ដ្បិតថាក្លាយជាតារាឯករាជ្យមិនទាន់បានសាងស្នាដៃចម្រៀចធ្លោខ្លាំងប៉ុន្តែគេសង្កេតឃើញថា ជូវី លីន បានចាប់ផ្តើមជាមួយនឹងការបើកហាងកាហ្វេផ្ទាល់ខ្លួននាពេលថ្មីៗនេះ ព្រមទាំងកាលពីមុនបើក Pub មួយកន្លែងទៀត។ នៅក្នុងការងារសិល្បៈ ជូវី លីន ក៏បានថតឱ្យផលិតផលនិងកម្មវិធីមួយចំនួនដូចគ្នា។
កាលពីថ្ងៃទី២២ មេសា តារាចម្រៀង ជូវី លីន បានប្រកាសអំពីបើកដំណើរការហាងកាហ្វេរបស់ខ្លួនដែលមានឈ្មោះថា « 9Café by Juvie» ដែលមានទីតាំងស្ថិតនៅផ្លូវលេខ ៥៦០, សង្កាត់ បឹងកក់ ២, ខណ្ឌ ទួលគោក, រាជធានីភ្នំពេញ។ ក្នុងវីដេអូអំពីការប្រូម៉ូតហាងរបស់ខ្លួនការដេគ័រនៅក្នុងហាងកាហ្វេនេះគឺមានបរិយាកាសជាមួយនឹងតន្រ្តីនិងរូបគំនូរសិល្បៈជាដើម។ ក្រៅពីហាងកាហ្វេដែលទើបនឹងចាប់ផ្តើមនេះ កាលពីខែកុម្ភៈ ជូវី លីន ក៏បានបើកដំណើរការហាងថា 9 – ណែន Pub នៅម្តុំទួលគោក។
គួរបញ្ជាក់ផងដែរថាបន្ទាប់ពីដើរចេញពីទ្រនំបារមី ជូវី លីន បានបន្តអាជីពរបស់ខ្លួនជាតារាចម្រៀងឯករាជ្យ។ ក្រៅពីការច្រៀងលោកក៏មានទេពកោសល្យទៅលើការផលិតវីដេអូដោយបានបង្កើតស្នាដៃចេញថតចម្រៀងឱ្យតារារ៉េប Kingchi ,ជី ដេវិត ទទួលបានតំណែង ក្នុងកម្មវិធីរ៉េប ថតវីដេអូចម្រៀងជាមួយក្រុម La Cima រួមទាំងថតវីដេអូជូនលោក អ៊ឹង ស៊ីវឈន់ ត្រូវជាគូដណ្តឹងរបស់ព្រះអង្គម្ចាស់ក្សត្រី នរោត្តម ពង្សសូរិយា។
ងាកទៅកាន់ចំណងមិត្តភាពវិញ ដ្បិតថាបានបំបែកក្រុមនិងសាងវិថីសិល្បៈដាច់ដោយឡែកប៉ុន្តែ ជូវី លីន និង នរិទ្ធ នៅតែបន្តមានទំនាក់ទំនងជាមួយគ្នាខណៈកាលពីថ្ងៃទី២០ មេសា កន្លងមកថ្មីៗនេះលោកក៏បានបង្ហោះជូនពរថ្ងៃកំណើត មេសា ជំនួយការរបស់ វណ្ណដា ផងដែរ៕
