ទឹកអំពៅផ្តល់អត្ថប្រយោជន៍ដល់សុខភាព ប៉ុន្តែមនុស្ស ៥ ប្រភេទនេះមិនអាចទទួលទានបានឡើយ!

អំពៅគឺជារុក្ខជាតិដែលមានប្រយោជន៍ខ្លាំងណាស់ចំពោះសុខភាពរាងកាយរបស់យើង នេះបើយោងតាមវេជ្ជបណ្ឌិតឯកទេស Huynh Tan Vu សាស្ត្រាចារ្យនៃមហាវិទ្យាល័យឱសថបុរាណទីក្រុងហូជីមិញ បាននិយាយថា ការញ៉ាំផ្លែអំពៅ ឬផឹកទឹកអំពៅជារៀងរាល់ថ្ងៃ អាចផ្តល់អត្ថប្រយោជន៍ដល់សុខភាពដូចជា៖ ព្យាបាលការក្អួត ការធ្លាក់សតាមទ្វារមាសចំពោះស្ត្រី ព្យាបាលការហូរឈាមច្រមុះ កាត់បន្ថយកំដៅក្នុងខ្លួន ព្យាបាលក្អក មាត់ស្ងួត រួមទាំងព្យាបាលកំដៅក្នុងក្រពះ ល្វីងមាត់ មិនឃ្លានអាហារ និងទល់លាមកជាដើម។

លើសពីនេះទឹកអំពៅក៏មានប្រសិទ្ធភាពបំបាត់ក្លិនមាត់ បំបាត់ការស្រេកទឹក និងមានជីវជាតិល្អចំពោះរាងកាយរបស់យើងផងដែរ។ ទន្ទឹមនឹងនេះអំពៅក៏ជាវត្ថុធាតុដើមសម្រាប់ធ្វើស្ករ និងទឹកម៉ូលេគុលប្រើជាអាហារ ឱសថ និងស្រាទៀតផង។ ទោះជាយ៉ាងណាសម្រាប់មនុស្ស ៥ ប្រភេទខាងក្រោមនេះគឺមិនអាចញ៉ាំអំពៅ ឬផឹកទឹកអំពៅបានឡើយ ដោយសារហេតុផលទាំងនេះ៖

១.អ្នកកើតជំងឺទឹកនោមផ្អែម៖ អ្នកកើតជំងឺទឹកនោមផ្អែម ហាមដាច់ខាតកុំទទួលទានអំពៅ ដោយសារជាតិស្ករធម្មជាតិក្នុងទឹកអំពៅមានច្រើន ជាហេតុបណ្តាលឱ្យជំងឺកាន់តែធ្ងន់ធ្ងរ។

២.អ្នកតមអាហារ ឬលើសទម្ងន់៖ ដោយសារទឹកអំពៅមានជាតិស្ករខ្ពស់ ងាយធ្វើឱ្យឡើងទម្ងន់ និងធាត់ ដូច្នេះប្រសិនបើអ្នកចង់សម្រកទម្ងន់ អ្នកត្រូវផឹកទឹកអំពៅក្នុងកម្រិតមធ្យម ព្រោះទឹកអំពៅមានថាមពលខ្ពស់ បើផឹកច្រើនពេកនឹងនាំឱ្យធាត់ព្រោះរាងកាយមានថាមពលលើស។

៣.ស្ត្រីមានផ្ទៃពោះ៖ ទឹកអំពៅមានរសជាតិឆ្ងាញ់ ប៉ុន្តែស្ត្រីមានផ្ទៃពោះងាយនឹងកើតជំងឺទឹកនោមផ្អែម ឬលើសទម្ងន់។ ដូច្នេះហើយ ពួកគេមិនគួរពិសាទឹកអំពៅច្រើនពេកទេ ដែលអាចបង្ករការឆ្លងរោគ ឬជំងឺទឹកនោមផ្អែមពេលមានផ្ទៃពោះបានយ៉ាងងាយ។

៤.អ្នកដែលមានប្រព័ន្ធរំលាយអាហារមិនល្អ៖ អ្នកដែលមានលំពែងខ្សោយ និងក្រពះមានការរំលាយអាហារមិនល្អ ជារឿយៗមានអាការៈហើមពោះ ពិបាករំលាយអាហារ រាគ និងក្រពះត្រជាក់ មូលហេតុគឺដោយសារទឹកអំពៅមានភាពត្រជាក់ និងមានជាតិស្ករខ្ពស់។

៥.អ្នកដែលកំពុងលេបថ្នាំ៖ កុំផឹកទឹកអំពៅខណៈពេលកំពុងលេបថ្នាំគ្រាប់ ឬថ្នាំប្រឆាំងនឹងកំណកឈាម ដើម្បីជៀសវាងការប្រតិកម្មថ្នាំ។ ក្នុងពេលជាមួយគ្នានេះ ដោយសារតែទឹកអំពៅត្រជាក់ វានឹងប៉ះពាល់ដល់រាងកាយរបស់អ្នក និងងាយបង្កជាជំងឺក្រពះ៕