ក្មេងប្រុសដ៏កម្សត់ម្នាក់ដែលត្រូវឪពុករត់ចោលតាំងពីតូចរស់នៅជាមួយជីដូនដើរសុំទាននិងម្តាយដើរលាងចានដើម្បីចិញ្ចឹមក្រពះធ្វើឱ្យមហាជនអាណិតអាសូរជាពន់ពេក។ បន្ទាប់ពីវីដេអូបានសាយភាយកុមារ ញ៉ ឆានីត ត្រូវបានសប្បុរសជនចូលរួមឧបត្ថម្ភជាបន្តបន្ទាប់ ខណៈបន្ទាប់ពីតារាចម្រៀង ជី ដេវីត ប្រកាសឧបត្ថម្ភ២០០ដុល្លារក្នុងមួយខែរយៈពេលពេញមួយឆ្នាំពេលនេះកុមាររូបនេះទទួលបានក្តីសន្តោសពីតារាចម្រៀង ខេម ដូចគ្នាប្រកាសឧបត្ថម្ភពេញ១ឆ្នាំផងដែរ។
ព្រឹកថ្ងៃទី៥ កក្កដា តារាចម្រៀង ខេម បានបង្ហោះរូបកុមារ ញ៉ ឆានីត ដោយបានប្រកាសថា «ឃើញការលំបាកក្មួយពូនឹកឃើញអតីតកាលពូដែរ ខ្ញុំមានការអាណិតក្មួយណាស់ ពូនឹងឧបត្ថម្ភក្មួយសម្រាប់ការរៀនសូត្រនិងជីវភាព ១០០$មួយខែ ក្នុងរយៈពេលមួយឆ្នាំ សូមក្មួយទំនាក់ទំនងមកផេកផ្លូវការដែលបងបានបង្ហោះនេះបាន»។ ក្រៅពីទឹកចិត្តរបស់ ខេម ក៏មានសប្បុរសជននានាប្រកាសជួយកុមារកម្សត់ ញ៉ ឆានីត ផងដែរ។
មុនការប្រកាសរបស់តារាចម្រៀងសំឡេងស្អក ខេម ជួយឧបត្ថម្ភកុមារ ញ៉ ឆានីត ចំនួន១០០ដុល្លារក្នុងមួយខែរយៈពេលពេញមួយឆ្នាំ តារាចម្រៀងរ៉េប ជី ដេវីត ក៏បានប្រកាសជួយឧបត្ថម្ភនូវទឹកប្រាក់២០០ដុល្លារក្នុងមួយខែរយៈពេលពេញមួយឆ្នាំ ខណៈឧបត្ថម្ភខែដំបូងរបស់ ជី ដេវីត ត្រូវបានឧបត្ថម្ភរួចរាល់តាមរយៈកុងធនាគាររបស់អ្នកគ្រូ ធីតា ដែលជាគ្រូទទួលបន្ទុកថ្នាក់ក្មេងប្រុសរូបនេះ។
គួរបញ្ជាក់ថា តាមរយៈវីដេអូនោះដែលបង្ហោះដោយអ្នកគ្រូ ធីតា ក្មេងប្រុសនោះបាននិយាយថារស់នៅក្នុងជីវភាពខ្វះខាតត្រូវឪពុករត់ចោលតាំងពីតូចរស់នៅជាមួយជីដូនគាត់ដើរសុំទានគេ និងម្តាយដើរលាងចានឱ្យគេហើយក្មេងប្រុសនេះដើរតាមលោកសង្ឃ។ ក្មេងប្រុសរូបនេះនិយាយប្រាប់អ្នកគ្រូដោយទឹកភ្នែករលីញរលោងព្រោះតែឃើញម្តាយមានជីវភាពលំបាក ពេលខ្លះហូបបាយជាមួយតាសក់ចាវដែលគេឱ្យ ខណៈរស់នៅផ្ទះជួលក្នុងមួយខែ៨០០០០រៀល។ តាមការបង្ហោះរបស់អ្នកគ្រូ ធីតា កុមារ ញ៉ ឆានីត រស់នៅភូមិត្រពាំងឈូក ឃុំមេសរជ្រៃស្រុកស្ទឹងត្រង់ ខេត្តកំពង់ចាម។
ក្រោយពីមហាជនបានទស្សនាវីដេអូរបស់ក្មេងប្រុសរូបនេះហើយធ្វើឱ្យមហាជនរំជួលចិត្តអាណិតក្មេងប្រុសរូបនេះយ៉ាងខ្លាំង ខណៈក៏មានសប្បុរសជនចង់ជួយឧបត្ថម្ភដល់ក្មេងប្រុសរូបនេះជាបន្តបន្ទាប់ដើម្បីជួយសម្រួលជីវភាពការរស់នៅរបស់ក្មេងប្រុសរូបនេះផងដែរ៕
