ប្រិយមិត្តមួយចំនួនជ្រាបមកហើយថាបវរកញ្ញា រឿន ណាត និងបុរសសង្ហា លាវ វេងហួរ បង្ហាញពីទំនាក់ទំនងស្នេហាកាលពីកន្លងមកនេះមានការចូលរួមអបអរសាទរយ៉ាងច្រើនពីអ្នកគាំទ្រ។ ថ្មីៗនេះអ្នកទាំងពីរបានបង្ហាញវត្តមានជាគូក្នុងកម្មវិធីមួយដោយបញ្ជាក់ចេញពីមាត់ថាពួកគេពិតជាទាក់ទងគ្នាជាសង្សារពិតប្រាកដមែន ខណៈបានបង្ហើបថាអ្នកទាំងពីរមានអារម្មណ៍ចំពោះគ្នាទៅវិញទៅមកតាំងពីថ្ងៃជួបដំបូង និងបានណាត់ជួបគ្នានៅក្នុងថ្ងៃបុណ្យនៃសេចក្តីស្រលាញ់។
ក្នុងកម្មវិធី 3fun ដែលបានចាក់ផ្សាយកាលពីយប់ថ្ងៃទី៧ មិថុនា កញ្ញា រឿន ណាត បវរកញ្ញាចក្រវាលកម្ពុជាឆ្នាំ២០១៨ និងបុរសឯក លាវ វេងហួរ Mister Friendship International 2023 បានចូលរួមផ្តល់បទសម្ភាសជាមួយគ្នាលើកដំបូងបន្ទាប់ពីមានទំនាក់ទំនងស្នេហា។ អ្នកទាំងពីរបានប្រាប់ទស្សនិកជនអំពីការចាប់ផ្តើមរបស់ពួកគេដែលធ្វើឱ្យអ្នកគាំទ្រញញឹមបិទមាត់មិនជិត។
រឿន ណាត និង លាវ វេងហួរ បានទម្លាយថាអ្នកទាំងពីរបានជួបគ្នាដំបូង ពេលមានឱកាសថតរឿងជាមួយគ្នា ដោយពេលនោះ រឿន ណាត បានសួរទៅកាន់អ្នកដឹកនាំថានាងត្រូវសម្តែងជាមួយតួប្រុសរូបណា ពេលបានឃើញរូបតួប្រុសថាជា វេងហួរ ហើយក៏យល់ព្រម ខណៈនាងខកខានថតរឿង៤ ទៅ៥ឆ្នាំហើយនិងចង់សាកសម្តែងរឿងមានរសជាតិថ្មីដូចគ្នា។ 
ក្នុងថ្ងៃជួបគ្នាដើម្បីសមការសម្តែងដំបូង រឿន ណាត បានជម្រាបសួរ វេង ហួរ ហើយបុរសឯករូបនេះមានភាពរុសរាយយ៉ាងខ្លាំងដែលធ្វើឱ្យនាងចូលចិត្តតែម្តងជាមួយនឹងស្នាមញញឹមរបស់ វេង ហួរ ។ ក្រោយមកអ្នកទាំងពីរបានណាត់ជួបគ្នាក្នុងហាងកាហ្វេដើម្បីពិភាក្សាគ្នាពីតួអង្គការសម្តែងរបស់ខ្លួន ដែលត្រូវសម្តែងជាប្តីប្រពន្ធគ្នានៅក្នុងសាច់រឿង។ 
មែនទែនទៅអ្នកទាំងពីរបានបង្ហើបប្រាប់ថាមានអារម្មណ៍ល្អជាមួយគ្នាតាំងពីថ្ងៃជួបដំបូង ខណៈនៅថ្ងៃមួយ រឿន ណាត ផុសStory នៅហ្វេកប៊ុកថាស្គាល់រសជាតិជួបភ្លាមស្រលាញ់ភ្លាមហើយដែលធ្វើឱ្យ វេងហួរ ចាប់អារម្មណ៍ប៉ុន្តែមិនច្បាស់នោះទេគ្មានតែលួចសង្ស័យក្នុងចិត្តថាជាលោក ខណៈដែល វេងហួរ បានចុច react រូបបេះដូងទៅកាន់ រឿន ណាត និងបានអួតប្រាប់រឿងនេះទៅកាន់បងប្អូនថែមទៀត។
ចំណុចដែលធ្វើឱ្យមហាជនច្បាស់ពីទំនាក់ទំនងរបស់ពួកគេគឺនៅពេលមានវីដេអូក្នុងstory ណែនាំ រឿន ណាត ទៅកាន់បុរសឯកវៀតណាមថានាងជាមិត្តស្រី ខណៈអ្នកទាំងពីរទទួលបានការគាំទ្រយ៉ាងច្រើនពីអ្នកគាំទ្រ។ ស្របពេលជាមួយគ្នា ទាំងរឿន ណាត និង វេងហួរ សារភាពចំៗចេញពីមាត់នៅក្នុងកម្មវិធីតែម្តងថាអ្នកទាំងពីរជាគូស្នេហ៍ពិតប្រាកដមែន។
បន្ថែមពីលើនេះ Mister Friendship International 2023 បាននិយាយទៀតថា ចំណុចទាក់ទាញដែលធ្វើឱ្យកាន់តែមានចិត្តស្រលាញ់ រឿន ណាត នោះគឺអត្តចរិតយកម្ហូបមកពីផ្ទះចែកក្រុមការងារ ថែមទាំងប្រមូលចានយកទៅលាងទៀត សូម្បីក្រុមការងារក៏សរសើរចំណុចនេះដែលតួសម្តែងស្រីស្អាតមួយរូបឈរលាងចាន។ ចំណែកឯ រឿន ណាត វិញក៏បានបង្ហើបដែរថា ភាពគួរឱ្យស្រលាញ់របស់មិត្តប្រុសនាងគឺ អង្គុយចាំនាងធ្វើខ្លួនដោយគ្មានការរអ៊ូ៕
