ប្រទេសកូរ៉េខាងត្បូង ៖ កូរ៉េខាងត្បូងបានជាប់ចំណាត់ថ្នាក់ទី១លើពិភពលោកក្នុងចំណោម៤៣ប្រទេស ដែលពលរដ្ឋចំណាយពេលធ្វើដំណើរទៅធ្វើការយូរបំផុតរហូតដល់១០៨នាទីក្នុង១ថ្ងៃ ប៉ុន្តែគ្រូពេទ្យកូរ៉េខាងត្បូងបានព្រមានពីផលប៉ះពាល់សុខភាពជាច្រើន និងឈានទៅបាត់បង់ជីវិ.តដោយសារការចំណាយពេលយូរនៅតាមផ្លូវក្នុង១ថ្ងៃ ឬធ្វើដំណើរផ្លូវឆ្ងាយ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី២៣ ខែវិច្ឆិកា ឆ្នាំ២០២៥ ។
គ្រូពេទ្យនៅទីក្រុងសេអ៊ូលព្រមានថា ការធ្វើដំណើរយូរប្រឈមនឹងជំងឺធាត់ សម្ពាធឈាមឡើងខ្ពស់ ងាយបាត់បង់ជីវិត ពេលវេលាហាត់ប្រាណ និងការធ្វើសកម្មភាពសង្គមធ្លាក់ចុះ ហើយធ្វើឱ្យការបរិភាគអាហារល្ងាចយឺតយ៉ាវ ឬសម្រាកមិនគ្រប់គ្រាន់ ។ កត្តាទាំងនេះនឹងឆាប់ឡើងទម្ងន់ សមត្ថភាពហាត់ប្រាណធ្លាក់ចុះ និងសម្ពាធឈាមកើនឡើងខ្ពស់ ។.jpg)
ការស្រាវជ្រាវផ្សេងទៀតក៏ទទួលបានលទ្ធផលដូចគ្នាដែរ ដូចជា ការស្រាវជ្រាវរបស់សាកលវិទ្យាល័យនៅទីក្រុងវ៉ាស៊ីនតោន គឺអ្នកដែលធ្វើដំណើរលើសពី២៤គីឡូម៉ែត្រក្នុង១ថ្ងៃ ប្រឈមនឹងជំងឺធាត់ និងហាត់ប្រាណមិនគ្រប់គ្រាន់ ។ ក្រៅពីនេះ សាកលវិទ្យាល័យនៅស៊ុយអែតបានស្រាវជ្រាវទិន្នន័យរយៈពេល១៤ឆ្នាំ បង្ហាញថា ស្ត្រីធ្វើដំណើររយៈពេលយូរងាយនឹងបាត់បង់ជីវិតរហូតដល់៥៤% បើធៀបនឹងអ្នកធ្វើដំណើររយៈពេលខ្លីជាង ។
ភាពតានតានដោយសារការធ្វើដំណើរយូរនឹងធ្វើឱ្យកម្រិតស្ករ សម្ពាធឈាម និងកូឡេស្តេរ៉ុលកើនឡើងខ្ពស់ កើតជំងឺបេះដូង ឬបាត់បង់ជីវិត ។ អ្នកធ្វើដំណើរយូរភាគច្រើនមានជំងឺធ្លាក់ទឹកចិត្ត បារម្ភ អារម្មណ៍ឯកោ ឆាប់មួរម៉ៅ សមត្ថភាពគិតធ្លាក់ចុះ ពិបាកសម្រាក មានបញ្ហាសាច់ដុំ និងឆ្អឹង ។ មនុស្សភាគច្រើនពុំអាចកាត់បន្ថយពេលវេលាធ្វើដំណើរទេ ទើបពួកគេចាំបាច់ត្រូវថែទាំសុខភាពក្រោយពីធ្វើដំណើរផ្លូវឆ្ងាយ ។ នេះបើតាមការលើកឡើងរបស់គ្រូពេទ្យកូរ៉េខាងត្បូង ។.jpg)
ដោយឡែក គ្រូពេទ្យកូរ៉េខាងត្បូងម្នាក់ទៀតបានណែនាំសម្រាប់អ្នកដំណើរទាំងឡាយ បើឈរក្នុងពេលធ្វើដំណើរ គួរតែលើកជើងចុះ-ឡើងយឺតៗ ប៉ុន្តែបើប្រើប្រាស់ទូរស័ព្ទដៃ ឬអានសៀវភៅ គួរងាកក្បាលទៅឆ្វេង-ស្តាំរៀងរាល់២០នាទីម្តង ដើម្បីកុំឱ្យមានផលប៉ះពាល់ ។ លើសពីនេះ ហាមអង្គុយគងអន្ទាក់ខ្លាលើរថយន្តក្រុង ត្រូវអង្គុយឱ្យត្រង់ខ្លួនដើម្បីកាត់បន្ថយសម្ពាធលើឆ្អឹងខ្នង និងសន្លាក់ ។
គួរបញ្ជាក់ថា ការព្រមានរបស់គ្រូពេទ្យកូរ៉េខាងត្បូង គឺបន្ទាប់ពីទស្សនាវដ្តី Proceedings of the National Academy of Sciences ចុះផ្សាយពីការចាត់ចំណាត់ថ្នាក់ធ្វើដំណើរទៅធ្វើការយូរបំផុត ដោយអ្នកស្រាវជ្រាវមកពីសាកលវិទ្យាល័យ Autonomous University of Barcelona និងសាកលវិទ្យាល័យ McGill ឱ្យដឹងថា កូរ៉េខាងត្បូងជាប់ចំណាត់ថ្នាក់ទី១ ក្នុងចំណោម៤៣ប្រទេស ដែលចំណាយពេលធ្វើដំណើរទៅធ្វើការយូរបំផុត ។ ការធ្វើដំណើរលើពិភពលោក បានចំណាយពេលជាមធ្យមស្មើ៦៨នាទី ខណៈប្រទេសម៉ារ៉ុកបានចំណាយពេលធ្វើដំណើរឆាប់រហ័សត្រឹម៤៨នាទី ៕
