ក្នុងចំណោមប្រទេសដែលឈប់ច្រើនថ្ងៃជាងគេនៅអាស៊ាន តើកម្ពុជាយើងជាប់លេខប៉ុន្មាន?

ថ្ងៃឈប់សម្រាប់ គឺមានគ្រប់ប្រទេសនៅជុំវិញពិភពលោក ប៉ុន្តែនៅក្នុងនោះវាមានចំនួនថ្ងៃ និងមានលក្ខខណ្ឌដែលត្រូវឈប់ខុសៗគ្នាទៅតាមច្បាប់ តាមប្រពៃណីរបស់ប្រទេសនីមួយៗរៀងខ្លួន។

ជាក់ស្ដែង ការឈប់សម្រាក ឬ Holiday គឺជាថ្ងៃឈប់សម្រាកដោយផ្អែកទៅលើការប្រារព្ធនូវទិវារ និងពិធីបុណ្យជាតិ ឬអន្តរជាតិ ដែលមិនបានរាប់បញ្ចូលថ្ងៃចុងសប្ដាហ៍សៅរិ៍-អាទិត្យចូលឡើយ។ ដូច្នេះពេលនេះមកដឹងពីចំណាត់ថ្នាក់នៃប្រទេសទាំង១០នៅក្នុងអាស៊ានដែលមានថ្ងៃឈប់ចាប់ពីចំនួនតិចបំផុត ដល់ច្រើនបំផុតនៅខាងក្រោម៖

១០. ប្រទេសឡាវ ៖ ប្រទេសនេះមានថ្ងៃសម្រាកសរុបចំនួន ៩ថ្ងៃក្នុងមួយឆ្នាំ។ នៅក្នុងពិធីបុណ្យធំៗរបស់គេរួមមាន៖ ពិធីបុណ្យPi Mai (ចូលឆ្នាំឡាវ), ពិធីបុណ្យ That Luang , ទិវារជាតិនៃការបង្កើតសាធារណរដ្ឋប្រជាមានិតឡាវ។

៩. ប្រទេសសិង្ហបុរី៖ មានថ្ងៃឈប់សម្រាកសរុបទាំងអស់ ១១ថ្ងៃក្នុងមួយឆ្នាំ។ ការឈប់ធំៗគឺនៅក្នុង ពិធីបុណ្យចូលឆ្នាំចិន, ពិធីបុណ្យ Hari Raya Puasa នៃប្រជាជនម៉ាឡេ-មូស្លីម និងពិធីបុណ្យ Deepavaliតាមបែបសាសនាហិណ្ឌូ។

៨. ប្រទេសវៀតណាម ៖ មានថ្ងៃឈប់សរុប ១៥ថ្ងៃក្នុងមួយឆ្នាំ។ ពិធីបុណ្យធំៗមាន កម្មវិធីបុណ្យចូលឆ្នាំថ្មី, ទិវារបង្រួបបង្រួមជាតិ និង ទិវារជាតិប្រកាសឯករាជ្យភាពរបស់ប្រទេសវៀតណាម។

៧. ប្រទេសម៉ាឡេស៊ី ៖ មានថ្ងៃឈប់សរុប ១៦ថ្ងៃក្នុងមួយឆ្នាំ។ ពិធីបុណ្យសំខាន់ៗរួមមាន បុណ្យឯករាជ្យជាតិ, ពិធីបុណ្យ Hari Raya Puasa នៃប្រជាជនម៉ាឡេ-មូស្លីម និងពធីបុណ្យចូលឆ្នាំចិន។

៦. ប្រទេសប្រ៊ុយណេ ៖ មានថ្ងៃឈប់សរុប ១៦ថ្ងៃក្នុងមួយឆ្នាំ។ ពិធីបុណ្យសំខាន់ៗរួមមាន បុណ្យឯករាជ្យជាតិ, ពិធីបុណ្យ Hari Raya Puasa នៃប្រជាជនម៉ាឡេ-មូស្លីម និងពិធីចម្រើនព្រះជនរបស់ស្ដេចស៊ុលតង់។

៥. ប្រទេសថៃ ៖ មានថ្ងៃឈប់សរុប ១៨ថ្ងៃក្នុងមួយឆ្នាំ។ ពិធីបុណ្យធំៗរួមមាន ពិធីបុណ្យចូលឆ្នាំប្រពៃណីថៃ, ពិធីបុណ្យLoy Krathong (ពិធីបុណ្យបណ្ដែតប្រទីព) និង ព្រះរាជពិធីបុណ្យចម្រើនព្រះជនព្រះមហាក្សត្រថៃ។

៤. ប្រទេសហ្វីលីពីន ៖ មានថ្ងៃឈប់សរុប ១៨ថ្ងៃក្នុងមួយឆ្នាំ។ ពិធីបុណ្យធំៗរួមមាន កម្មវីធីSemana Santa នៃសាសនាគ្រឹស្ន, ទិវារប្រកាសឯករាជ្យរបស់ហ្វីលីពីន និងរដូវកាលនៃបុណ្យគ្រីស្មាស។

៣. ប្រទេសមីយ៉ាន់ម៉ា ៖ មានថ្ងៃឈប់សរុប ១៩ថ្ងៃក្នុងមួយឆ្នាំ។ ពិធីបុណ្យធំៗរួមមាន ពិធីបុណ្យ Thingyan (បុណ្យលេងទឹក) , បុណ្យឯករាជ្យជាតិ និង កម្មវិធីរំលឹកដល់ការធ្វើឃា..ត លោកឧត្តមសេនីយ៍ អ៊ុងសាន កាលពីឆ្នាំ១៩៤៧។

២. ប្រទេសកម្ពុជា ៖ មានថ្ងៃឈប់សរុប ២២ថ្ងៃក្នុងមួយឆ្នាំ។ ពិធីបុណ្យសំខាន់ៗរួមមាន ពិធីបុណ្យចូលឆ្នាំថ្មីប្រពៃណីជាតិខ្មែរ, ពិធីបុណ្យភ្ជុំបិណ្ឌ និងព្រះរាជពិធីបុណ្យអុំទុក បណ្ដែតប្រទីប និងសំពះព្រះខែអកអំបុក។

១. ប្រទេសឥណ្ឌូនេស៊ី ៖ មានថ្ងៃឈប់សរុប ២៧ថ្ងៃក្នុងមួយឆ្នាំ។ ពិធីបុណ្យសំខាន់ៗរួមមាន ពិធីបុណ្យNyepi ឬពិធីបុណ្យតមអាហារ, ពិធីបុណ្យ Idul Fitri ដែលពេលបញ្ចប់នៃពិធីបុណ្យរ៉ាម៉ាដន និងទិវារប្រកាសឯករាជ្យជាតិរបស់ឥណ្ឌូនេស៊ី៕