នីកូ ចាប់ដៃគូជាមួយរៀមច្បង ហ៊ឹម ស៊ីវន លើកដំបូងស្រាប់តែអ្នកគាំទ្រទទូចរឿងនេះភ្លាម

ទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីតារាចម្រៀង នីកូ បានទម្លាក់បទថ្មីជាពិសេសគឺបានសហការជាមួយនឹងតារាចម្រៀងជើងចាស់ដ៏ល្បីល្បាញលោកជំទាវ ហ៊ឹម ស៊ីវន។ តារាចម្រៀងពីរជំនាន់ចាប់ដៃគូជាមួយគ្នាលើកដំបូងនេះបានធ្វើឱ្យទស្សនិកជនកោតសរសើរថាពីរោះប៉ុន្តែមានបំណងចង់ឱ្យចេញ Version ថ្មីមួយនេះដែលលោក នីកូ បកស្រាយចម្រៀងមិនរដឺនយកសំឡេងធម្មតា។

អាចនិយាយបានថានេះជារឿងដ៏ពិសេសមួយដែលតារាចម្រៀងល្បីឈ្មោះលោកជំទាវ ហ៊ឹម ស៊ីវន មានការសហការជាមួយនឹងអ្នកចម្រៀងជំនាន់ក្រោយដែលចេញបទចម្រៀងលើទីផ្សារបើទោះបីជាតារាចម្រៀងល្បីឈ្មោះរូបនេះនៅបំរើការងារសិល្បៈក្តី។ ទោះយ៉ាងណា តារាចម្រៀង នីកូ បានធ្វើឱ្យមានរឿងរំភើបកើតឡើងហើយអាចរាប់បានថាជារឿងពិសេសមួយដែលលោកមានការសហការជាមួយនឹងរៀមច្បង ហ៊ឹម ស៊ីវន ចេញបទចម្រៀងដ៏មានអត្ថន័យក្នុងរដូវកាលចូលឆ្នាំនេះ។

នៅថ្ងៃទី៦ មេសា តារាចម្រៀង នីកូ បានទម្លាក់បទថ្មីមានចំណងជើងថា «ចាំឆ្នាំក្រោយ»ដោយមានការសហការជាមួយរៀមច្បង ហ៊ឹម ស៊ីវន។ បទចម្រៀងនេះទទួលបាននូវការចាប់អារម្មណ៍ពីទស្សនិកជនជាច្រើនដោយសារតែអត្ថន័យរបស់បទនេះរវាងកូនហើយនឹងម្តាយ។ ទស្សនិកជនខ្លះបានបង្ហាញចំណាប់អារម្មណ៍របស់ខ្លួនថាបន្ទាប់ពីស្តាប់បទនេះហើយគឺមានអារម្មណ៍ថានឹកដល់ឪពុកម្តាយនៅឯស្រុកខណៈពិធីបុណ្យចូលឆ្នាំខ្មែរកាន់តែខិតជិតមកដល់ធ្វើឱ្យមានអារម្មណ៍កាន់តែនឹកស្រុកកំណើត។

ជាមួយនឹងមតិសរសើរថាបទនេះពីរោះប្លែកនិងមានអត្ថន័យ ទស្សនិកជនក៏បានទទូចសំណូមពរឱ្យតារាចម្រៀង នីកូ ទម្លាក់មួយ Version ដែលលោកច្រៀងមិនរដឺន ច្រៀងតាមសំឡេងធម្មតារបស់លោកគិតថានឹងកាន់តែពីរោះជាងនេះ។

គួរបញ្ជាក់ផងដែរថា ក្នុងរដូវកាលចូលឆ្នាំនេះបទរបស់លោក នីកូ មានចំណងជើងថា «រាំតាមខ្ញុំ» គឺមានសន្ទុះគាំទ្រខ្លាំងពីសំណាកទស្សនិកជនខណៈបទនេះមានការស្តាប់នៅលើយូធូបលើសពី១លានដងហើយ។ នៅលើបណ្តាញសង្គមទិកតុកវិញមួយបទនេះគឺមានការលេងរាប់ម៉ឺនវីដេអូឯណោះ៕