ប្រទេសចិន ៖ អ្នកមានគម្រោងធ្វើដំណើរទៅប្រទេសចិនត្រូវតែដឹងរឿងនេះ ព្រោះបើតាមការចេញផ្សាយរបស់សារព័ត៌មានបរទេស កាលពីថ្ងៃទី១១ ខែឧសភា ឆ្នាំ២០២៤ ឱ្យដឹងថា ប្រទេសចិនបានប្រកាសច្បាប់ថ្មី គឺសមត្ថកិច្ចចិនមានសិទ្ធិត្រួតពិនិត្យឆែកមើលទិន្នន័យ និងរូបភាពក្នុងទូរស័ព្ទដៃ និងឧបករណ៍អេឡិចត្រូនិកគ្រប់ប្រភេទរបស់ភ្ញៀវទេសចរបរទេស និងពលរដ្ឋចិន ។
ក្រសួងសន្តិសុខជាតិរបស់ចិនបានប្រកាសនាពេលថ្មីៗថា ច្បាប់ថ្មីនេះនឹងផ្តល់អំណាចដល់សមត្ថកិច្ចអនុវត្តច្បាប់យ៉ាងតឹងរ៉ឹងក្នុងការត្រួតពិនិត្យទូរស័ព្ទដៃ និងឧបករណ៍អេឡិចត្រូនិកគ្រប់ប្រភេទរបស់ភ្ញៀវទេសចរបរទេស និងពលរដ្ឋចិន ។ ការរឹតបន្តឹងនេះនឹងអាចទប់ស្កាត់រាល់ទង្វើបង្កអសន្តិសុខរបស់ភ្នាក់ងារស៊ើបការណ៍បរទេស និងពង្រឹងសន្តិសុខជាតិ ។
ច្បាប់ថ្មីនេះនឹងអនុវត្តចាប់ពីថ្ងៃទី១ ខែកក្កដា ឆ្នាំ២០២៤ តទៅ ចំពោះពលរដ្ឋចិនដែលធ្វើដំណើរត្រឡប់មកប្រទេសចិនវិញ និងភ្ញៀវទេសចរបរទេសទាំងអស់ធ្វើដំណើរមកចិន ដើម្បីការពារសន្តិសុខជាតិ និងជំរុញឱ្យពលរដ្ឋចិនជួយសង្កេតពីទង្វើណាមួយដែលអាចបង្កអសន្តិសុខជាតិ ។ ក្រៅពីនេះ ចិននឹងតាមដានពីសកម្មភាពរបស់ភ្នាក់ងារស៊ើបការណ៍បរទេស ដែលបានបន្លំខ្លួននៅគ្រប់ទីកន្លែងផងដែរ ។
សមត្ថកិច្ចចិននឹងបង្ហាញកាតសមត្ថកិច្ចទៅកាន់ភ្ញៀវទេសចរបរទេស និងពលរដ្ឋចិន ដើម្បីឆែកមើលប្រើប្រាស់ និងទិន្នន័យពាក់ព័ន្ធក្នុងឧបករណ៍អេឡិចត្រូនិក ដូចជា ៖ ការផ្ញើសារក្នុងទូរស័ព្ទដៃ, អ៊ីម៉ែល, ការជជែកជាក្រុម, រូបភាព, ការថតជាសំឡេង និងវីដេអូ ដើម្បីពិនិត្យមើលថា តើមានអំពើឧក្រិដ្ឋកម្ម ឬអំពើខុសច្បាប់ដែរឬទេ ។ ច្បាប់ថ្មីនេះចែងថា ៖ «ការប្រមូល និងទាញយកទិន្នន័យអេឡិចត្រូនិកត្រូវត្រួតពិនិត្យដោយអាជ្ញាធរចិន យ៉ាងហោចណាស់២នាក់» ។
បើតាមពលដ្ឋចិនម្នាក់ដែលទើបធ្វើដំណើរចាកចេញពីទីក្រុងស៊ិនជិនទៅហុងកុង បាននិយាយប្រាប់ Radio Free Asia ថា កាលពីដើមខែឧសភា ឆ្នាំ២០២៤ មន្ត្រីគយប្រចាំទីក្រុងស៊ិនជិន និងសៀងហៃ ចាប់ផ្តើមត្រួតពិនិត្យទិន្នន័យក្នុងទូរស័ព្ទដៃ និង Laptop របស់អ្នកដំណើរដែលចូលមកទីក្រុង ។
នារីជាអ្នកដំណើររូបនេះរៀបរាប់ថា ក្នុងអំឡុងពេលនាងធ្វើដំណើរឆ្លងកាត់កំពង់ផែហ្វូធៀន នាងបានឃើញមន្ត្រីគយ២នាក់ ឆែកមើលទិន្នន័យក្នុងទូរស័ព្ទដៃរបស់ភ្ញៀវទេសចរស្រីម្នាក់ឈរនៅក្រោយនាង ហើយមន្ត្រីគយសួរនារីនោះថា តើនាងមានទូរស័ព្ទដៃផ្សេងទៀតនៅជាប់ខ្លួនដែរឬទេ ៕
