ស្របពេលប្រទេសជាតិកំពុងតែជួបបញ្ហាលំបាកមានសុខសន្តិភាពផុយស្រួយគេសង្កេតឃើញថាបុគ្គលមួយចំនួនបានឈ្លោះប្រកែកគ្នានៅលើបណ្តាញសង្គមជេរប្រមាថគ្នាយ៉ាងសាហាវ។ ឃើញសភាពបែបនេះតារាចម្រៀង ខេម បានស្នើសុំក្រសួងពាក់ព័ន្ធយកបុគ្គលដែលកំពុងតែឈ្លោះគ្នាយកទៅអប់រំ ហើយការឈ្លោះគ្នានេះកំពុងតែធ្វើឱ្យសត្រូវមើលងាយ។
តារាចម្រៀង ខេម បានបង្ហោះសំណេរនៅលើបណ្តាញសង្គមហ្វេកប៊ុកនាល្ងាចថ្ងៃទី១ សីហា ថា «ស្នើសុំក្រសួងពាក់ព័ន្ធនាំបុគ្គលខ្មែរ កំពុងតែឈ្លោះគ្នាលើបណ្តាញសង្គមស្របពេលប្រទេសកំពុងជួបនូវបញ្ហាចោរឈ្លានពាន អញ្ជើញពួកគាត់ទៅណែនាំផង ប្រទេសកំពុងត្រូវការការរួបរួម ប្រជាជនកំពុងតាមដានព័ត៌មានដែលពិត»។ តារាចម្រៀងសំឡេកស្អករូបនេះបានបន្តទៀតថា «មិចបានប្អូនៗម៉ោឈ្លោះគ្នាអីពេលហ្នឹងនាំឱ្យសត្រូវមើលងាយចឹងសុំបញ្ចប់ទៅប្អូន បើមានរឿងជាមួយគ្នាហៅគ្នាតែពីរនាក់រឺអ្នកពាក់ព័ន្ធទៅកន្លែងស្ងាត់ណាមួយដោះស្រាយទៅកុំបរិហាកេរ្តិ៍គ្នាលើបណ្តាញសង្គមបែបនេះ»។
ខេម បានបញ្ជាក់ចុងក្រោយថា «ប្អូនៗអាណិតថ្នាក់ដឹកនាំយើងផង លោកប្រឹងណាស់ដើម្បីការរួបរួមមួយ និង ដៃម្ខាងទប់សង្គ្រាម ដៃម្ខាងរកការងារជូនប្រជាជន ចឹងប្អូនបានសុខហើយកុំនាំការលំបាកជូនគាត់អី បងសុំចុះ»។
ការលើកឡើងរបស់ ខេម ក្នុងន័យឱ្យខ្មែរសាមគ្គីគ្នា កុំឱ្យឈ្លោះប្រកែកគ្នានាំឱ្យសត្រូវមើលងាយនេះបានធ្វើឱ្យមនុស្សជាច្រើនគាំទ្រ។ ទោះយ៉ាងណា ការលើកឡើងរបស់ ខេម គេបានឃើញមតិមួយចំនួនតូចហាក់បញ្ចេញប្រតិកម្មអវិជ្ជមានមកកាន់តារាចម្រៀងរូបនេះ។
គួរបញ្ជាក់ផងដែរថា ពេលនេះសង្គ្រាមនៅតាមបន្ទាត់ព្រំដែនរវាងប្រទេសកម្ពុជានិងថៃបានអនុវត្តបទឈប់បាញ់ហើយ ប៉ុន្តែគ្រាន់តែធូរស្រាលមួយកម្រិតមិនទាន់មានសុខសន្តិភាពពេញបរិបូរណ៍នោះទេ៕
