ឆ្នាំ២០២៥ អ្នកគាំទ្រនឹងបានឃើញការសម្តែងដ៏អស្ចារ្យរបស់ Jisoo ក្នុងរឿងប្រភេទ Zombie

នៅថ្ងៃទី១ ខែសីហា សេវាកម្មស្ទ្រីមកម្សាន្តបានចេញផ្សាយខ្សែភាពយន្តថ្មីពីរឿង Newtopia ជាប្រភេទរឿង Zombie ដែលសម្តែងដោយ Jisoo សមាជិកក្រុម BLACKPINK ជាមួយនឹងតារាប្រុស Park Jung-min ដែលអ្នកទាំងពីរគឺជាគូស្នេហ៍នៅក្នុងរឿងនេះ។ អ្នកគាំទ្រកំពុងរង់ចាំយ៉ាងអន្ទះសារចំពោះស្នាដៃថ្មីដ៏អស្ចារ្យរបស់ Jisoo ក្នុងការសម្តែងរឿងប្រភេទ Zombie ជាលើកដំបូង។

សាច់រឿងនេះបាននិយាយអំពីទាហានម្នាក់ឈ្មោះ Jae-yun សម្តែងដោយ Park Jung-min និងមិត្តស្រីរបស់ខ្លួនមានឈ្មោះ Young-joo សម្តែងដោយ Jisoo ដែលរត់រកគ្នាទៅវិញទៅមកតាមដងផ្លូវដែលមាន Zombie វាយប្រហារក្នុងទីក្រុងសេអ៊ូល។ តារាសម្តែង Park Jung-min ត្រូវបានទស្សនិកជនស្គាល់ក្នុងខ្សែភាពយន្ត Start-Upនិងរឿងជាច្រើនទៀត។ រឿងថ្មីដែលត្រៀមចាក់បញ្ចាំងនៅឆ្នាំក្រោយគឺលោកសម្តែងជាតួអង្គជាទាហានដែលមានអារម្មណ៍ថប់បារម្ភអំពីអនាគត។

ចំណែកឯ Jisoo វិញបានធ្វើឱ្យមានភាពភ្ញាក់ផ្អើលជាមួយនឹងតួនាទីរបស់នាងក្នុងរឿង Snowdrop ហើយក៏គ្រោងនឹងបង្ហាញខ្លួនក្នុងរឿងថ្មីនេះនឹងសម្ដែងជា Young-joo មិត្តស្រីរបស់ Jae-yun និងបុគ្គលិកថ្មីដែលមានប្រវត្តិខាងវិស្វកម្ម។

អ្នកទាំងពីរនឹងបង្ហាញពីគូស្នេហ៍ដែលកំពុងតែរកគ្នាទៅវិញទៅមកចំពេលគ្រោះថ្នាក់ដែលពោរពេញទៅដោយ Zombie នៅទីក្រុងសេអ៊ូល ។ រូបភាពដែលបានចេញផ្សាយបង្ហាញថា តួឯកប្រុសកំពុងប្រឈមមុខនឹងវិបត្តិ Zombie កំឡុងពេលបំពេញកាតព្វកិច្ចយោធាជាមួយនឹងការបញ្ចេញទឹកមុខដ៏តានតឹង និងតក់ស្លុតដែលធ្វើឱ្យមានការទាក់ទាញចំណាប់ អារម្មណ៍យ៉ាងខ្លាំងពីទស្សនិកជននិងរង់ចាំយ៉ាងអន្ទះសារចង់ឃើញបន្ថែមទៀតអំពីរឿងនេះ។

រឿងនេះដឹកនាំការសម្តែងដោយលោក Yoon Sung-hyun ដែលមានឥទ្ធិពលយ៉ាងខ្លាំងជាមួយខ្សែភាពយន្តដំបូងរបស់លោកមានចំណងជើងថា The Guard ។ នេះជាការសហការលើកទី៣របស់លោកជាមួយតារាសម្តែង Park Jung-min ។ រឿងថ្មីរបស់ Jisoo និពន្ធដោយ Han Jin-won ដែលបានឈ្នះពានរង្វាន់ Academy សម្រាប់រឿងភាគដើមល្អបំផុតមានចំណងជើង Parasite៕