ប្រទេសឡាវ ៖ រដ្ឋាភិបាលឡាវគ្រោងអនុវត្តគោលនយោបាយលើកលែងទិដ្ឋាការឱ្យភ្ញៀវទេសចរចិន ដើម្បីជំរុញវិស័យទេសចរណ៍ឡាវនៅឆមាសទី២ ឆ្នាំ២០២៤ ដែលគម្រោងនេះឈ្មោះថា «Visit Laos Year 2024» ។ រដ្ឋាភិបាលឡាវបញ្ជាក់ថា នៅចុងខែមិថុនា ឆ្នាំ២០២៤ នឹងមានការបញ្ជាក់ច្បាស់លាស់ពីគោលនយោបាយនេះ ។ នេះបើតាមសារព័ត៌មានស៊ីនហួរបានរាយការណ៍ កាលពីថ្ងៃទី២៦ ខែមិថុនា ឆ្នាំ២០២៤ ។
លោកស្រី ដារ៉ានី ភូមម៉ាវង់សា (Darani Phommawongsa) រដ្ឋមន្ត្រីក្រសួងព័ត៌មាន វប្បធម៌ និងទេសចរណ៍ឡាវ បានថ្លែងថា គោលនយោបាយលើកលែងទិដ្ឋាការនេះ គឺផ្តោតសំខាន់ទៅលើភ្ញៀវទេសចរចិន ដែលធ្វើដំណើរមកឡាវតាមរយៈក្រុមហ៊ុនទេសចរណ៍ ។ លើសពីនេះ រដ្ឋាភិបាលឡាវក៏មានគម្រោងផ្តល់សេវាទិដ្ឋាការសម្រាប់ការចេញ-ចូលឡាវច្រើនលើក ព្រមទាំងពន្យារពេលស្នាក់នៅសម្រាប់ភ្ញៀវទេសចរបរទេស គឺចាប់ពី៣០ថ្ងៃ ទៅដល់៦០ថ្ងៃ ។
លោកស្រី ដារ៉ានី ភូមម៉ាវង់សា ថ្លែងថា ៖ «ឆ្នាំ២០២៤ គឺជាអំឡុងពេលដែលប្រទេសឡាវខិតខំលើកកម្ពស់វិស័យទេសចរណ៍ ហើយយើងសង្ឃឹមថា ចំនួនភ្ញៀវទេសចរបរទេសនៅឆ្នាំនេះ នឹងកើនឡើងលើសឆ្នាំ២០២៣» ។
បច្ចុប្បន្ន រដ្ឋាភិបាលឡាវប្រឹងប្រែងកែលម្អហេដ្ឋារចនាសម្ព័ន្ធក្នុងតំបន់ និងជួសជុលផ្លូវធ្វើដំណើរទៅកាន់តំបន់ទេសចរណ៍ពេញនិយមជាច្រើនកន្លែង ដើម្បីទាក់ទាញចំណាប់អារម្មណ៍ និងបង្កលក្ខណៈងាយស្រួលក្នុងការធ្វើដំណើរកម្សាន្តរបស់ភ្ញៀវទេសចរ ។
ជាមួយគ្នានេះ ក្រសួងទេសចរណ៍ឡាវបានពង្រឹងកិច្ចសហការការងារជាមួយមន្ត្រីថ្នាក់ខេត្ត ព្រមទាំងស្ថាប័នពាក់ព័ន្ធនឹងវិស័យទេសចរណ៍នៅតាមបណ្តោយផ្លូវរថភ្លើងចិន-ឡាវ ដើម្បីកែលម្អតំបន់ទេសចរណ៍នានាឱ្យមានលក្ខណៈស្តង់ដារ ។ ក្រសួងទេសចរណ៍ឡាវក៏បានស្នើឱ្យមានការដាក់ស្លាកសញ្ញាបង្ហាញពីតំបន់ទេសចរណ៍ល្បីៗនៅតាមដងផ្លូវផងដែរ ។
លើសពីនេះ ក្រសួងទេសចរណ៍ឡាវបានសហការជាមួយវិនិយោគិនផ្នែកឯកជនដើម្បីធ្វើការស្រាវជ្រាវ និងអភិវឌ្ឍន៍តំបន់ទេសចរណ៍ ព្រមទាំងផ្តល់លក្ខណៈងាយស្រួលបន្ថែមទៀតសម្រាប់ទទួលភ្ញៀវទេសចរបរទេសដែលនឹងកើនឡើងនាថ្ងៃអនាគត ។
គួរបញ្ជាក់ថា កាលពីឆ្នាំ២០២៣ ភ្ញៀវទេសចរចិនបានធ្វើដំណើរមកប្រទេសឡាវស្មើជាង៦សែននាក់ និងស្ថិតក្នុងលំដាប់ទី៣ ហើយរដ្ឋាភិបាលឡាវសង្ឃឹមថា ចំនួនភ្ញៀវទេសចរចិននឹងកើនឡើងរហូតដល់៨សែននាក់ នៅឆ្នាំ២០២៤ ៕
