ប្រុងប្រយ័ត្ន! កម្ពុជា នឹងទទួលរងបាតុភូតចុះអ័ព្ទពីថ្ងៃ២៣ រហូតដល់ដាច់ខែ

ក្រសួងធនធានទឹក បានស្នើឱ្យពលរដ្ឋមេត្តាយកចិត្តទុកដាក់ប្រុងប្រយ័ត្នខ្ពស់អំពីស្ថានភាពធាតុអាកាសចុះអ័ព្ទ ដើម្បីជៀសវាងពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។

យោងតាមសេចក្តីជូនដំណឹង របស់ក្រសួងធនធានទឹក បានឱ្យដឹងថា៖”ចាប់ពីថ្ងៃទី២៣ ដល់ថ្ងៃទី៣១ ខែមករា ឆ្នាំ២០២៥ នៅតាមតំបន់វាលទំនាប តំបន់ខ្ពង់រាប តំបន់ជួរភ្នំ និងតំបន់មាត់សមុទ្រ ចាប់ពីម៉ោង២៖០០យប់ រហូតដល់ម៉ោង ៧៖០០ព្រឹក នឹងងមាន បាតុភូតចុះអ័ព្ទ”។

បាតុភូតនេះ នឹងផ្តល់ការរំខានដល់ការធ្វើដំណើររបស់ប្រជាពលរដ្ឋ ដែលអាចធ្វើឱ្យអ្នកដំណើរមានការលំបាកខ្លះៗ ក្នុងពេលធ្វើដំណើរចរាចរណ៍។

ពាក់ព័ន្ធនឹងការចុះអ័ព្ទ ក្រសួងនឹងបន្តធ្វើការតាមដាន និងវិភាគអំពីស្ថានភាពធាតុអាកាស ដើម្បីជម្រាបជូនជាបន្តបន្ទាប់ ក្នុងករណីមានការប្រែប្រួល។

គួរបញ្ជាក់ថា បាតុភូតចុះអ័ព្ទ កើតមានឡើងនៅពេលខ្យល់ក្តៅធ្វើបំលាស់ទីខ្យល់ត្រជាក់ចូលមកជំនួស ឬស្រទាប់ទាបនៃខ្យល់សំនើមក្លាយជាត្រជាក់ដែលទាក់ទងទៅនឹងសំបកផែនដី៕