឯកក្នុងរឿង «The Wonderfuls»របស់ Netflix ដែលត្រូវបានគ្រោងនឹងចាក់ផ្សាយនៅឆ្នាំ ២០២៦។ ទោះជាយ៉ាងណាក៏ដោយ ដោយសារតែរឿងអាស្រូវបច្ចុប្បន្ន គម្រោងនេះប្រហែលជាមិនអាចចាក់ផ្សាយតាមផែនការបានទេ។

ដើម្បីឆ្លើយតបទៅនឹងរលកនៃការរិះគន់ Fantagio បាននិយាយថា «បញ្ហាស្នូលគឺថាតើក្រុមហ៊ុនដែលបង្កើតឡើងដោយម្តាយរបស់ Cha Eun Woo មានលក្ខណៈសម្បត្តិគ្រប់គ្រាន់ជាអង្គភាពជាប់ពន្ធស្របច្បាប់ឬអត់។ បញ្ហានេះមិនទាន់ត្រូវបានបញ្ជាក់ច្បាស់លាស់ ឬវាយតម្លៃជាផ្លូវការនៅឡើយទេ។ ក្រុមហ៊ុននឹងបង្ហាញជំហរតាមរយៈនីតិវិធីផ្លូវច្បាប់ពាក់ព័ន្ធទាក់ទងនឹងការបកស្រាយនិងការអនុវត្តច្បាប់។