ម៉ានិត ឆ្អែតចិត្តខ្លាំងចំពោះអតីតបុគ្គលិកមើលថែផ្ទាល់ដៃដាក់ឈ្មោះក្បែរគ្នាលើសៀវភៅលួចចា.ក់ពីក្រោយខ្នង

តារាចម្រៀង ម៉ុង ម៉ានិត បានបង្ហោះលិខិតជូនដំណឹងជាផ្លូវការពីមេធាវីរបស់ខ្លួនទាក់ទងនឹងគណនីក្លែងក្លាយចំនួនពីរដែលមានការបង្ហោះនៅលើបណ្តាញសង្គមនាំឱ្យប៉ះពាល់ដល់កិត្តិយសរបស់ខ្លួន។ មេធាវីតារាចម្រៀងរូបនេះបានទុកពេល២៤ម៉ោងឱ្យគណនីចំនួនពីរនោះលុបការបង្ហោះ ខណៈពេល ម៉ានិត បានបង្ហាញការឆ្អែតចិត្តយ៉ាងខ្លាំងពីព្រោះមនុស្សបង្ហាត់បង្រៀនផ្ទាល់ដៃលួចចាក់ពីក្រោយខ្នង។

នៅយប់ថ្ងៃទី២០ ខែមករា តារាចម្រៀង ម៉ុង ម៉ានិត បានចេញលិខិតមេធាវីដោយបញ្ជាក់ថាគណនីហ្វេសប៊ុកចំនួនពីរដែល Fake Profile មានដូចជា Bratty But Pretty និង who tf is this
បានបង្ហោះជាសាធារណៈនូវខ្លឹមសារប្រមាថ និងចែកចាយសារសំឡេងនិយាយបំភ្លៃធ្វើឱ្យប៉ះពាល់យ៉ាងខ្លាំងដល់កេរ្តិ៍ឈ្មោះ កិត្តិយស សេចក្តីថ្លៃថ្នូរ ប្រជាប្រិយភាព និងការងារ។

ក្នុងលិខិតបញ្ជាក់ថា ក្នុងរយៈពេល២៤ម៉ោងបើគណនីទាំងពីរនេះមិនចេញមកសូមទោសជាសាធារណៈទេ ម៉ានិត នឹងបន្តផ្ដល់ដំណឹង និងពាក្យបណ្ដឹងជូនសមត្ថកិច្ច និងនាយកដ្ឋានប្រឆាំងបទល្មើសបច្ចេកវិទ្យា ដើម្បីស្វែងរកជនទាំងនេះឱ្យឃើញឈ្មោះពិតរូបពិតឱ្យចូលខ្លួនយកមកដោះស្រាយតាមផ្លូវច្បាប់ រួមទាំងអតីតបុគ្គលិកដែលបានចូលដៃពាក់ព័ន្ធ ដើម្បីបញ្ជាក់ពីភាពស្អាតស្អំរបស់លោកនិងក្រុមគ្រួសារ។

ក្រោយពីមានការជូនដំណឹងពីមេធាវីរបស់ ម៉ុង ម៉ានិត គេសង្កេតឃើញថាគណនីទាំងពីរនោះបានលុបការបង្ហោះរបស់ពួកគេផងដែរ។ គណនី Bratty But Pretty បានលើកឡើងថារូបគេមិនបានបញ្ជាក់ឈ្មោះចំៗនោះទេ ហើយការលុបនេះដោយសារតែម្ចាស់សំណេរដែលឆ្លើយឆ្លងជាមួយគេមានការលំបាកទើបគេសម្រេចចិត្តលុបការបង្ហោះនោះ។ចំណែកឯគណនីមួយទៀតក៏បានលុបសំឡេងឆាតឆ្លើយឆ្លងគ្នាដោយបញ្ជាក់ថាការផុសនោះដោយសារតែហួសចិត្តដែលឃើញមិត្តភក្តិរបស់ខ្លួនត្រូវគេចោទទាំងមិនបានធ្វើ។

នៅក្នុងផ្នែកមតិយោបល់នៃការបង្ហោះលិខិតមេធាវី ម៉ុង ម៉ានិត បានបង្ហាញថាខ្លួនលោកឆ្អែតចិត្តយ៉ាងខ្លាំងដែលបុគ្គលិកទុកដូចប្អូនដូចគ្រួសារបង្ហាត់បង្រៀនមើលផ្ទាល់ដៃដាក់ឈ្មោះក្បែរគ្នាលើសៀវភៅ ទីបំផុត…ធ្វើបែបនេះដាក់លោក។ ក្រោយពីចេញបញ្ជាក់ភាពស្អាតស្អំដែលមានការចោទប្រកាន់ពីអតីតបុគ្គលិក អ្នកគាំទ្ររបស់លោកក៏បានផ្ញើសារលើកទឹកចិត្តផងដែរ៕