រាជធានីភ្នំពេញ ៖ បន្ទាប់ពីសង្កេតឃើញថា ការឆ្លងនៃជំងឺកូវីត-19មានការងើបឡើងវិញ មន្ទីរពេទ្យតេជោសន្តិភាព ដែលមានទីតាំងនៅក្នុងខណ្ឌព្រែកព្នៅ បានរៀបចំទីកន្លែងរបស់ខ្លួនរួចជាស្រេច ដើម្បីត្រៀមទទួលអ្នកជំងឺ ប្រសិនបើមានការផ្ទុះរាលដាលខ្លាំងនាពេលខាងមុខ។
តាមរយៈការបង្ហោះនៅគណនីហ្វេសប៊ុកផ្ទាល់ខ្លួនរបស់លោកវេជ្ជបណ្ឌិត ណូ សុភា នាយករងមន្ទីរពេទ្យជាតិតេជោសន្តិភាព បានឲ្យដឹងថា ៖ មន្ទីរពេទ្យជាតិតេជោសន្តិភាពបានរៀបចំទីកន្លែងរបស់ខ្លួនរួចជាស្រេច ត្រៀមទទួលអ្នកជំងឺ ករណីប្រសិនបើមានការផ្ទុះ រឺប៉ះពាល់ខ្លាំងដោយជំងឺកូវីដ១៩ និងគ្រោះធម្មជាតិផ្សេងៗ នៅពេលខាងមុខនេះ។.jpg)
នៅក្នុងការបង្ហោះនោះលោកវេជ្ជបណ្ឌិតបានលើកឡើងថា ៖ «ដោយមានការកំរើកឡើងវិញនៃជំងឺឆ្លងនិងគ្រោះធម្មជាតិផ្សេងៗ ថ្នាក់ដឹកនាំនៃមន្ទីរពេទ្យជាតិ តេជោសន្តិភាពបានរៀបចំទីកន្លែងរបស់ខ្លួន ត្រៀមទទួលអ្នកជំងឺប្រសិនបើមានការផ្ទុះរឺប៉ះពាល់ខ្លាំងនាពេលខាងមុខ ដូច្នេះសូមបងប្អូនពូ មីងចូលរួមការពារសុខភាពខ្លួនឯងអោយបានល្អ សូមបញ្ជាក់ថានេះគ្រាន់តែជាការត្រៀមទុកមុនតែប៉ុណ្ណោះ»។
គួររំលឹកផងដែរថា កាលពីកន្លងទៅថ្មីៗនេះក្រសួងសុខាភិបាលកម្ពុជា បានចេញសេចក្តីប្រកាសព័ត៌មានស្តីពីការបង្កើនការការពារខ្លួនពីការឆ្លងវីរុសកូវីដ-១៩ បំប្លែងថ្មី ជាពិសេសប្រភេទ JN.1 ដែលកំពុងរាតត្បាតនៅតាមបណ្តាប្រទេសជិតខាងកម្ពុជា និងនៅទូទាំងពិភពលោក។ ក្នុងនោះ ក្រសួងសុំឱ្យពលរដ្ឋបង្កើនការយកចិត្តទុកដាក់ និងប្រុងប្រយ័ត្នខ្ពស់ ដើម្បីការពារខ្លួនពីការឆ្លង ថែរក្សាសុខភាព ជាពិសេសចំពោះអ្នកដែលមានហានិភ័យខ្ពស់ ដូចជាជនវ័យចាស់ ជនដែលមានជំងឺរ៉ាំរ៉ៃ និងអ្នកដែលមានប្រព័ន្ធភាពស៊ាំខ្សោយ។
ក្រៅពីនេះ ក្រសួងក៏បានចេញសេចក្តីណែនាំឱ្យមានការ ចាក់វ៉ាក់សាំងកូវីដ-១៩ រំលឹកដល់ប្រជាជនអាយុចាប់ពី១២ឆ្នាំឡើងផងដែរ។ បើទោះបីជាបច្ចុប្បន្នកម្ពុជាមិនទាន់មានការផ្ទុះឡើងវិញនៃការឆ្លងវីរុសកូវីដ-១៩ខ្លាំងក្លាដូចប្រទេសដទៃក៏ដោយ ប៉ុន្តែក្រសួងសុខាភិបាលបានបញ្ជាក់ថា “ការការពារប្រសើរជាងព្យាបាល” គឺជាជម្រើសដ៏ល្អបំផុត ហើយក្រសួងកំពុងតែធ្វើការផ្សព្វផ្សាយ និងជំរុញការអនុវត្តវិធានការការពារខ្លួនជាមុនសម្រាប់ប្រជាពលរដ្ឋទាំងអស់ក្នុងដំណាក់កាលនេះ៕
