ម៉ាកសញ្ញា «ម្លិះអង្គរ» និង«អង្ករផ្ការំដួល» របស់ខ្មែរ បានជាប់ក្នុងតារាងអង្ករល្អបំផុតនៅលើពិភពលោក

ម៉ាកសញ្ញា «ម្លិះអង្គរ» ដែលជាតំណាងឲ្យគុណភាពខ្ពស់បំផុតនៃប្រភេទអង្ករខ្មែរ បានជាប់ក្នុងតារាងជា «អ្នកផលិតអង្ករល្អបំផុតនៅលើពិភពលោក» ខណៈដែលផលិតផលអង្ករ«ផ្ការំដួល» របស់ម៉ាកសញ្ញានេះ ក៏ត្រូវបានគេទទួលស្គាល់ថាជា «អង្ករដែលល្អបំផុត» ផងដែរ។ នេះបើយោងតាមការចាត់ថ្នាក់របស់ TasteAtlas ដែលជាមាតិការអនឡាញលំដាប់អន្តរជាតិ បង្ហាញពីម្ហូបអាហារ និងគ្រឿងទេសនៅតាមប្រទេសនីមួយៗនៅជុំវិញពិភពលោក។

នៅលើអត្ថបទដែលចេញផ្សាយនៅថ្ងៃទី១១ ខែមិថុនា « TasteAtlas» អំពីប្រធានបទ ប្រភេទអង្ករដែលល្អបំផុតទាំង៤៩ នៅទូទាំងពិភពលោកឆ្នាំ២០២៥ បានបង្ហាញថា ម៉ាកសញ្ញា«ម្លិះអង្គរ»របស់កម្ពុជា បានឈរនៅលេខរៀងទី១ ក្នុងចំណាត់ថ្នាក់ «អ្នកផលិតអង្ករដែលល្អបំផុត» ដែលវ៉ាដាច់ម៉ាកសញ្ញារបស់ប្រទេសផ្សេងៗរួមមាន Gạo Ông Cua របស់វៀតណាម, Acquerello របស់អ៊ីតាលី, Royal Umbrella របស់ប្រទេសថៃ, Yuki Tsubaki របស់ជប៉ុន និងម៉ាកសញ្ញាជាច្រើនទៀត។

ក្នុងនោះ ផលិតផលអង្ករដែលល្អបំផុតរបស់ម៉ាកសញ្ញានេះ ត្រូវបានឲ្យដឹងថាជា «អង្ករផ្ការំដួល» ដែលជាពូជអង្ករដែលមានតម្លៃខ្ពស់ មានរសជាតិឆ្ងាញ់ ទន់ រមួត ក្លិនឈ្ងុយ និងមានជាតិផ្អែមបន្តិច។ ជាមួយនឹងលក្ខណៈពិសេសទាំងនេះ«អង្ករផ្ការំដួល» ត្រូវបានគេទទួលស្គាល់តាមរយៈការឈ្នះពានរង្វាន់ “អង្ករល្អបំផុតរបស់ពិភពលោក” និងមានកិត្យានុភាពខ្ពស់បំផុត។

គួរឲ្យដឹងថា «ម្លិះអង្គរ» គឺជាម៉ាកសញ្ញាបញ្ជាក់ពីគុណភាពអង្ករក្រអូបរបស់កម្ពុជា និងជាកម្មសិទ្ធិរបស់សហព័ន្ធស្រូវអង្ករកម្ពុជា។ ម៉ាកសញ្ញានេះ បានធានាថាអង្ករដែលមានប្រភពមកមកពីប្រទេសកម្ពុជា គឺជាអង្ករដែលបានបំពេញតាមស្តង់ដារខ្ពស់បំផុតរបស់ពិភពលោក រួមទាំងគុណភាព រសជាតិ និងប្រភពដើម។

ដោយឡែកសម្រាប់ អង្ករផ្ការំដួល ត្រូវបានគេស្គាល់ថាជាពូជស្រូវដ៏ល្អមួយនៅកម្ពុជា។ វាជាពូជស្រូវ ដែលផ្ដល់នូវប្រភេទអង្ករគ្រាប់វែង មានគុណភាព និងតម្លៃខ្ពស់។ គុណភាពរបស់អង្ករនេះ បាននាំឲ្យកម្ពុជាមានប្រភេទអង្ករដែលឈានមុខគេក្នុងការធ្វើពាណិជ្ជកម្មអង្ករនៅលើពិភពលោក។ វាជាជម្រើសដំបូងដ៏លេចធ្លោសម្រាប់អ្នកទិញអង្ករនៅទូទាំងពិភពលោក ហើយត្រូវបាននាំចេញទៅទីផ្សារអន្តរជាតិក្រោមសញ្ញាប័ត្រ “ម្លិះអង្គរ (Malys Angkor) ៕