អត្ថប្រយោជន៍សុខភាពដែលមិននឹកស្មានដល់នៃការដើរថយក្រោយ

ក្នុងប៉ុន្មានទសវត្សរ៍ថ្មីៗនេះ វិធីសាស្ត្រដើរថយក្រោយបានទាក់ទាញចំណាប់អារម្មណ៍របស់អ្នកស្រាវជ្រាវមកពីសហរដ្ឋអាមេរិក និងអឺរ៉ុប ជាមធ្យោបាយមួយដើម្បីកែលម្អសមត្ថភាពកីឡា និងបង្កើនកម្លាំងសាច់ដុំ។ ការដើរថយក្រោយដោយមិនងាកក្រោយ គឺជាបច្ចេកទេសបុរាណដែលមានដើមកំណើតនៅប្រទេសចិនរាប់ពាន់ឆ្នាំមុន ដោយគេជឿថាការដើរបែបនេះ នឹងនាំមកនូវអត្ថប្រយោជន៍ជាច្រើនដល់សុខភាព។ បើយោងតាមការសិក្សាការដើរថយក្រោយពិតជានាំមកនូវអត្ថប្រយោជន៍ជាច្រើនមែនដូចជា៖

១.បង្កើនសុខភាពសាច់ដុំ៖ នៅពេលធ្វើចលនាថយក្រោយ រាងកាយនឹងប្រកាន់ជំហរត្រង់ដោយធម្មជាតិ ដែលមានប្រយោជន៍សម្រាប់សុខភាពទូទៅ។ វិធីដើរនេះធ្វើឱ្យសាច់ដុំកំភួនជើង កជើង និងសាច់ដុំជើងរឹងមាំ កាត់បន្ថយកម្លាំងនៃជង្គង់ និងខ្នងខាងក្រោម អាចមានប្រយោជន៍សម្រាប់មនុស្សចាស់ ឬអ្នកដែលមានបញ្ហាឈឺសន្លាក់។

២.ជួយសម្រកទម្ងន់៖ ការដើរថយក្រោយអាចជួយឱ្យអ្នកស្រកទម្ងន់បានលឿនជាងការដើរទៅមុខធម្មតា។ នៅពេលអ្នកដើរថយក្រោយ អ្នកត្រូវប្រឹងប្រែងបន្ថែមទៀតដើម្បីរក្សាតុល្យភាព និងសម្របសម្រួលចលនារបស់អ្នក។ លើសពីនេះ វាក៏ជួយដល់សាច់ដុំដូចជាកំភួនជើង សរសៃពួរ និងបង្កើនការរំលាយអាហារ ជួយក្នុងការសម្រកទម្ងន់យ៉ាងឆាប់រហ័ស។

៣.បង្កើនការចងចាំ៖ ការផ្លាស់ទីក្នុងទិសដៅថយក្រោយអាចជួយធ្វើឱ្យការចងចាំប្រសើរឡើងជាងមុន ការផ្តោតអារម្មណ៍ និងសមត្ថភាពយល់ដឹងផ្សេងទៀតបានខ្ពស់ជាងមុន។ នេះបើយោងតាមការសិក្សាដែលបានចេញផ្សាយនៅក្នុង Behavioral Brain Research Cortex prefrontal បានឱ្យដឹងថា ការដើរថយក្រោយអាចជួយឱ្យខួរក្បាលរបស់អ្នកត្រលប់ទៅអតីតកាលវិញ ហើយរកមើលព្រឹត្តិការណ៍ដែលភ្លេច ឱ្យចាំឡើងវិញបានយ៉ាងឆាប់រហ័សផងដែរ។

៤.ធ្វើឱ្យផ្លូវចិត្តប្រសើរឡើង៖ ប្រសិនបើអ្នកមានបញ្ហាស្ត្រេស ឬតានតឹងក្នុងចិត្ត សូមព្យាយាមដើរថយក្រោយ ព្រោះលំហាត់ប្រាណនេះមិនត្រឹមតែជួយពង្រឹងសុខភាពផ្លូវកាយ និងផ្លូវចិត្តប៉ុណ្ណោះទេ ថែមទាំងជួយឱ្យអ្នកមានអាយុវែងទៀតផង៕