អនុវត្តតាម៦វិធីនេះដើម្បីដោះស្រាយបញ្ហាសម្រាន្តពុំលក់

មនុស្សមួយចំនួនធំមានបញ្ហាសម្រាន្តពុំលក់ពេលយប់ ដោយសារខួរក្បាលគិតពីរឿងរ៉ាវផ្សេងៗក្នុងជីវិតបណ្តាលឱ្យមានភាពខុសប្រក្រតីក្នុងរាងកាយ ផ្លូវចិត្ត និងគ្មានអារម្មណ៍ស្រស់ស្រាយពេលព្រឹក ។ ប្រសិនបើសម្រាន្តពុំលក់លើសពី១សប្តាហ៍ វាអាចប៉ះពាល់ដល់ការបំពេញការងារ ឬទំនាក់ទំនងជាមួយអ្នកដទៃ ។ ដូច្នេះ គួរអនុវត្តតាម៦វិធីនេះ ដើម្បីដោះស្រាយបញ្ហាសម្រាន្តពុំលក់ មុនពេលពិគ្រោះយោបល់ជាមួយគ្រូពេទ្យ ។

១-រៀបចំពេលវេលាសម្រាន្ត ៖ ព្យាយាមចូលសម្រាន្តពេលយប់ និងភ្ញាក់វិញក្នុងពេលវេលាដូចគ្នាជារៀងរាល់ថ្ងៃ មិនថាថ្ងៃធ្វើការ ឬថ្ងៃឈប់សម្រាក ពីព្រោះរាងកាយរបស់យើងចូលចិត្តការកំណត់ពេលវេលាត្រឹមត្រូវ ។ បើចូលសម្រាន្តតាមពេលវេលាទៀងទាត់នឹងធ្វើឱ្យរាងកាយផ្លាស់ប្តូរ ហើយឆាប់សម្រាន្តលក់ ។

២-ពុំផឹកភេសជ្ជៈមុនសម្រាន្ត ៖ ហាមផឹកកាហ្វេ មុនសម្រាន្ត៦ម៉ោង និងហាមផឹកស្រា មុនសម្រាន្ត៣ម៉ោង ។ សំខាន់ជាងនេះ ហាមលេងទូរស័ព្ទដៃ មុនសម្រាន្ត១ម៉ោង ពីព្រោះពន្លឺផ្ទៃមេឃចេញពីអេក្រង់ទូរស័ព្ទធ្វើឱ្យខួរក្បាលគិតថាជាពេលថ្ងៃ ។ បើចាំបាច់ត្រូវចុចទូរស័ព្ទពេលយប់ គួរពាក់វ៉ែនតាការពារពន្លឺពីអេក្រង់ទូរស័ព្ទ ។

៣-រៀបចំបន្ទប់ ៖ បន្ទប់សម្រាន្តត្រូវតែងងឹត ត្រជាក់ និងស្ងប់ស្ងាត់ ។ សីតុណ្ហភាពសមរម្យបំផុតក្នុងបន្ទប់ គឺចាប់ពី២០អង្សាសេ ទៅ២២អង្សាសេ និងអាចប្រើប្រាស់ក្រណាត់បិទភ្នែក ឬឧបករណ៍បិទត្រចៀក ។

៤-ការដកដង្ហើម ៖ ដកដង្ហើមស្រូបខ្យល់ចូលច្រមុះ ដោយរាប់ពី១ ដល់៤ និងទប់ដង្ហើម ដោយរាប់ពី១ ដល់៧ ។ បន្ទាប់មក បញ្ចេញខ្យល់តាមមាត់យឺតៗ ដោយរាប់ពី១ ដល់៨ ។ យើងអាចធ្វើបែបនេះ ចាប់ពី៣លើក ដល់៤លើក ដើម្បីឱ្យរាងកាយធូរស្រាល ឆាប់សម្រាន្តលក់ ។

៥-វិធី Military Method ៖ គឺជាវិធីដែលកងទ័ពអាមេរិកប្រើប្រាស់នៅសមរភូមិ ដោយដេកសណ្តូកដៃ-ជើងឱ្យត្រង់ និងស្រមៃឱ្យបាន១០នាទី ថា យើងកំពុងសម្រាន្តលើទូកអណ្តែតលើទឹកសមុទ្រដ៏ស្ងប់ស្ងាត់ ឬកំពុងសម្រាន្តលើពពកទន់ៗ ហើយប្រាប់ខ្លួនឯងដដែលៗថា «ឈប់គិត! ឈប់គិត» ។

៦-បើសម្រាន្តពុំលក់លើសពី២០នាទី ចូរក្រោកចេញពីគ្រែ ៖ ដើម្បីកុំឱ្យខួរក្បាលតានតឹងនៅលើគ្រែ ហើយយកសៀវភៅមកអាន ស្តាប់ចម្រៀងតិចៗ ឬក្រេបទឹកតែក្តៅៗ ។ ពេលមានអារម្មណ៍ងងុយ យើងអាចត្រឡប់មកសម្រាន្តលើគ្រែវិញ ។

ក្រៅពីនេះ គួរបរិភោគអាហារពេលល្ងាចឱ្យឆាប់សម្រាន្តលក់ ដូចជា ៖ សាច់មាន់ ស៊ុតមាន់ សាច់ត្រី គ្រាប់ផ្កាឈូករ័ត្ន គ្រាប់ល្ពៅ និងទឹកដោះគោឆៅពុំដាក់ស្ករ ប៉ុន្តែហាមបរិភោគឆ្អែតពេកមុនសម្រាន្ត ២ម៉ោង ។

ហាមដាច់ខាត លេបថ្នាំងងុយដេក ពីព្រោះពេលអត់ថ្នាំ កាន់តែធ្វើឱ្យលែងងងុយ យើងអាចសាកល្បងអនុវត្តតាមវិធីទាំងនេះ២សប្តាហ៍ឱ្យបានជាប់លាប់ ធានាថា ការសម្រាន្តពេលយប់នឹងល្អប្រសើរឡើង ។ បើអ្នកណាមានវិធីល្អៗផ្សេងពីនេះ អាច Comments នៅក្រោមវីដេអូបាន ៕