បទចម្រៀងអបអរចូលឆ្នាំរបស់តារាចម្រៀង សុគន្ធ និសា សហការជាមួយនឹង រ៉ូលីន មានចំណងជើងថា «ចាក់ក្រឡេកទយ» បានក្លាយជាបទដ៏ជោគជ័យបំផុតនាពេលនេះរបស់នាងចាប់តាំងពីចាកចេញពីទ្រនំរស្មីហង្សមាសមកធ្វើជាតារាចម្រៀងឯករាជ្យវិញ។
ជឿជាក់ថាទស្សនិកជនមួយចំនួនធំបានជ្រាបក៏ដូចជាឮបទចម្រៀងនៅក្នុងរដូវកាលចូលឆ្នាំខ្មែរទៅលើបទចម្រៀងមួយបទមានចំណងជើងថា «ចាក់ក្រឡេកទយ» ដែលផ្ទុះការគាំទ្រមិនធម្មតា។ ចេញផ្សាយនៅថ្ងៃទី២៣ មីនា បទនេះគឺទទួលបានសន្ទុះគាំទ្រច្រើននៅក្នុងរដូវកាលចូលឆ្នាំដែលមានតារាល្បីៗជាច្រើនបានចូលរួមលេង សូម្បីតែតារាចម្រៀង ឱក សុគន្ធកញ្ញា ក៏បានចូលរួមលេងបទនេះជាមួយនឹង សុគន្ធ និសា ផងដែរ។
គិតមកទល់នឹងល្ងាចថ្ងៃទី២៤ មេសា ដែលចេញបានរយៈពេល១ខែបទនេះមានការស្តាប់នៅលើឆាណែលធូបរបស់ សុគន្ធ និសា លើសពី៤.៣លានដង ខណៈនៅជាប់ជាបទចម្រៀងដែលមានការពេញនិយមស្តាប់នៅឡើយជាប់លេខ១១ Trending Music។ 
ជាមួយនឹងរសជាតិនេះនិងចង្វាក់បែបសប្បាយៗនៃបទ «ចាក់ក្រឡេកទយ» បានជំរុញឱ្យបទនេះក្លាយជាបទដ៏ល្បីបំផុតរបស់អ្នកនាង សុគន្ធ និសា ចាប់តាំងពីក្លាយជាតារាចម្រៀងឯករាជ្យបន្ទាប់ពីចាកចេញពីទ្រនំរស្មីហង្សមាសដែលជាទ្រនំដែលតារាស្រីរូបនេះរួមសុខទុក្ខអស់រយៈពេលជាច្រើនឆ្នាំទាំងធ្លាប់ចាកចេញនិងវិលត្រឡប់មកសាងស្នាដៃម្តងទៀត។ ដោយសារតែភាពជោគជ័យនៃបទចម្រៀងនេះ សុគន្ធ និសា ក៏បានផ្អឹបបទចម្រៀងផ្សេងដែលត្រៀមនឹងទម្លាក់ក្នុងឱកាសចូលឆ្នាំខណៈបានទម្លាក់ចំនួន២បទគឺបទខាងលើនេះ និងបទ «សង្ក្រាន្តចួបស្នេហ៍»។
នៅពេលសម្រេចចិត្តដើរលើវិថីឯករាជ្យ សុគន្ធ និសា បានបង្ហាញស្នាដៃដំបូងតាមរយៈបទ «ពេលខ្ញុំដួលអ្នកនៅឯណា?» និងបានសហការច្រៀងនិងសម្តែងជាមួយនឹង នីកូ តាមរយៈសាច់រឿង ឃុនឆាង ឃុនផែន៕
