ផ្សាររាត្រីរីមាត់ទន្លេ ដែលគេស្គាល់ថាជាគោលដៅទេសចរណ៍ដ៏ល្អមួយនៅកណ្តាលក្រុងភ្នំពេញ កំពុងប្រឈមនឹងការបាត់ខ្លួន ឬផ្លាស់ទីកន្លែងថ្មី។
ផ្សារនេះ ទំនងជាត្រូវផ្លាស់ប្តូរទីតាំងថ្មី នៅពេលដែលរដ្ឋចាប់ផ្តើមអនុវត្តគម្រោងសាងសង់ស្ពានមិត្តភាពកម្ពុជា-កូរ៉េ ភ្ជាប់ពីចំណុចផ្សាររាត្រី ឆ្ពោះទៅតំបន់អរិយក្សត្រ។
បច្ចុប្បន្ន ក្រសួងសាធារណការ និង ដឹកជញ្ជូនកម្ពុជា បានឈានដល់ការខួងដីយកសំណាក ពិនិត្យបច្ចេកទេស ដើម្បីត្រៀមចាក់គ្រឹះស្ពាន។
ស្ពានមិត្តភាពកម្ពុជា-កូរ៉េ គ្រោងនឹងសាងសង់នៅខែមិថុនា ឆ្នាំ២០២៥ខាងមុខនេះ ក្រោមហិរញ្ញប្បទាននៃសាធារណរដ្ឋកូរ៉េ តម្លៃ ២៣៥លានដុល្លារ ដោយចែកចេញជា២ដំណាក់ការ៖
- ទីមួយ ស្ពានឆ្លងកាត់ទន្លេសាប ចាប់ផ្តើមពីចំណុចម្តុំសួនផ្សាររាត្រី ទៅត្រើយម្ខាងជ្រោយចង្វារក្បែរសណ្ឋាគារសុខា
- ទី២ឆ្លងកាត់ទន្លេមេគង្គ ចាប់ផ្តើមពីក្បែរសណ្ឋាគារសុខា ឆ្ពោះទៅឃុំអរិយក្សត្រ។
គួរបញ្ជាក់ថា ផ្សាររាត្រីក្រុងភ្នំពេញ នៅតែជាកន្លែងកម្សាន្តដ៏ទាក់ទាញ សម្រាប់ភ្ញៀវទេសចរជាតិ និងអន្តរជាតិចូលទស្សនា និងទិញទំនិញក្នុងតម្លៃធូរថ្លៃ។ ផ្សារនេះ បើកលក់ចាប់ពីម៉ោង៥ល្ងាច រហូតដល់ម៉ោង១២យប់ ដែលមានទីតាំងស្ថិតនៅតាមបណ្តោយផ្លូវមាត់ទន្លេ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ៕
