ម៉េចវិញទៅចឹង? នាយករដ្ឋមន្រ្តីស្ដីទីថ្មីរបស់ថៃនឹងត្រូវកាន់តំណែងតែ១ថ្ងៃប៉ុណ្ណោះ

ថៃ ៖ នាយករដ្ឋមន្ត្រីស្តីទីរបស់ប្រទេសថៃ ដែលគ្រោងនឹងចូលកាន់តំណែងនៅថ្ងៃពុធនេះ នឹងត្រូវគ្រប់គ្រងកាតព្វកិច្ចនាយករដ្ឋមន្រ្តីត្រឹមតែមួយថ្ងៃប៉ុណ្ណោះ ដោយបន្ទាប់ពីនោះតំណែងនេះនឹងត្រូវផ្ទេរទៅកាន់អ្នកនយោបាយជើងចាស់មួយរូបទៀតកាន់កាប់បន្ត។ នេះបើយោងតាមសារព័ត៌មានបាងកកប៉ុស្តិ៍។

បន្ទាប់ពីគណៈរដ្ឋមន្រ្តីថ្មី ធ្វើពិធីសច្ចាប្រណិធានរួច នៅថ្ងៃទី០៣ខែកក្កដាឆ្នាំ២០២៥ លោក Phumtham Wechayachai ដែលជាឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ នឹងត្រូវឡើងជំនួសតំណែងនាយករដ្ឋមន្រ្តីពីលោកស្រីផែថងថានវិញ។

មូលហេតុដែលនាំឲ្យមានការអនុវត្តបែបនេះ គឺដោយសារតែលោក Phumtham នៅមិនទាន់ស្បថចូលកាន់តំណែងនៅឡើយ ដូច្នេះទើបបានជាតំណែងនាយករដ្ឋមន្រ្តីស្តីទី ត្រូវធ្លាក់ទៅលើលោកSuriyaឧបនាយករដ្ឋមន្រ្តីរដ្ឋមន្រ្តីក្រសួងសាធារណការដឹកជញ្ជូន។ ប៉ុន្តែនៅពេលគណៈរដ្ឋមន្រ្តីថ្មីធ្វើសច្ចាប្រណិធានរួច លោកSuriyaនឹងត្រូវបានជំនួសដោយលោក Phumtham វិញ។

កាលពីថ្ងៃអង្គារ ទី១ ខែកក្កដា គណបក្សភឿថៃដែលជាបក្សកាន់អំណាចបាននិយាយថា បន្ទាប់ពីការរុះរើគណៈរដ្ឋមន្ត្រីនៅថ្ងៃព្រហស្បតិ៍រួច លោក Phumtham Wechayachai នឹងចូលកាន់តំណែងពេញលេញជំនួសលោកស្រីផែថងថាន ព្រោះលោកជាឧបនាយករដ្ឋមន្ត្រីដែលមានឋានៈខ្ពស់ជាងលោក Suriya ។

នៅក្នុងអង្គពិធីមួយ ដែលបើកចំហចំពោះប្រព័ន្ធផ្សព្វផ្សាយ លោក Suriya បានបដិសេធមិនឆ្លើយតបនឹងសំណួរដែលសួរថា «តើគាត់មានអារម្មណ៍យ៉ាងណា ចំពោះការដឹកនាំក្នុងរយៈពេលដ៏ខ្លីនេះ ជាមួយអាជីពនយោបាយរយៈពេលជាច្រើនទសវត្សរ៍របស់គាត់បែបនេះ?» លោកគ្រាន់បកស្រាយថា «ការងារសំខាន់បំផុតរបស់លោកនៅពេលនេះគឺ ការចុះហត្ថលេខាលើក្រដាសមួយសន្លឹក ដើម្បីធានាឲ្យការផ្លាស់ប្តូរមានភាពរលូន ទៅកាន់អ្នកស្នងតំណែងរបស់លោក នៅថ្ងៃទី៣ កក្កដា ខាងមុខនេះប៉ុណ្ណោះ៕