Cheng Yi កំពុងប្រឈមមុខនឹងការសម្រេចចិត្តដ៏សំខាន់មួយ

ថ្មីៗនេះប្រព័ន្ធផ្សព្វផ្សាយចិនបានរាយការណ៍ថាតារាសម្ដែង Cheng Yi បានបង្កើតស្ទូឌីយោឯករាជ្យមួយដោយមានមូលនិធិផ្ទាល់ខ្លួន ១០០%។ យោងតាមការប្រកាសជ្រើសរើសបុគ្គលិកនៅលើ Tianyancha តារាសម្តែង Cheng Yi ដែលមានឈ្មោះពិតថា Fu Shiqi បច្ចុប្បន្នមានទំនាក់ទំនងជាមួយអាជីវកម្មចំនួនបី រួមទាំងស្ទូឌីយោវប្បធម៌ភាពយន្ត និងទូរទស្សន៍ Yongkang Qiyuan ដែលជាស្ទូឌីយោផ្ទាល់ខ្លួនរបស់លោកទាំងស្រុង។

ស្ទូឌីយោនេះត្រូវបានបង្កើតឡើងក្នុងខែមករា ឆ្នាំ២០១៨ ដោយមានដើមទុនចុះបញ្ជីចំនួន ៥០០,០០០ យន់។ វិសាលភាពអាជីវកម្មរបស់វារួមមានសេវាកម្មគាំទ្រទាក់ទងនឹងការផ្សាយ ភាពយន្ត និងទូរទស្សន៍ ក៏ដូចជាការអភិវឌ្ឍគម្រោងវប្បធម៌ និងភាពយន្តផងដែរ។

នៅថ្ងៃទី ១៤ ខែមករា ស្ទូឌីយោរបស់ Cheng Yi បានប្រកាសពីការផ្លាស់ប្តូរត្រាផ្លូវការរបស់ក្រុមហ៊ុនគ្រប់គ្រងរបស់លោក Huanrui Century ទៅជាត្រាផ្តាច់មុខ ស្ទូឌីយោវប្បធម៌ភាពយន្ត និងទូរទស្សន៍ Yongkang Qiyuan ដែលបង្ហាញពីការបំបែកខ្លួនទាំងស្រុងពីប្រព័ន្ធក្រុមហ៊ុន Huanrui។

ក្នុងរយៈពេលប៉ុន្មានថ្ងៃថ្មីៗនេះបញ្ហាកិច្ចសន្យារបស់ Cheng Yi ជាមួយ Huanrui បានទាក់ទាញការចាប់អារម្មណ៍យ៉ាងខ្លាំង។ កិច្ចសន្យារបស់តារាសម្តែងរូបនេះនឹងផុតកំណត់ជាផ្លូវការនៅថ្ងៃទី១៨ ខែមករា ឆ្នាំ២០២៦ ប៉ុន្តែឈ្មោះរបស់ Cheng Yi នៅតែត្រូវបានចុះបញ្ជីនៅលើគេហទំព័រផ្លូវការរបស់ក្រុមហ៊ុន។ ទោះបីជាមានរបាយការណ៍នៅក្នុងឧស្សាហកម្មនេះថា Cheng Yi បានបញ្ចប់កិច្ចសន្យារបស់លោកជាមួយ Huanrui ដោយសន្តិវិធីក៏ដោយ ក៏មិនទាន់មានការប្រកាសជាផ្លូវការពីតារាសម្តែងរូបនេះទាក់ទងនឹងថាតើលោកនឹងបន្តកិច្ចសន្យានេះឬអត់នោះទេ។ ក្នុងចំណោមព័ត៌មាននៃការចាកចេញរបស់លោក Cheng Yi តម្លៃភាគហ៊ុនរបស់ Huanrui បានធ្លាក់ចុះរយៈពេលបីវគ្គជាប់ៗគ្នា ដោយមានការថយចុះសរុបចំនួន ១២.៣២%។ ជាពិសេស ការថយចុះនៅថ្ងៃទី ១៥, ១៦និង ១៩ ខែមករា គឺ ៧.២១%, ៥.១៤% និង 0.៣៨% រៀងគ្នា។

