កណ្ដាល៖ ក្រោយការឃាត់ខ្លួនអ្នកលក់អនឡាញដ៏ល្បី Love Riya ជុំវិញការនិយាយនាំឲ្យការរើសអើង និងបំបាក់ទឹកចិត្តកងទ័ព ពេលនេះស្នងការដ្ឋាននគរបាលខេត្តកណ្តាល បានពិនិត្យឃើញសារធាតុហាមឃា.ត់ខុសច្បាប់នៅក្នុងផលិតផលចំនួន៤ មុខ របស់ក្រុមហ៊ុន Love Riya ដែលនឹងធ្វើឲ្យស្ថានទម្ងន់ទោ.សរបស់ថៅកែលក់ឡេខាងលើនេះកាន់តែធ្ងន់ធ្ងរ។
យោងតាមការបង្ហោះរបស់លោក ឈឿន សុចិត្ត ស្នងការនគរបាលខេត្តកណ្ដាល នៅថ្ងៃទី២០ ខែសីហា បានឲ្យដឹងថា៖ ផលិតផលចំនួន៤ មុខក្នុងចំណោមផលិតផ្សេងទៀត ដែលមន្ត្រីជំនាញបានយកទៅពិសោធន៍ និងធ្វើតេស្ត ដែលម្ចាស់ក្រុមហ៊ុនខាងលើ តែង Live ផ្សាយលក់ គឺជាការបោកប្រាស់ ក្លែងក្លាយ ហើយមានសារធាតុហាមឃាត់លើស ខុសពីច្បាប់អនុញ្ញាត ធ្វើឲ្យប៉ះពាល់សុខភាពយ៉ាងខ្លាំងដល់អ្នកប្រើប្រាស់។
លោក សុចិត្ត បានឲ្យដឹងដែរថា៖ សារធាតុហាមឃា.ត់ដែលមាននៅក្នុងផលិតផលក្រុម Love Riya នោះរួមមាន៖ សារធាតុបារ៉ត (Mercury) និងសារធាតុកាដម្យូម (Cadmium) ដែលសុទ្ធជាលោហៈធ្ងន់ប៉ះពាល់ដល់សុខភាពធ្ងន់ធ្ងរពេលប្រើប្រាស់យូរទៅ។
លោកបានពន្យល់បន្ថែមថា៖ ចំពោះសារធាតុបារត គឺជាលោហៈធ្ងន់ ដែលត្រូវបានប្រើប្រាស់ក្នុងផលិតផលថ្នាំដុសធ្មេញ (ដើម្បីសម្លាប់មេរោគ) គ្រឿងសម្អាង (ធ្វើអោយស្បែកឆាប់ស)។ ផលប៉ះពាល់៖ ខូចតំរងនោម ប្រព័ន្ធប្រសាទ ប្រព័ន្ធដង្ហើម ប្រព័ន្ធពោះវៀន ស្ត្រីមានផ្ទៃពោះនិង ស្បែក។
ចំណែកសារធាតុ Cadmium ត្រូវបានប្រើប្រាស់ក្នុងផលិតផលថ្នាំដុសធ្មេញ ឬ គ្រឿងសម្អាង (ក្រែមលាបមាត់) ដើម្បីអោយមានភាពភ្លឺរលោង។ ផលប៉ះពាល់៖ ខូចតំរងនោម ថ្លើម ឆ្អឹងឆាប់ទន់ (ស្ពោធ) ប្រតិកម្មស្បែក (Allergic) រលាកស្បែក និងកើនហានិភ័យនៃជម្ងឺមហារីក។ សារធាតុទាំង២នេះ អាចចម្លងចូលក្នុងខ្លួនមនុស្សបានតាមរយៈការលេប ឬជ្រាបចូលតាមស្បែក។
គួររំលឹកថា អ្នកនាង Love Riya ដែលជាអ្នកលក់អនឡាញល្បីមួយរូប ត្រូវបានសមត្ថកិច្ចខេត្តកណ្ដាលឃាត់ខ្លួន កាលពីថ្ងៃទី១៥ ខែសីហា ឆ្នាំ២០២៥ ស្ថិតនៅទីតាំងបុរី ML ក្រុងតាខ្មៅ ខេត្តកណ្ដាល នៅចំណុចគេហដ្ឋានរបស់នាងផ្ទាល់តែម្ដង។
ក្រោមការឃាត់ខ្លួននេះ Love Riya ត្រូវបានចោ.ទប្រកាន់ពីបទ ញុះញង់ឲ្យមានការរើសអើង និង នាំឲ្យខូចទឹកចិត្តរបស់កងទ័ព ជាបទល្មើសព្រហ្មទណ្ឌដែលចែងឲ្យផ្តន្ទាទោសតាមមាត្រា ៤៧២ និង ៤៩៦ នៃក្រមព្រហ្មទណ្ឌ។ ហើយបច្ចុប្បន្ន សាលាដំបូងខេត្តកណ្ដាលកំពុងកសាងសំណុំរឿងដើម្បីបញ្ជូនទៅលើ ចំណែកជនជាប់ចោ.ទដែលជាអតីតថៅកែស្រីលក់ឡេល្បីឈ្មោះរូបនេះ ត្រូវបានតុលាការសម្រេចឃុំខ្លួនជាបណ្ដោះអាសន្នសិន៕
