ការជិះទូកគយគន់ទេសភាពដងស្ទឹងសង្កែ ហាក់ទទួលបានគាំទ្រខ្លាំង ពីសំណាកភ្ញៀវទេសចរជាតិ ខណៈទើបតែដាក់ឱ្យដំណើរការមុនថ្ងៃចូលឆ្នាំប្រពៃណីជាតិខ្មែរតែប៉ុណ្ណោះ។
ដើម្បីទទួលយកបទពិសោធន៍ថ្មីនេះ ភ្ញៀវទេសចរ ត្រូវធ្វើដំណើរទៅចំណតទូក ដែលមានទីតាំងនៅទល់មុខសាលាសោហឺ ក្នុងសង្កាត់ស្វាយប៉ោ ក្រុងបាត់ដំបង មានចម្ងាយប្រហែល២០០ម៉ែត្រពីស្ពានថ្មថ្មី។
ក្នុងការជិះទូកនេះ ភ្ញៀវទេសចរត្រូវចំណាយ២មុឺនរៀល ក្នុងម្នាក់ ដោយធ្វើដំណើរចេញពីចំណតទូក រហូតដល់វត្តបាយដំរាំ ក្នុងឃុំឈើទាល ស្រុកបាណន់ និងប្រើរយៈពេលជាង២ម៉ោង គយគន់ទេសភាពដ៏ស្រស់ត្រកាលនៃដងស្ទឹងសង្កែ។
បន្ថែមពីនេះ ភ្ញៀវទេសចរ ក៏អាចជួលទូក កៃយាក់ ចែវលេងតាមដងស្ទឹងផងដែរ ដោយមួយទូកតម្លៃ ២មុឺនរៀល ជិះបាន២នាក់ ក្នុងរយៈពេល១ម៉ោង។
ស្របពេលដែលមានការគាំទ្រខ្លាំង ម្ចាស់ទូក ក៏បានស្នើឱ្យអាជ្ញាធរធ្វើយ៉ាងណាទប់ស្កាត់ការបង្ហូរកាកសំណល់ចូលស្ទឹង ដើម្បីកុំឱ្យជះក្លិនមិនល្អទៅភ្ញៀវទេសចរ៕
