ហាមធ្វើ៧យ៉ាងនេះក្រោយបរិភោគអាហាររួច ព្រោះប្រឈមនឹងផលប៉ះពាល់សុខភាព

អ្នកជំនាញផ្នែកចំណីអាហារហាមដាច់ខាតធ្វើ៧យ៉ាងនេះក្រោយបរិភោគអាហាររួច កុំឱ្យប្រឈមនឹងផលប៉ះពាល់សុខភាព ពីព្រោះក្រោយពេលឈប់បរិភោគអាហារ សរីរាង្គផ្សេងៗពាក់ព័ន្ធនឹងប្រព័ន្ធរំលាយអាហារនឹងធ្វើការធ្ងន់ ។ ការធ្វើទង្វើទាំង៧យ៉ាងនេះក្រោយបរិភោគអាហារឆ្អែត អាចរារាំងដល់ដំណើរការរបស់ប្រព័ន្ធរំលាយអាហារ និងមានផលប៉ះពាល់សុខភាពផ្សេងៗ ។

តើពុំគួរធ្វើអ្វីខ្លះក្រោយពេលបរិភោគអាហាររួច?

១-ហាមជក់បារី ៖ យើងតែងឃើញមនុស្សខ្លះជក់បារីក្រោយបរិភោគអាហាររួច ហើយនិយាយថា ការជក់បារីក្រោយពេលបាយ ជួយកុំឱ្យហើមពោះ ប៉ុន្តែនេះជាការយល់ខុស ។ ការជក់បារីត្រូវបានហាមឃាត់ មិនថាជក់ពេលណាក៏ដោយ ព្រោះវាបំផ្លាញសុខភាពខ្លាំង ហើយបើជក់បារីក្រោយបរិភោគអាហារ កាន់តែប៉ះពាល់សុខភាពខ្លាំងឡើង ។ ការជក់បារី១ដើមក្រោយអាហារ គឺស្មើនឹងជក់បារី១០ដើមនៅពេលធម្មតា ព្រមទាំងប្រឈមជំងឺមហារីក ។

២-ហាមផឹកភេសជ្ជៈហ្គាស ឬបរិភោគផ្លែឈើមួយចំនួន ៖ ភេសជ្ជៈហ្គាសផ្ទុកនូវកាបូនឌីអុកស៊ីត បើផឹកវាភ្លាមៗក្រោយបរិភោគអាហារឆ្អែត កាបូនឌីអុកស៊ីតនឹងរារាំងដល់ដំណើរការរបស់ប្រព័ន្ធរំលាយអាហារ ខណៈការបរិភោគផ្លែប៉ោម និងស្វាយក្រោយអាហារ នឹងធ្វើឱ្យហើមពោះ ឬមានខ្យល់ក្នុងក្រពះ ។ ប៉ុន្តែយើងអាចបរិភោគក្រូច ល្ហុង និងម្នាស់ ក្រោយអាហារ ។

៣-ហាមផឹកទឹកតែ ៖ ស្លឹកតែ មានជាតិអាស៊ីតខ្ពស់ ហើយជាតិអាស៊ីតនឹងប៉ះពាល់ដល់ប្រូតេអ៊ីនក្នុងអាហារដែលយើងបរិភោគ ឬពិបាករំលាយអាហារ ។ ការផឹកតែចាស់ នឹងប៉ះពាល់ក្រពះ, ការរំលាយអាហារគ្មានប្រសិទ្ធភាព និងទល់លាមក ។ បើចង់ផឹកទឹកតែក្រោយអាហារ គួររង់ចាំពី២ម៉ោង ទៅ៣ម៉ោង ទើបល្អ ។

៤-ហាមដោះឡេវខោ ឬខ្សែក្រវ៉ាត់ ៖ ការបរិភោគអាហារច្រើនពេកលើសចំណុះអាចបណ្តាលឱ្យតឹងពោះ ហើមពោះ ឬឡើងទម្ងន់ ហើយមនុស្សភាគច្រើនចូលចិត្តដោះឡេវខោក្រោយបរិភោគរួច ។ ប៉ុន្តែវានឹងធ្វើឱ្យពោះវៀនដំណើរការខុសប្រក្រតី ពោះវៀនរមួល ឬស្ទះ ។

៥-ហាមងូតទឹក ៖ ពេលងូតទឹកនឹងធ្វើឱ្យឈាមក្នុងខ្លួនហូរទៅដៃ ជើង និងហូរពេញរាងកាយ ហើយធ្វើឱ្យបរិមាណឈាមនៅបរិវេណពោះកើនឡើង ។ វានឹងប៉ះពាល់ប្រព័ន្ធរំលាយអាហារធ្វើការពុំបានល្អ១០០% ឬហើមពោះ ហើយពេលហើមពោះញឹកញាប់ យើងនឹងប្រឈមការរលាកពោះវៀន ។ ការងូតទឹកមុនពេលបាយ ឬក្រោយបាយ គឺអាចធ្វើបាន ដោយរង់ចាំពី៤៥នាទី ទៅ៦០នាទី ។

៦-ហាមដើរ ឬហាត់ប្រាណ ៖ យើងតែងឮពាក្យថា គួរដើរបន្តិចក្រោយបាយរួចដើម្បីឱ្យមានសុខភាពល្អ ប៉ុន្តែការពិត ការដើរភ្លាមៗក្រោយបាយនឹងធ្វើឱ្យការរំលាយអាហារពុំបានល្អ និងស្រូបយកសារធាតុចិញ្ចឹមពីអាហារពុំល្អ ។ រហាត់ប្រាណក្រោយបាយ គឺត្រូវចំណាយកម្លាំងខ្លាំង ដែលធ្វើឱ្យប្រសិទ្ធភាពរំលាយអាហារធ្លាក់ចុះ ។ ដូច្នេះ គួរនៅស្ងៀមពី២០នាទី ទៅ៣០នាទី ។

៧-កុំទាន់សម្រាន្តភ្លាមៗ ៖ ការបរិភោគឆ្អែតភ្លាម សម្រាន្តភ្លាម គឺប្រឈមនឹងការច្រាលអាស៊ីត និងមានខ្យល់ក្នុងប្រព័ន្ធរំលាយអាហារ ។ ការសម្រាន្តក្រោយអាហារ ត្រូវតែរង់ចាំពី២ម៉ោង ទៅ៣ម៉ោង មានន័យថា ពេលក្រពះអាហារកិនរួច ទើបអាចសម្រាន្តបាន ៕