ប្រទេសម៉ាឡេស៊ី ៖ កាលពីថ្ងៃទី២៣ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនអាកាសចរណ៍ Malaysia Airlines បានសម្រេចផ្អាកប្រើប្រាស់យន្តហោះ Airbus A330neo ថ្មី ដោយសារបារម្ភពីសុវត្ថិភាពអ្នកដំណើរ ។ ការផ្អាកនេះ ក្រោយពីយន្តហោះទើបតែហោះហើរលើកដំបូងបានប៉ុន្មានថ្ងៃ និងប្រឈមបញ្ហាបច្ចេកទេស ។
លោក Izham Ismail នាយកក្រុមហ៊ុនអាកាសចរណ៍ Malaysia Airlines បាននិយាយមកកាន់សារព័ត៌មាន New Straits Times ថា ក្រុមហ៊ុនបានសម្រេចផ្អាកប្រើប្រាស់យន្តហោះនេះ ដោយសារបារម្ភពីសុវត្ថិភាពអ្នកដំណើរ និងការបាត់បង់កេរ្តិ៍ឈ្មោះក្រុមហ៊ុន ។ កំហុសឆ្គងបច្ចេកទេសរបស់យន្តហោះ គឺក្រុមហ៊ុនពុំអាចទទួលយកបានទេ វាគួរឱ្យខ្មាសអៀនណាស់ ហើយលោកបានស្នើឱ្យក្រុមហ៊ុន Airbus ដោះស្រាយបញ្ហានេះឱ្យបានឆាប់បំផុត ។
សារព័ត៌មាន New Straits Times រាយការណ៍ថា ជើងហោះហើរដំបូងរបស់យន្តហោះ Airbus A330neo ចេញពីទីក្រុងកូឡាឡាំពួរ ប្រទេសម៉ាឡេស៊ី ទៅកាន់ទីក្រុងមែនប៊ន ប្រទេសអូស្ត្រាលី កាលពីថ្ងៃទី១៩ ខែធ្នូ កន្លងមក ប្រឈមនឹងបញ្ហាបច្ចេកទេស ។ នៅឆ្នាំ២០២៤ ក្រុមហ៊ុនអាកាសចរណ៍ម៉ាឡេស៊ី បានជួបបញ្ហាជាច្រើន ដូចជា ៖ ការកាត់បន្ថយផ្លូវហោះហើរ និងបញ្ហាបុគ្គលិក ។
កាលពីឆ្នាំ២០២២ ក្រុមហ៊ុនអាកាសចរណ៍ Malaysia Airlines បានទិញយន្តហោះ Airbus A330neo ចំនួន២០គ្រឿង ដើម្បីពង្រីកការហោះហើររបស់ខ្លួន ។ ប៉ុន្តែក្រោយពីយន្តហោះមានបញ្ហាបច្ចេកទេស ក្រុមហ៊ុននេះក៏ប្រកាសផ្អាក ដោយសារគិតពីសុវត្ថិភាពអ្នកដំណើរជាចម្បង ។
Malaysia Airlines គឺជាក្រុមហ៊ុនអាកាសចរណ៍ជាតិរបស់ប្រទេសម៉ាឡេស៊ី ដែលមានមូលដ្ឋានអាកាសចរណ៍សំខាន់នៅអាកាសយានដ្ឋានអន្តរជាតិកូឡាឡាំពួរ និងជាសមាជិកសម្ព័ន្ធអាកាសចរណ៍ពិភពលោក ។ លើសពីនេះ Skytrax បានចាត់ចំណាត់ថ្នាក់ Malaysia Airlines គឺជាក្រុមហ៊ុន១ ក្នុងចំណោមក្រុមហ៊ុនអាកាសចរណ៍កំពូលទាំង៥ ដែលមនុស្សនៅទូទាំងពិភពលោក ស្គាល់ច្រើនបំផុត ៕
