នាថ្ងៃសៅរ៍ អាទិត្យ ចុងសប្តាហ៍នេះ ទស្សនីយភាពមហោស្រពល្ខោនស្រមោលស្បែកតូច នឹងលេចឡើងជាថ្មីម្តងទៀតនៅឯផ្សារទំនើបអ៊ីអនម៉លមានជ័យ ឬផ្សារអ៊ីអន ៣ ដែលបងប្អូនប្រជាពលរដ្ឋខ្មែរទាំងអស់រួមទាំងជនបរទេសអាចមកចូលរូមទស្សនាបានដោយសេរី។
យោងតាមការដាក់បង្ហោះរបស់គេហទំព័រផ្សារទំនើប AEON MALL MEAN CHEY បានឲ្យដឹងថា «ទស្សនីយភាព មហោស្រពល្ខោនស្រមោលស្បែកតូច ដែលដឹកនាំសម្តែងដោយ ព្រឹទ្ធាចារ្យចម្មការភិរក្ស ជៀនសុផាន មត៌កមនុស្សរស់ បានមកដល់ជាថ្មីម្ដងទៀត នៅចុងសប្ដាហ៍នេះ! ចូលរួមទស្សនាដោយសេរី នូវការសម្ដែង ល្ខោនស្រមោលស្បែកតូច រួមនឹងសកម្មភាពផ្សេងៗជាច្រើន រយៈពេល ២ ថ្ងៃ ដែលត្រូវនឹងថ្ងៃទី ២ និងទី៣ ខែវិច្ឆិកាខាងមុខនេះ»។
ការសម្តែងល្ខោនស្រមោលស្បែកតូច នឹងលើកយកមកសម្តែង រយៈពេល ២ ថ្ងៃនេះ រួមមាន៖
– ថ្ងៃទី ២ វិច្ឆិកា – រឿងព្រះចន្ទគោរព (វេលាម៉ោង ២ រសៀល និង ៥ ល្ងាច)
-ថ្ងៃទី ៣ វិច្ឆិកា – រឿងព្រះជិនវង្ស (វេលាម៉ោង ២ រសៀល និង ៥ ល្ងាច)។
សូមជម្រាបថា នេះមិនមែនជាលើកទី១ទេ ដែលផ្សារទំនើបផ្សារអ៊ីអន ៣ បានលើកយកទម្រង់ល្ខោន ដែលសិល្បៈវប្បធម៌ខ្មែរ មកសម្តែងជូនទស្សនិកជនទស្សនា ដែលនាពេលកន្លងមក ស្ទើរតែជារៀងរាល់ចុងសប្តាហ៍ ក៏មានការសម្តែងល្ខោនជាហូរហែរផងដែរ តួយ៉ាងដូចជាល្ខោនបាសាក់វង់ភី សុគន្ធី ល្ខោនខោល និងល្ខោនយីកេជាដើម ហើយក៏ទទួលបាននូវការគាំទ្រយ៉ាងច្រើនកុះករ។
ដោយសង្កេតឃើញថា ប្រជាពលរដ្ឋខ្មែរ មានទាំងក្មេងចាស់ ប្រុសស្រី បានបបួលគ្នាមកក្រាលកន្ទេល អង្គុយមើលល្ខោន នៅក្នុងផ្សារទំនើបដ៏មានផាសុខភាពបំផុត។ ជាមួយគ្នានោះ អ្នកដែលបានមកទស្សនាហើយ សុទ្ធតែបានចូលទៅបញ្ចេញមតិនៅលើបណ្តាញសង្គម ដោយការពេញចិត្តនិងការកោតសរសើរព្រោងព្រាតផងដែរ។
គួរបញ្ជាក់ថា ផ្សារទំនើបអ៊ីអនម៉លមានជ័យ បានបើកដំណើរការសាកល្បងជាផ្លូវការអំឡុងខែធ្នូ ឆ្នាំ ២០២២ ដែលមានទីតាំងស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ភាគខាងត្បូងនៃរាជធានីភ្នំពេញ៕
