គ្រូពេទ្យជប៉ុនណែនាំឱ្យបរិភោគបន្លែ២ប្រភេទនេះពេលព្រឹកអាចជួយរក្សាទម្ងន់រយៈពេល២០ឆ្នាំ

លោក Shuto Hiroshi ជាគ្រូពេទ្យជប៉ុនបានណែនាំឱ្យបរិភោគបន្លែ២ប្រភេទនេះនៅពេលព្រឹក អាចជួយរក្សាទម្ងន់រយៈពេល២០ឆ្នាំ ហើយថែមទាំងជួយកាត់បន្ថយខ្លាញ់ និងកូលេស្តេរ៉ុលទៀតផង ។ លោកតែងតែបរិភោគអាហារពេលព្រឹកដដែលៗក្នុងរយៈពេល២០ឆ្នាំ ហើយបន្លែ២ប្រភេទពុំអាចខ្វះបាន គឺខ្ទឹមបារាំងត្រាំទឹកខ្មេះ និងស្ពៃក្តោបស្ងោរទឹកស៊ុប ។

ក្រៅពីនេះ លោកបានបរិភោគអាហារផ្សេងៗ ដូចជា ៖ ស៊ុត យៅអ៊ួ និងផ្លែឈើ ពីព្រោះអាហារទាំងនេះមិនត្រឹមតែជួយដល់ការរំលាយអាហារទេ ប៉ុន្តែវាក៏បានជួយរក្សាកម្រិតជាតិស្ករក្នុងឈាមផងដែរ ។ នេះជាការអាថ៌កំបាំងក្នុងការបរិភោគអាហារ ដែលជួយឱ្យលោកអាចរក្សាទម្ងន់៦០គីឡូក្រាមក្នុងរយៈពេល២០ឆ្នាំមកនេះ លោកពុំឡើងទម្ងន់ទេ ។ វាថែមទាំងជួយកម្ចាត់ខ្លាញ់លើសដែលប្រមូលផ្តុំក្នុងរាងកាយអស់ជាច្រើនឆ្នាំ និងកាត់បន្ថយកូលេស្តេរ៉ុល បើធៀបនឹងពេលលោកនៅជាយុវជន ។

ការបរិភោគស្ពៃក្តោបច្រើននឹងធ្វើឱ្យយើងឆាប់ឆ្អែត ហើយវាពុំប៉ះពាដល់កម្រិតឈាមក្នុងស្ករ ។ ក្រៅពីនេះ ស្ពៃក្តោបសម្បូរដោយវីតាមីន U និងជាតិសរសៃជួយការពារក្រពះ ពោះវៀន និងការរំលាយអាហារ ។ រីឯការបរិភោគខ្ទឹមបារាំងត្រាំទឹកខ្មេះ គឺដូចគ្នានឹងការបរិភោគគ្រឿងទេស វាមិនត្រឹមតែជួយបង្កើនរសជាតិអាហារទេ ប៉ុន្តែវានឹងផ្តល់ផលល្អដល់សុខភាព២យ៉ាង គឺគ្រប់គ្របកម្រិតជាតិស្ករក្នុងឈាម និងកាត់បន្ថយកូលេស្តេរ៉ុល ។ ខ្ទឹមបារាំងត្រាំ ជួយប្រឆាំងនឹងអុកស៊ីតកម្ម, ឱ្យឈាមរត់ល្អ និងកុំឱ្យឈាមកក ។ នេះបើតាមការលើកឡើងរបស់គ្រូពេទ្យជប៉ុន ។

លោកគ្រូពេទ្យបានណែនាំពីវិធីត្រាំខ្ទឹមបារាំងឱ្យមានរសជាតិឆ្ងាញ់ និងឆាប់រហ័ស គឺដាក់ទឹកខ្មេះ ១៥០មីលីក្រាម, ទឹកឃ្មុំ ១០០មីលីក្រាម, អំបិល ១ស្លាបព្រាកាហ្វេ និងខ្ទឹមបារាំងចិញ្ច្រាំ ៥០០ក្រាម ចូលក្នុងប្រអប់ ។ បន្ទាប់មក យកប្រអប់នេះដាក់ក្នុងទូរទឹកកក រយៈពេល៥ថ្ងៃ ទើបយកមកបរិភោគ ។

ចំណុចសំខាន់បំផុតគួរយកចិត្តទុកដាក់ពេលបរិភោគអាហារព្រឹក គឺចៀសវាងបរិភោគអាហារម្សៅ ដូចជា ៖ នំប៉័ង ដូណាត់ និងគៀវ ពីព្រោះអាហារទាំងនេះនឹងធ្វើឱ្យជាតិស្ករក្នុងឈាមកើនឡើងភ្លាមៗ, នឿយហត់ និងងងុយគេង ។

លោកបានណែនាំឱ្យផឹកទឹកក្តៅឧណ្ឌៗ ១កែវ ក្រោយពេលដុសធ្មេញរួច ដើម្បីឱ្យប្រព័ន្ធសរសៃប្រសាទដំណើរការល្អ ពីព្រោះទឹកក្តៅឧណ្ឌៗមិនត្រឹមតែជួយដល់ការរំលាយអាហារទេ ប៉ុន្តែវានឹងរក្សាកំដៅក្នុងខ្លួន ។ ប៉ុន្តែពុំគួរផឹកតែបៃតងពេលព្រឹកទេ ដោយសារវាមានសារធាតុតានីន សារធាតុនេះនឹងធ្វើឱ្យមានបញ្ហាក្នុងប្រព័ន្ធរំលាយអាហារ ៕