តារាសម្តែងល្បីឈ្មោះ Song Hye Kyo បានបង្ហាញម៉ូតសក់ខ្លីក្នុងសម័យទសវត្សរ៍ឆ្នាំ៦០និង៧០លើរឿងថ្មីជាមួយតារាសម្តែង Gong Yoo ភ្លាមស្រាប់តែមានអ្នកគាំទ្រជាច្រើនចង់កាត់សក់តាម។ ទោះជាយ៉ាងណា ម្ចាស់ហាងសាឡននៅប្រទេសកូរ៉េបានព្រមានដល់អតិថិជនរបស់ខ្លួនបើសិនជាចង់បានសក់ខ្លីដូចជា Song Hye Kyo ទាល់តែមានមុខដូចជា Song Hye Kyo ជាមុនសិន។
កំពូលតារាកូរ៉េ Song Hye Kyo ដែលមានវ័យ៤៣ឆ្នាំ បានប៉ះនិងកំលោះសង្ហា Gong Yoo វ័យ ៤៥ ឆ្នាំជាលើកដំបូងជាមួយនឹងរឿង «Slowly, Intensely» ដែលបង្ហាញពីសម័យកាលទសវត្សរ៍ឆ្នាំ ៦០ និង ៧០ ហើយផ្តោតជុំវិញមនុស្សដែលធ្វើការនៅក្នុងឧស្សាហកម្មផ្សាយរបស់កូរ៉េខាងត្បូងដែលកំពុងរីកចម្រើននៅសម័យនោះ។ ការថតរឿងបានចាប់ផ្ដើម ហើយរូបភាពនៃការសម្តែងរបស់អ្នកទាំងពីរក៏បានលេចឡើងតែងខ្លួនឱ្យស្របនឹងសម័យកាលនោះ ។ Song Hye Kyo ខ្លួននាងផ្ទាល់ក៏បាននិយាយអំពីម៉ូតសក់ថ្មីរបស់នាងផងដែរដោយនាងគិតថាម៉ូតសក់នេះវាស្រដៀងទៅនឹងផ្លែប៉ោម។
រូបភាពនៃម៉ូតសក់ថ្មីរបស់ Song Hye Kyo បានសាយភាយយ៉ាងឆាប់រហ័ស ដោយមនុស្សជាច្រើននិយាយថានាងមើលទៅក្មេងជាងវ័យ។ ដោយសារឥទ្ធិពលរបស់តារាស្រីរូបនេះ លើវប្បធម៌ប៉ុប អ្នកគាំទ្រកូរ៉េជាច្រើនបានសម្រេចចិត្តថាពួកគេចង់កាត់សក់នេះដូចគ្នាហើយក៏សង្ឃឹមថានឹងទទួលបានលទ្ធផលស្រស់ស្អាតដូចគ្នាដែរ។
ជាក់ស្តែងនៅក្នុងកម្មវិធីវិទ្យុរបស់ពិធីករ Park Myung Soo បានទទួលការហៅទូរស័ព្ទពីអ្នកស្តាប់ម្នាក់ដែលបានចែករំលែកថាប្រពន្ធរបស់ខ្លួនកំពុងគិតចង់កាត់សក់របស់នាងឱ្យខ្លីដើម្បីឱ្យមើលទៅដូច Song Hye Kyo ។ ពិធីករបានឆ្លើយដោយស្មោះត្រង់ថាកុំយកម៉ូតសក់បែបនេះ! អ្នកនឹងមិនមើលទៅដូច Song Hye Kyo ទោះបីជាអ្នកកាត់សក់ខ្លីក៏ដោយ។ ទោះបីជាខ្ញុំមិនដែលឃើញ Hye Kyo ដោយផ្ទាល់ក៏ដោយ ក៏ខ្ញុំមិនដែលបានជួបមនុស្សដែលស្រដៀងនឹងនាងដែរ។
លើសពីនេះទៅទៀត ហាងអ៊ុតសក់ក៏បានអនុវត្តការប្រុងប្រយ័ត្នដ៏គួរឱ្យអស់សំណើចដើម្បីព្រមានអតិថិជនប្រឆាំងនឹងការកាត់សក់របស់ Song Hye Kyo ។ ម្ចាស់ហាងសាឡនជាច្រើនបានដាក់ផ្លាកដែរថា«ប្រសិនបើអ្នកចង់បានសក់ខ្លីរបស់ Song Hye Kyo អ្នកត្រូវតែមើលទៅដូច Song Hye Kyo ជាមុនសិន»៕
