សត្វមូស គឺជាបញ្ហាមួយដែលយើងកម្ចា.ត់ ពុំចេះអស់ ហើយក្រៅពីខាំមនុស្ស វាថែមទាំងជាភ្នាក់ងារចម្លងមេរោគជាច្រើន ដូចជា ៖ ម៉ាឡារៀ, ជំងឺគ្រុនឈាម និងជំងឺស៊ីកា ។ បើទោះជាយើងបានប្រើប្រាស់វិធីនានាដើម្បីកម្ចា.ត់ មូសក្តី ប៉ុន្តែវានៅតែរំខានដដែល ។ សំណាងល្អ ដែលធម្មជាតិមានវិធីដោះស្រាយបញ្ហាងាយៗ ហើយមានប្រសិទ្ធភាព គឺកន្ទុំរុយ ។
តើលោកអ្នកជឿទេថា កន្ទុំរុយ១ក្បាល អាចស៊ីមូសរាប់រយក្បាលក្នុង១ថ្ងៃ? វាជាវិធីកម្ចាត់មូសយ៉ាងមានប្រសិទ្ធភាព តាមរយៈការទាក់ទាញកន្ទុំរុយមកសួនដំណាំ ឬសួនច្បារ នឹងអាចជួយកាត់បន្ថយចំនួនរុយយ៉ាងច្រើននៅជុំវិញផ្ទះ ខណៈកន្ទុំរុយចាត់ទុកថា សួនដំណាំជាឋានសួគ៌របស់វា ។ ហេតុអ្វីកន្ទុំរុយក្លាយជាសត្វស៊ីមូសច្រើនបំផុត?
កន្ទុំរុយ មិនត្រឹមតែមានរូបរាងស្រស់ស្អាតប៉ុណ្ណោះទេ ប៉ុន្តែពួកវាជាអ្នកប្រមាញ់មូសយ៉ាងពូកែទៀតផង ។ កន្ទុំរុយពេញវ័យអាចស៊ីមូសរាប់រយក្បាលក្នុង១ថ្ងៃ ហើយវិធីកម្ចាត់មូសរបស់វា គឺគ្មានសត្វផ្សេងទៀតអាចប្រជែងឈ្នះទេ ដោយសារកន្ទុំរុយហើរលឿន និងជាសត្វសាហាវសម្រាប់មូស ។ ហេតុនេះ ទើបកន្ទុំរុយក្លាយជាសត្វគ្រប់គ្រងចំនួនមូសតាមធម្មជាតិ ។
បើធុញទ្រាន់នឹងការប្រើប្រាស់ថ្នាំបាញ់មូសដែលពោរពេញដោយសារធាតុគីមី និងស្វែងរកវិធីកម្ចាត់មូសតាមធម្មជាតិ យើងអាចរៀបចំបរិវេណជុំវិញផ្ទះដើម្បីទាក់ទាញកន្ទុំរុយ ដូចជា ៖
១-ធ្វើស្រះទឹក ៖ បើផ្ទះយើងមានអណ្តូង ឬស្រះទឹក នឹងអាចទាក់ទាញកន្ទុំរុយ ដោយសារវាតែងតែពងដាក់ទឹក ហើយស្រះទឹកពុំចាំបាច់មានទំហំធំពេកទេ
២-រុក្ខជាតិ ៖ គួរតែដាំរុក្ខជាតិផ្សេងៗនៅបរិវេណជុំវិញស្រះទឹក ដូចជា ស្មៅ, ផ្កា ពីព្រោះរុក្ខជាតិទាំងនេះអាចឱ្យកន្ទុំរុយស្នាក់នៅ និងកម្ចាត់មូស ។ ក្រៅពីនេះ រុក្ខជាតិនឹងទាក់ទាញសត្វល្អិតតូចៗដើម្បីឱ្យកន្ទុំរុយស៊ីជាអាហារទៀតផង
៣-ចៀសវាងការប្រើប្រាស់ថ្នាំកម្ចាត់សត្វល្អិត ៖ ថ្នាំកម្ចាត់សត្វល្អិត នឹងបង្កគ្រោះថ្នាក់ដល់កន្ទុំរុយ ទើបយើងគួរចៀសវាងការប្រើថ្នាំគីមីកម្ចាត់ស្មៅគ្រប់ប្រភេទក្នុងសួន
៤-តម្រៀបដុំថ្មជុំវិញស្រះទឹក ៖ កន្ទុំរុយចូលចិត្តគេចពីកំដៅថ្ងៃ ហើយការតម្រៀបដុំថ្មជុំវិញស្រះទឹកនឹងជួយទាក់ទាញកន្ទុំរុយមករស់នៅក្នុងសួន
៥-ទឹកស្អាត ៖ កន្ទុំរុយត្រូវការទឹកស្អាតដើម្បីឱ្យកូនៗរបស់វាឆាប់ធំ ។ ដូច្នេះ យើងត្រូវពិនិត្យទឹកក្នុងស្រះកុំឱ្យមានជាតិពុល ។
បើអនុវត្តតាមវិធីទាំង៥នេះធានាថា សួនដំណាំ ឬសួនច្បាររបស់យើងនឹងទាក់ទាញកន្ទុំរុយយ៉ាងច្រើនមករស់នៅ ព្រមទាំងកាត់បន្ថយមូសតាមធម្មជាតិទៀតផង ។ លើសពីនេះ យើងក៏អាចគយគន់កន្ទុំរុយដ៏ស្រស់ស្អាតនៅជុំវិញផ្ទះផងដែរ ៕
