ជាង៨០ឆ្នាំ! ឥណ្ឌា និងប៉ាគីស្ថាន នៅតែចែក “តំបន់កាស្មៀរ” មិនដាច់

កាស្មៀរ គឺជាតំបន់សមរភូមិដ៏ក្តៅ រវាងប៉ាគីស្ថាន និងឥណ្ឌា ដែលតែងតែឈ្លោះគ្នាដណ្តើមតំបន់នេះ យកមកគ្រប់គ្រងអស់រយៈពេល៧៨ឆ្នាំ។

ដើមឡើយឥណ្ឌា និងប៉ាគីស្ថាន ជាប្រទេសតែមួយរួមគ្នា ដោយស្ថិតក្រោមអាណានិគមចក្រភពអង់គ្លេស។
ពេលនោះ កាស្មៀរគឺជារដ្ឋមួយនៅក្នុងរដ្ឋសហព័ន្ធឥណ្ឌា ដោយមានប្រជាជនភាគច្រើនកាន់សាសនាអ៊ីស្លាម តែមានមេដឹកនាំជាអ្នកកាន់សាសនាហិណ្ឌូ។

លុះក្រោយមក នៅឆ្នាំ១៩៤៧ នៅពេលដែលអង់គ្លេសប្រគល់ឯករាជ្យ ក៏ចែកឥណ្ឌាជាពីរប្រទេស ហើយឱ្យប្រជាជននៅកាស្មៀរជាអ្នកសម្រេចដោយខ្លួនឯងថា តើចង់ភ្ជាប់ខ្លួនទៅនឹងឥណ្ឌា ឬក៏ទៅនឹងប៉ាគីស្ថាន។

ពេលនោះ មេដឹកនាំតំបន់កាស្មៀរ ហាក់មានភាពស្រពេចស្រពិល មិនដឹកភ្ជាប់ខ្លួនទៅខាងណា ក៏បានធ្វើឱ្យក្រុមបដិវត្តន៍អ៊ីស្លាមនៅកាស្មៀរ ដោយមានជំនួយពីប៉ាគីស្ថាន រៀបចំគម្រោងការណ៍ចង់វាយដណ្តើមអំណាចនៅកាស្មៀរ។

ដឹងពីគម្រោងការណ៍មុន មេដឹកនាំតំបន់កាស្មៀរ ក៏បានសម្រេចភ្ជាប់ខ្លួនជាមួយឥណ្ឌា ហើយស្នើឱ្យឥណ្ឌាបញ្ជូនទាហានចូលមកគ្រប់គ្រងដែនដីមួយផ្នែកធំរបស់កាស្មៀរ។

ចាប់តាំងពីពេលនោះ ជម្លោះដណ្តើមតំបន់កាស្មៀរ រវាងឥណ្ឌា និងប៉ាគីស្ថាន ក៏ចាប់ផ្តើមផ្ទុះឡើង។

កន្លងផុតជាង ៨០ឆ្នាំ ការប៉ះទង្គិចដោយអាវុធ រវាងប្រទេសទាំងពីរនៅតែកើតមានឡើង ដោយភាគីប៉ាគីស្ថាននៅតែយល់ថា ឥណ្ឌាបានឈ្លានពានដណ្តើមកាន់កាប់តំបន់កាស្មៀរ។

ស្របពេលដែរ ឥណ្ឌាវិញអះអាងថា វត្តមានកងទ័ពឥណ្ឌានៅក្នុងទឹកដីកាស្មៀរជារឿងស្របច្បាប់ ព្រោះមេដឹកនាំកាស្មៀរបានសម្រេចភ្ជាប់ខ្លួនជាមួយនឹងឥណ្ឌាតាំងពីទទួលឯករាជ្យពីចក្រភពអង់គ្លេស៕