ប្រផ្នូលមិនល្អទៀតហើយ ! ត្រីងា.ប់ នៅឆ្នេរសមុទ្រប្រទេសថៃរហូតដល់ជាង៣គីឡូម៉ែត្រ

ប្រទេសថៃ ៖ វាបានធ្វើឱ្យពលរដ្ឋថៃស្រឡាំងកាំងយ៉ាងខ្លាំង ក្រោយពេលពួកគេឃើញត្រីងា.ប់ នៅឆ្នេរសមុទ្រប៉ាតងមានប្រវែងជាង៣គីឡូម៉ែត្រ ដោយគ្មានមូលហេតុ ។ អ្នកនេសាទក្នុងតំបន់បានជួយគ្នាប្រមូលត្រីទាំងនេះ និងសម្អាតបរិវេណឆ្នេរសមុទ្រ ខណៈមតិមួយចំនួនលើកឡើងថា តើវាជាប្រផ្នូលមិនល្អឬយ៉ាងណា ឬធម្មជាតិចង់ប្រាប់ថា នឹងមានហេតុការណ៍អ្វីកើតឡើង?

កាលពីព្រឹកថ្ងៃទី១១ ខែតុលា ឆ្នាំ២០២៤ សារព័ត៌មានថៃរាយការណ៍ថា នៅបរិវេណឆ្នេរសមុទ្រប៉ាតង ស្ថិតក្នុងឃុំប៉ាតង ស្រុកកាក់ធូ ខេត្តភូកេត មានត្រីងាប់ជាច្រើនក្បាលនៅលើឆ្នេរសមុទ្រ ។ ហេតុនេះ អាជ្ញាធរក៏បានទៅត្រួតពិនិត្យនៅឆ្នេរនេះឃើញថា ត្រីជាច្រើនក្បាល និងច្រើនពូជត្រូវបានទឹករលកបោកបក់មកលើខ្សាច់ជាច្រើនគីឡូម៉ែត្រ ប៉ុន្តែមិនដឹងថា មកពីមូលហេតុអ្វីទេ ។

អ្នកស្រុកដែលដើរប្រមូលត្រីងាប់លើឆ្នេរខ្សាច់និយាយថា ពួកគេប្រមូលត្រីទាំងនេះយកទៅធ្វើម្ហូបទុកបរិភោគតាមធម្មតា តាំងពីថ្ងៃទី៩ ខែតុលា មកម៉្លេះ និងពុំបារម្ភពីគ្រោះថ្នាក់អ្វីទេ ។ ពួកគេសង្កេតឃើញថា ចំនួនត្រីងាប់លើឆ្នេរខ្សាច់បានកាន់តែច្រើនឡើងៗ រហូតដល់ប្រមូលលែងអស់ ហើយអ្នកនេសាទបានជួយគ្នាសម្អាតឆ្នេរ ។

អ្នកស្រុកម្នាក់ប្រាប់ថា ហេតុការណ៍បែបនេះបានកើតឡើងជារៀងរាល់ឆ្នាំ ហើយនៅឆ្នាំ២០២៤ ទឹកសមុទ្របានបោកបក់ត្រីឡើងលើឆ្នេរខ្សាច់ ដែលមានប្រវែងរហូតដល់ជាង៣គីឡូម៉ែត្រ ។ ប៉ុន្តែអ្នកខ្លះទៀតបារម្ភថា វាអាចជាប្រផ្នូលមិនល្អសម្រាប់ប្រទេសថៃ ពីព្រោះថៃទើបតែឃើញសត្វចម្លែកនៅឆ្នេរសមុទ្រខេត្តប្រាជួបស៊ិរិខាន់ ហើយពេលនេះ ស្រាប់តែមានត្រីងាប់មិនដឹងមូលហេតុនៅខេត្តភូកេត ។

គួរបញ្ជាក់ថា កាលពីដើមខែតុលា ឆ្នាំ២០២៤ ប្រទេសថៃបានប្រទះឃើញសត្វចម្លែកយ៉ាងច្រើននៅឆ្នេរសមុទ្រប្រានបុរី ស្ថិតនៅឃុំប៉ាកណាមប្រាន ស្រុកប្រានបុរី ខេត្តប្រាជួបស៊ិរិខាន់ ដែលសត្វចម្លែកនេះមានរូបរាងដូចម្ជុល និងមានដងខ្លួនថ្លាៗ ។ អាជ្ញាធរបានប្រកាសឱ្យពលរដ្ឋថៃ និងភ្ញៀវទេសចរទាំងអស់ប្រុងប្រយ័ត្នពេលចុះលេងទឹកសមុទ្រ ពីព្រោះអាចនឹងមានគ្រោះថ្នាក់ ដោយសារសត្វទាំងនេះតោងជាប់សម្លៀកបំពាក់ និងចាក់ទម្លុះចូលសាច់ ៕