អតីតកប៉ាល់ទេសចរណ៍អាល្លឺម៉ង់ បានប្រែក្លាយមុខមាត់ថ្មីទៅជាបណ្ណាល័យបណ្តែតទឹកដ៏ធំសម្បើមលើលោក ខណៈនឹងលេចវត្តមាននៅកំពង់ផែស្វយ័តភ្នំពេញ ប្រទេសកម្ពុជា រយៈពេល១ខែ។ នេះគឺជាព្រឹត្តិការណ៍ពិពណ៌សៀវភៅលើកប៉ាល់ដ៏កម្រនិងដំបូងគេនៅក្រុងភ្នំពេញ ហើយសាធារណៈជនទូទៅគឺអាចធ្វើការអញ្ជើញចូលរួមដោយសេរី មិនគិតថ្លៃសូម្បីតែមួយរៀល។
កាលពីថ្ងៃទី៣ ខែមិថុនា ឆ្នាំ២០២៤ យោងតាមការបង្ហោះនៅលើគេហទំព័រកំពង់ផែស្វយ័តភ្នំពេញបានភ្ជាប់មកជាមួយនឹងរូបថតប៉ុន្មានសន្លឹក អមជាមួយនឹងចំណងជើងថា«សូមអញ្ជើញមកទស្សនាពិព័រណ៍សៀវភៅអន្តរជាតិ នៅលើនាវា Doulos Hope ដោយឥតគិតថ្លៃ ដោយចាប់ផ្ដើមពីថ្ងៃទី៥ ខែមិថុនា ឆ្នាំ២០២៤ ខាងមុខ នៅចំណតផែពហុបំណង TS3 របស់កំពង់ផែស្វយ័តភ្នំពេញ ក្បែរគល់ស្ពានជ្រោយចង្វារ»។.jpg)
ចំពោះកាលបរិច្ឆេទនៃការពិពណ៌សៀវភៅនៅលើនាវានេះ គឺចាប់ពីចន្លោះថ្ងៃទី៥-១៦ ខែមិថុនា និងចន្លោះថ្ងៃទី២២ ខែមិថុនា ដល់ទី៤ ខែកក្កដា ឆ្នាំ២០២៤ ដោយបើកដំណើរការជារៀងរាល់វេលាម៉ោង ១២:៣០រសៀល ដល់ ៧:៣០ យប់ ពីថ្ងៃអង្គារដល់ថ្ងៃអាទិត្យ (ឈប់សម្រាកថ្ងៃច័ន្ទ)។
គួរបញ្ជាក់ថា អតីតកប៉ាល់ទេសចរណ៍ MV Doulos Hope របស់អង្គការសប្បុរសធម៌អាល្លឺម៉ង់ GBS Ships e.V. បានប្រើក្លាយទៅជាបណ្ណាល័យបណ្តែតទឹកដ៏ធំជាងគេលើលោក នៅក្នុងគោលបំណងផ្សព្វផ្សាយពីការអប់រំ វប្បធម៌ និងពិព័ណ៍សៀវភៅ ទៅកាន់សាធារណជន ១៥០ ប្រទេសទូទាំងសកលលោក។ យ៉ាងណាមិញ កាលពីពេលកន្លងទៅ កប៉ាល់អាល្លឺម៉ង់មួយនេះ ក៏ធ្លាប់បានចូលចតនៅកំពង់ផែស្វយ័តក្រុងព្រះសីហនុ ចំនួន៣លើករួចមកផងដែរ៕
