Rosé រកចំណូលបានច្រើនលានដុល្លារពីយូធូបដោយសារបទចម្រៀងល្បី «APT»

ថ្មីៗនេះទស្សនាវដ្ដី Forbes Korea បានប្រកាសពីចំណាត់ថ្នាក់តារាកូរ៉េដែលមានឥទ្ធិពលបំផុតនៅលើ YouTube ក្នុងឆ្នាំ២០២៥ ដោយ Rosé សមាជិក BLACKPINK កាន់កាប់តំណែងលេខ១។

ឆាណែលយូធូប Rosé មានអ្នក Subscribe ច្រើនជាង ១៩ លាននាក់ឈានដល់ ៣.៦ ពាន់លាន views ជាមួយនឹង ៨៦ វីដេអូដែលបានបង្ហោះនៅក្នុងឆាណែលរបស់នាង។ ប្រាក់ចំណូលប្រចាំឆ្នាំរបស់ Rosé នៅលើ YouTube ត្រូវបានគេប៉ាន់ស្មានថាមានចំនួន ១១.០៦ពាន់លានវ៉ុនប្រមាណ៨.២លានដុល្លារ។ Rosé បានល្បីកក្រើកទូទាំងពិភពលោកកាលពីខែតុលា ឆ្នាំ២០២៤ ជាមួយនឹងការសហការរបស់នាងជាមួយនឹងសិល្បករអាម៉េរិក Bruno Mars ក្នុងបទចម្រៀង APT ដែលបានបំផុសគំនិតដោយ «Apartment Game»ជាហ្គេមកូរ៉េដ៏ពេញនិយម។

បទចម្រៀងនេះបានឈានដល់ ១០០ លានស្ទ្រីមនៅលើ Spotify ក្នុងរយៈពេលត្រឹមតែ៧ ថ្ងៃនៃការចេញផ្សាយរបស់វា ដោយបានបង្កើតកំណត់ត្រាយ៉ាងឆាប់រហ័សសម្រាប់បទចម្រៀង K-pop លឿនបំផុតដើម្បីឈានដល់ ១ពាន់លានការស្ទ្រីមក្នុងប្រវត្តិសាស្ត្របន្ទាប់ពី ១០០ថ្ងៃ។ បទ APT ក៏បានឡើងដល់កំពូលលេខ ៣ នៅលើតារាង Billboard Hot 100 របស់សហរដ្ឋអាម៉េរិក ដោយបង្កើតកំណត់ត្រាសម្រាប់បទចម្រៀងដែលមានចំណាត់ថ្នាក់ខ្ពស់បំផុតដោយតារាចម្រៀងនារី K-pop ហើយនៅតែឈរនៅលើតារាងរយៈពេល ៤១ សប្តាហ៍ជាប់ៗគ្នា។

នៅលើ YouTube បទនេះបានបំបែកឯតទគ្គកម្មសម្រាប់ MV Kpop លឿនបំផុតដែលឈានដល់ ១ ពាន់លានទស្សនាក្នុងប្រវត្តិសាស្ត្រដែលពីមុនត្រូវបានគ្រងតំណែងដោយ MV «Gangnam Style» របស់ Psy ។ MV «APT»ឥឡូវនេះមានអ្នកចូលមើលលើសពី ១.៩ពាន់លានដង។ កម្មវិធី «20th Century Hit Song» របស់ KBS Joy បាននិយាយថា Rosé រកចំណូលបាន ១៣.៣ ពាន់លានវ៉ុនប្រមាណ ៩.៧លានដុល្លារពីក្នុងការស្ទ្រីមត្រឹមតែ ២សប្តាហ៍បន្ទាប់ពីការចេញបទចម្រៀង «APT» ។

ទឹកប្រាក់រាប់សិបលានដុល្លារដែលរកបានតាមរយៈ YouTube បន្តឆ្លុះបញ្ចាំងពីប្រជាប្រិយភាពទូទាំងពិភពលោករបស់ Rosé ដោយពង្រឹងឋានៈជាកំពូលតារារបស់នាងក្នុងនាមជាតារាចម្រៀងទោលដែលទទួលបានជោគជ័យបំផុតរបស់ K-pop ។ លើសពីនេះ Rosé ត្រូវបានបោះឆ្នោតដោយទស្សនាវដ្តី Time ថាជា «មនុស្សមានឥទ្ធិពលបំផុតម្នាក់» ក្នុងឆ្នាំ២០២៥ នៅក្នុងខែមេសា។

គួរឱ្យដឹងថាបទចម្រៀង «APT» កំពុងទទួលបានការតែងតាំង ៧ ក្នុងចំណោម ៨ សម្រាប់ Rosé នៅឯកម្មវិធី MTV Video Music Awards ឆ្នាំ ២០២៥៕