នាឆ្នាំថ្មីនេះពិធីការិនី ហ៊ិន ច័ន្ទនីរ័ត្ន ប្រកាសដំណឹងល្អដល់អ្នកគាំទ្រនិងបានស៊ុបប្រាយស្វាមីរបស់ខ្លួនដោយនៅពេលនេះរូបនាងគឺមានទម្ងន់ហើយបន្ទាប់ពីរៀបការបានជាង១ឆ្នាំ។ ដំណឹងល្អនេះទាំងសាមីខ្លួនទាំងពីររួមទាំងអ្នកសិល្បៈ ទស្សនិកជន បានសម្តែងក្តីអបអរសាទរទៅកាន់អ្នកទាំងពីរផងដែរ។
នៅព្រឹកថ្ងៃទី៥ ខែកុម្ភៈ ពិធីការិនីដ៏ស្រស់សោភា ហ៊ិន ច័ន្ទនីរ័ត្ន បានបង្ហោះវីដេអូមួយនៅលើបណ្តាញសង្គមស៊ុបប្រាយលោក ឌី ពេជ្រ ជាស្វាមី ដោយបានដាក់ចំណងជើងថា«ទីបំផុត surprise ប្តី បានសម្រេច រឿងបងប្អូនចង់បំផុត»។ នៅក្នុងវីដេអូនេះអ្នកនាង នីរ័ត្ន បាននិយាយថា នេះជាការស៊ុបប្រាយលើកដំបូងរបស់ខ្លួនទៅកាន់ស្វាមី ដោយបានកាន់ប្រអប់កាដូមួយខណៈស្វាមីនាងកំពុងតែអានកាសែត។ ពេលទៅដល់អ្នកនាង ហ៊ិន ច័ន្ទនីរ័ត្ន បានប្រាប់លោក ឌី ពេជ្រ ថាខ្លួនមានកាដូឱ្យ ហើយលោកបាននិយាយប៉ាន់ស្មានថា ជាឡានថ្មី។

នៅពេលលោក ឌី ពេជ្រ បើកប្រអប់កាដូបានឃើញឧបករណ៍ពិនិត្យផ្ទៃពោះដោយបង្ហាញការរំភើបនិងបញ្ជាក់ទៅកាន់ប្រពន្ធរបស់ខ្លួនថាទម្ងន់ឬដោយបានឱបភរិយាជាទីស្រលាញ់ និងបានផ្តល់ស្នាមថើបផងដែរ។ អ្នកទាំងពីរក៏បានបង្ហាញអារម្មណ៍សប្បាយចិត្តចំពោះដំណឹងល្អនេះដែលនឹងជិតក្លាយជាឪពុកម្តាយគេ។
គួរបញ្ជាក់ថា លោក ឌី ពេជ្រ និង ហ៊ិន ច័ន្ទនីរ័ត្ន បានភ្ជាប់ពាក្យជាមួយគ្នាកាលពីថ្ងៃទី២៧ តុលា ឆ្នាំ២០២៣ និងចូលរោងជ័យនៅថ្ងៃទី២២ ខែធ្នូ ឆ្នាំ២០២៣ ក្រោមការផ្សំផ្គុំរបស់សម្តេចតេជោ។ មែនទែនទៅទម្រាំអ្នកទាំងពីរកសាងជីវិតគ្រួសារពោរពេញដោយសុភមង្គលនេះអ្នកទាំងពីរធ្លាប់ស្រលាញ់គ្នាហើយបានបែកគ្នា៨ឆ្នាំ ទើបវិលមកជួបគ្នាវិញ៕