តារាចម្រៀង Original Song ចេន ម្ចាស់បទ «ពងទា» បានលើកយកពីភាពជោគជ័យ នៃវិស័យហ៊ីបហបរ៉េបរបស់តារាចម្រៀងរ៉េប វណ្ណដា គឺបានមកដោយការខិតខំប្រឹងប្រែង ដោយខ្លួនឯង និងចង់ឱ្យអ្នករ៉េបជំនាន់ក្រោយយកការតស៊ូនេះធ្វើជាគំរូ។ ក្នុងនោះ ចេន បានបង្ហាញការសប្បាយចិត្តដែលឃើញវិស័យចម្រៀងរ៉េបបច្ចុប្បន្នទទួលបានការគាំទ្រ។
នៅក្នុងកម្មវិធី «អ្នកជិតខាង» ដែលបានចាក់ផ្សាយកាលពីពេលថ្មីៗនេះតារាចម្រៀង ចេន បានចូលរួមធ្វើជាភ្ញៀវកិត្តិយសដោយបានទម្លាយនូវរឿងរ៉ាវជាច្រើនទាក់ទងនឹងអាជីពការងារក៏ដូចជាជីវិតឯកជន។ ក្នុងនោះតារាចម្រៀង Original Song បានលើកយកឈ្មោះ សិល្បករ វណ្ណដា ចំៗក្នុងគោលបំណងចង់ឱ្យអ្នករ៉េបជំនាន់ក្រោយខិតខំ ដោយខ្លួនឯង ដូចជាតារាចម្រៀងរូបនេះទើបទទួលបានភាពជោគជ័យ។
តាមរយៈវីដេអូខ្លី ចេន បាននិយាយថា វណ្ណដា ធ្វើឱ្យសិល្បៈរ៉េបបានដល់សព្វថ្ងៃនេះគ្មាន អ្នកណាធ្វើឱ្យគាត់នោះទេ គឺ វណ្ណដា ខំដោយខ្លួនឯងទាំងអស់។ ម្ចាស់បទ «អាក្របី» បន្តទៀតថា បើនិយាយពីវិស័យហ៊ីបហបឬរ៉េបគឺជាសញ្ញាដែលលោកសប្បាយ ចិត្តខ្លាំង មែនទែនបើប្អូនៗជំនាន់ក្រោយមានការគិតដូចជា វណ្ណដា គឺមានការរីកចម្រើនខ្លាំង។ វណ្ណដា គឺមានការតស៊ូតាំងពីដើម ពេលជំនាន់គាត់ស៊ូពួកយើងដឹងកម្រិតតស៊ូ ដឹងការលើកដាក់ខ្លួនថាត្រូវដើរទៅផ្លូវណា ហើយវណ្ណដា ធ្វើបានសព្វថ្ងៃនេះគឺបានមកពីការខិតខំប្រឹងប្រែងរបស់ពួកគាត់ទាំងអស់ គ្រាន់តែពួកយើងនៅផ្នែកពីរផ្សេងគ្នាមួយជាសិល្បៈរ៉េប មួយទៀតជា Band ។
តារាចម្រៀងរូបនេះ បានបន្តទៀតថា «កាលពីមុនស្រុកយើងនៅមានភាពបុរាណខ្លះដែរ មិនទាន់អាចទទួលយកបាននៃសិល្បៈហ៊ីបហប មានការអស់សង្ឃឹមតិចតួចនៅក្នុងនោះ ប៉ុន្តែពួកគាត់ធ្វើបានរហូតដល់ជោគជ័យក៏ក្លាយជាកម្លាំងចិត្តមួយទៀតសម្រាប់លោក បើអ្នកខាងហ៊ីបហបធ្វើបាន ខ្លួនលោកដែលជាតន្រ្តី Band ក៏ធ្វើបាន តែបើពួកយើងអត់ធ្វើអ្នកគាំទ្រម្តេចនឹងដឹង ត្រូវតែធ្វើឱ្យពួកគាត់បានដឹង។
ការលើកឡើងរបស់ ចេន នៅក្នុងកិច្ចសម្ភាសន៍ខាងលើ វណ្ណដា ក៏បានចែករំលែកបន្ត(Repost) នៅលើគណនីទិកតុករបស់ខ្លួនផងដែរ៕
