នៅលើបណ្តាញសង្គមថ្មីៗនេះ ផ្ទុះនូវការចែករំលែកជាច្រើនទាក់ទងជាមួយនឹងខ្សែភាពយន្តខ្មែរមួយ ក្រោមចំណងជើងថា «កូនប្រសារស្រី» ជាស្នាដៃនិពន្ធរបស់អ្នកស្រី ពាន់ ភួងបុប្ផា។
ភាពល្បីល្បាញនៃខ្សែភាពយន្តនេះជាថ្មីម្តងទៀត ក្រោយពីអ្នកស្រី ពាន់ ភួងបុប្ផាបានយកសាច់រឿងនេះមកបង្ហោះនៅលើ Channel YouTube ផ្លូវការរបស់គាត់កាលពីអំឡុងប៉ុន្មានថ្ងៃមុននេះ។ ជាក់ស្តែង រឿង«កូនប្រសារស្រី» នេះគឺបានចាក់បញ្ចាំងតាំងពីឆ្នាំ ២០០៦ មកម្លេះ។ 
យ៉ាងណាមិញ តាមរយៈសាច់រឿងដែលឆ្លុះបញ្ចាំងពីជីវិតកូនប្រសារស្រីដ៏កម្សត់ ដែលសម្តែងដោយតារាស្រី នី មុល្លីកា (ជាតួអង្គនាង សុភា) បានធ្វើឲ្យទស្សនិកជនដែលទស្សនារឿងនេះហើយ ទប់ទឹកភ្នែកមិនជាប់ ព្រោះតែអាណិតតួឯកស្រីជាពន់ពេក រហូតដល់មានការវិភាគនិងវែកញែកព្រោងព្រាត។
ទោះជាយ៉ាងណា ថ្មីៗនេះ តាមរយៈគណនីហ្វេសប៊ុក លោកជំទាវ ឡងឌី សាន់ណារ៉ា រដ្ឋលេខាធិការក្រសួងវប្បធម៌ និង វិចិត្រសិល្បៈបានបង្ហោះសារមួយឃ្លាថា«រឿងកូនប្រសាស្រីដែលកំពុងល្បីនេះ គឺជារឿងពិតរបស់លោកជំទាវឧកញ៉ាមួយរូប ដែលជាម្ចាស់ក្រុមហ៊ុនដ៏ធំមួយនៅស្រុកយើង ។ អ្នកនិពន្ធយកមកផ្សំឱ្យចេញជាសាច់រឿង តែក្នុងនោះរឿងពិតស្ទើរតែ ៨០%ហើយ»។
លោកជំទាវ ឡងឌី សាន់ណារ៉ា បានមានប្រសាសន៍ថា៖ «ក្រោយរឿង កូនប្រសារស្រី មានការគាំទ្រសាជាថ្មី តើបងប្អូនមានដឹងដែរទេថា នេះជាប្រវត្តិខ្សែជីវិតពិតរបស់ លោកជំទាវ លឹម ឈីវហូ ដែលជាម្ចាស់ស្ថាបនិកក្រុមហ៊ុនដ៏ធំ នៅប្រទេសកម្ពុជា គឺក្រុមហ៊ុន Attwood ដែលមាន ខ្ទង់ពាន់លានដុល្លារ ដោយក្នុងរឿងនោះបានរៀបរាប់ពី ជីវិតពិតរបស់លោកជំទាវ ដែលសម្តែងដោយអ្នកនាង មុល្លីកា ដឹកនាំនិងនិពន្ធដោយអ្នកស្រី ពាន់ ភួងបុប្ផា»៕
