នៅថ្ងៃទី២៣ ខែកក្កដា ឆ្នាំ២០២៤ វេលាម៉ោងប្រមាណ៥:៣០នាទីល្ងាច មានឧបទ្ទវហេតុនូវការដួលរលំដើមឈើមួយដើម នៅខាងមុខខ្លោងទ្វារទន្លេអុំ នៃក្រុងអង្គរធំ បានសង្កត់ទៅលើមនុស្ស៣នាក់។
នៅក្នុងចំណោម៣នាក់នោះ មានម្នាក់បានបាត់បង់ជីវិត និង២នាក់ទៀតរងបួស ខណៈពួកគាត់កំពុងធ្វើដំណើរតាមដងផ្លូវ ឆ្លងកាត់តាមប្រាសាទ ទៅទន្លេអ៊ុំ ស្ថិតនៅតាមបណ្តោយផ្លូវ ស្ពានទន្លេអ៊ុំ ឆ្លងកាត់ចូលប្រាសាទបាយ័ន ក្នុងភូមិត្រពាំងសេះ សង្កាត់គោកចក ក្រុងខេត្តសៀមរាប។
បច្ចុប្បន្ន ដើមឈើដែលបានដួលរលំនេះ ត្រូវបានអាជ្ញាធរជាតិអប្សរា ដកចេញពីផ្លូវរួចរាល់ហើយ ដោយបងប្អូនពលរដ្ឋអាចធ្វើដំណើរបានធម្មតាវិញ។
ដោយឡែកសាកសពជនរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារ យកទៅធ្វើបុណ្យតាមប្រពៃណី រីឯជនរងគ្រោះ ដែលរបួសធ្ងន់ត្រូវបញ្ជូនទៅសង្គ្រោះ នៅមន្ទីរពេទ្យបង្អែកខេត្តសៀមរាប៕
