J.Y. Park តារាចម្រៀង ផលិតករ និងជាស្ថាបនិក JYP Entertainment ផលិតក្រុមចម្រៀង TWICE និង Stray Kids បានបរិច្ចាគទ្រព្យសម្បត្តិផ្ទាល់ខ្លួន១ពាន់លានវ៉ុន ប្រមាណ៧០ម៉ឺនដុល្លារដើម្បីរ៉ាប់រងថ្លៃព្យាបាលកុមារ និងក្មេងជំទង់ដែលខ្វះខាត។ នេះជាឆ្នាំទី៣ជាប់ៗគ្នាដែលលោកបានបរិច្ចាគជាមួយទឹកប្រាក់ ពាន់លានជារៀងរាល់ឆ្នាំ ដោយនាំមកនូវការរួមចំណែកសរុបរបស់លោកដល់ទៅ ៣ ពាន់លានវ៉ុនពីឆ្នាំ ២០២២ ដល់ឆ្នាំ ២០២៤ ដែលជាគំរូដ៏ល្អនៃការផ្តល់សប្បុរសធម៌ជាប់លាប់។
ការបរិច្ចាគនេះនឹងត្រូវបានចែកចាយក្នុងចំណោមមន្ទីរពេទ្យក្នុងតំបន់ចំនួន៥ក្នុងប្រទេសកូរ៉េ រួមមានមជ្ឈមណ្ឌលវេជ្ជសាស្ត្រ Yonsei មន្ទីរពេទ្យ Gangneung Asan មន្ទីរពេទ្យសាកលវិទ្យាល័យជាតិ Chilgok Kyungpook មន្ទីរពេទ្យ Busan Paik និងមន្ទីរពេទ្យសាកលវិទ្យាល័យជាតិ Jeju ។ ថវិកានឹងត្រូវប្រើសម្រាប់ជួយព្យាបាលនិងការស្តារនីតិសម្បទាដល់កុមារដែលមានជំងឺធ្ងន់ធ្ងរ និងកម្រ។
ពិធីបរិច្ចាគមួយត្រូវបានធ្វើឡើងនៅថ្ងៃទី១០ ខែធ្នូ នៅទីស្នាក់ការកណ្តាលរបស់ JYP Entertainment ក្នុងទីក្រុងសេអ៊ូល ដោយមានការចូលរួមពី J.Y. Park និងអ្នកតំណាងមកពីមន្ទីរពេទ្យអ្នកទទួល។ សប្បុរសធម៌ជាប់លាប់របស់ J.Y. Park បានបង្ហាញពីស្មារតីនៃកាតព្វកិច្ចដ៏ថ្លៃថ្នូ។ នៅឆ្នាំ ២០២២ លោកបានបរិច្ចាគថវិកាចំនួន ១០ ពាន់លានវ៉ុន ដើម្បីជួយដល់ការវះកាត់ និងការព្យាបាលកុមារដែលមានជំងឺពីកំណើត និងកម្រ តាមរយៈមន្ទីរពេទ្យ Samsung Seoul Hospital និងអង្គការទស្សនៈពិភពលោកអន្តរជាតិ។ 
នៅឆ្នាំ២០២៣ លោកបានបរិច្ចាគថវិកាចំនួន ១០ ពាន់លានវ៉ុនបន្ថែមទៀតដល់មន្ទីរពេទ្យ រួមទាំងមជ្ឈមណ្ឌលវេជ្ជសាស្ត្រ Seoul Asan និងមន្ទីរពេទ្យសាកលវិទ្យាល័យជាតិ Chonnam ។ កិច្ចខិតខំប្រឹងប្រែងរបស់លោកបានជួយកុមារជាង ២៧៦ នាក់នៅទូទាំងប្រទេសកូរ៉េ វៀតណាម ឥណ្ឌូនេស៊ី និងហ្វីលីពីន និងកម្ពុជាផងដែរ។
លើសពីការរួមចំណែកផ្ទាល់ខ្លួន J.Y. Park បានដឹកនាំគំនិតផ្តួចផ្តើមទំនួលខុសត្រូវសង្គមសាជីវកម្ម (CSR) ជាច្រើនតាមរយៈ JYP Entertainment ។ ក្រោមប្រធានបទ «ក្តីសុបិនគ្រប់បែបយ៉ាង» យុទ្ធនាការ (EDM) ក្រុមហ៊ុនដំណើរការកម្មវិធីដូចជាគម្រោងជំនួយផ្នែកវេជ្ជសាស្រ្ត EDM និងគម្រោងការបំពេញបំណង EDM ដែលមានគោលបំណងផ្តល់ការគាំទ្រផ្នែកហិរញ្ញវត្ថុ និងផ្លូវចិត្តដល់កុមារដែលមានជំងឺធ្ងន់ធ្ងរ។ ក្នុងឆ្នាំ ២០២៣ JYP បានបរិច្ចាគ ប្រហែល ៨០ម៉ឺនដុល្លារដើម្បីផ្គត់ផ្គង់កុមារ ១,៧០៦ នាក់នៅទូទាំងពិភពលោក។
នៅក្នុងខែធ្នូ ទស្សនាវដ្តី TIME បានចាត់ចំណាត់ថ្នាក់ JYP ទីបីជាសាកល និងទីមួយនៅក្នុងប្រទេសកូរ៉េ ក្នុងចំណោម «ក្រុមហ៊ុនល្អបំផុតរបស់ពិភពលោកសម្រាប់កំណើនប្រកបដោយចីរភាពឆ្នាំ ២០២៥»៕
