Emo ថាបែកគ្នា១០ឆ្នាំ វណ្ណដា នៅតែលើកដៃសំពះលោក និងទម្លាយពីការតស៊ូរបស់ ទេព ពិសិដ្ឋ

លោក Emo បានលាតត្រដាងនៅលើបណ្តាញសង្គមពីតារារ៉េប ម៉ាន់ វណ្ណដា នៅតែមានការគោរពចំពោះលោកទោះបីជាបែកគ្នា១០ឆ្នាំមកហើយក្តីនិងបានបង្កើតចក្រវាលសម្រាប់វិស័យហ៊ីបហប។ មិនត្រឹមតែប៉ុណ្ណោះលោកក៏បានទម្លាយពី ទេព ពិសិដ្ឋ ពេលប្រកួត The voice kid បានមកស្នាក់នៅផ្ទះលោក និងបានលើកឡើងថាទាំង វណ្ណដា និង ទេព ពិសិដ្ឋ ជាមនុស្សដែលមានសមត្ថភាពខ្លាំងលើវិស័យចម្រៀង

នៅយប់ថ្ងៃទី២៣ ខែវិច្ឆិកា Emo Composer បានបង្ហោះរូបពីរសន្លឹកដោយបានរៀបរាប់ថា វណ្ណដា ពីក្មេងប្រុសម្នាក់វេចសម្ពាយខោអាវតាមរកក្តីស្រមៃគាត់បានបង្កើតចក្រវាលមួយថ្មីសម្រាប់វិស័យ HipHop មួយនេះ។ មិនត្រឹមតែប៉ុណ្ណោះ Emo បាននិយាយថាខានជួប វណ្ណដា ក្បែរ១០ឆ្នាំ តែ វណ្ណដា នៅតែលើកម្រាមដៃ១០សំពះខ្លួនជាមួយនឹងក្តីរលឹក ហើយលោកបានឱប វណ្ណដា ដោយមិននឹកស្មានថា វណ្ណដា អាចធ្វើបានលោកពិតជាមានមោទនភាពណាស់ចំពោះ វណ្ណដា។

មិនត្រឹមតែបង្ហាញអារម្មណ៍មានមោទនភាពចំពោះ វណ្ណដា ដែលបង្កើតចក្រវាលថ្មីសម្រាប់វិស័យហ៊ីបហបប៉ុណ្ណោះទេ ប៉ុន្តែ Emo Composer ក៏បានទម្លាយពីការតស៊ូនិងការតាំងចិត្តដំបូងៗរបស់ ទេព ពិសិដ្ឋ ផងដែរ។ លោក បានលាតត្រដាងថា កាលប្រលង The voice kid ទេព ពិសិដ្ឋ បានមកស្នាក់នៅផ្ទះលោកដូចជាក្រុមគ្រួសារតែមួយ ពិសិដ្ឋ តែងព្យាយាមហ្វឹកហាត់ច្រៀងជាមនុស្សតស៊ូខ្លាំងក្នុងវិស័យសិល្បៈចម្រៀងមួយនេះ។

Emo បាននិយាយទៀតថាមានពេលមួយ ទេព ពិសិដ្ឋ បាននិយាយថាបើអត់បទចម្រៀងខ្លួនឯងរូបគេមិនច្រៀងទេ ហើយថ្ងៃនេះ ទេព ពិសិដ្ឋ ធ្វើបានហើយ។ Emo ថាទាំង វណ្ណដា និង ទេព ពិសិដ្ឋ ពិតជាមនុស្សដែលមានសមត្ថភាពខ្លាំងលើវិស័យចម្រៀងមួយនេះដោយលោកបានជូនពរអ្នកទាំងពីរឱ្យកាន់តែជោគជ័យផងដែរ៕