ទោះជាយ៉ាងណាក៏ដោយ ប្រព័ន្ធផ្សព្វផ្សាយបានកត់សម្គាល់ថា ទោះបីជា Huanrui មិនដែលបង្ហាញជាសាធារណៈអំពីការរួមចំណែកជាក់លាក់របស់ Cheng Yi ចំពោះប្រាក់ចំណូលពីផ្នែកគ្រប់គ្រងសិល្បកររបស់ខ្លួនក៏ដោយ ក៏មិនអាចបដិសេធបានថា ក្នុងចំណោមសិល្បករដែលបានចុះកិច្ចសន្យាបច្ចុប្បន្នរបស់ក្រុមហ៊ុន Cheng Yi ទទួលបានប្រជាប្រិយភាពខ្ពស់ខ្លាំង ដោយសាររឿងភាគល្បីៗជាច្រើនហើយត្រូវបានចាត់ទុកថាជា សិល្បករសសរស្តម្ភនៅក្នុង Huanrui។

ពីមុនសិល្បករដែលបានចុះកិច្ចសន្យាជាមួយ Huanrui ដូចជា Yang Zi, Ren Jialun និង Zhang Yuxi បានចាកចេញពីក្រុមហ៊ុនម្តងមួយៗក្នុងរយៈពេលប៉ុន្មានឆ្នាំចុងក្រោយនេះ។ជាពិសេស ការគ្រប់គ្រងសិល្បករគឺជាអាជីវកម្មស្នូលមួយរបស់ Huanrui Century។ បន្ទាប់ពីកំណើនបីឆ្នាំជាប់ៗគ្នា ប្រាក់ចំណូលនៅក្នុងផ្នែកនេះបានថយចុះជាង ២០% ពីមួយឆ្នាំទៅមួយឆ្នាំនៅក្នុងឆមាសទីមួយនៃឆ្នាំ ២០២៥ គឺនៅពេលដែលបញ្ហាកិច្ចសន្យាជាមួយ Cheng Yi បានបង្កឱ្យមានការភ្ញាក់ផ្អើល។

នៅឆ្នាំ ២០២៥ Cheng Yi បានប្រឈមមុខនឹងឧបសគ្គជាបន្តបន្ទាប់ ដោយសាររឿងភាគទាំងបីដែលលោកដើរតួជាតួឯកដោយមិនបានសម្រេចបានលទ្ធផលចាក់ផ្សាយដូចការរំពឹងទុកនោះទេ។ ទោះជាយ៉ាងណាក៏ដោយ សហគមន៍អ្នកគាំទ្ររបស់តារាសម្តែងរូបនេះនៅតែបន្តបង្ហាញពីភាពរឹងមាំ និងការគាំទ្រយ៉ាងស្វាហាប់របស់ខ្លួន។ នៅក្នុងចំណាត់ថ្នាក់ខ្សែភាពយន្តដែលមានការទិញគណនី VIP ច្រើនជាងគេដោយអ្នកគាំទ្រនៅទូទាំងវេទិកានានាក្នុងឆ្នាំ ២០២៥ខ្សែភាពយន្តចំនួនបីរបស់ Cheng Yi កាន់កាប់តំណែងកំពូល។

រឿង «The Journey of Legend»ជាប់ចំណាត់ថ្នាក់លេខមួយ ដោយរកចំណូលបាន ១៩,៨៩ លានយ័ន រឿង «The Vendetta of An»រកចំណូលបាន ១៥,៦៣ លានយ័ន និងរឿង «Sword and Beloved» ជាប់ចំណាត់ថ្នាក់លេខបី ដោយរកចំណូលបាន ១៤,៣១ លានយ័ន។ នៅក្នុងចំណាត់ថ្នាក់នេះ មូលដ្ឋានអ្នកគាំទ្ររបស់ Cheng Yi បានវ៉ាដាច់មូលដ្ឋានអ្នកគាំទ្ររបស់សិល្បករជាច្រើនទៀតដូចជា Gong Jun, Xiao Zhan , Ding Yu Xi, Liu Yuning ជាដើម៕