Karina សមាជិកក្រុម Aespa និងតារាសម្តែង Lee Jae Wook ត្រូវបានរាយការណ៍ថាបានបែកបាក់គ្នា៥សប្តាហ៍បន្ទាប់ពីទំនាក់ទំនងរបស់ពួកគេត្រូវបានផ្សព្វផ្សាយជាសាធារណៈ។ តាមប្រភពពី Tenasia បានរាយការណ៍ថា មូលហេតុដែលពួកគេបែកគ្នាគឺដោយសារតែការឈឺចាប់ផ្លូវចិត្តដែលពួកគេទទួលបានពីមតិអាក្រក់តម្រង់មកលើពួកគេ ក៏ដូចជាមានអារម្មណ៍សោកស្តាយចំពោះអ្នកគាំទ្ររបស់ពួកគេ។
នៅថ្ងៃទី២ មេសា នេះដែរក្រុមហ៊ុនគ្រប់គ្រងរបស់ Lee Jae Wook C-JeS Entertainment បានបញ្ជាក់ថាពួកគេពិតជាបានបែកគ្នាពិតមែន។ ក្រុមហ៊ុននេះបានបញ្ជាក់ថា« តារាសម្តែង Lee Jae Wook បានសម្រេចចិត្តបញ្ចប់ទំនាក់ទំនងនេះ ដើម្បីផ្តោតលើការងារដែលលោកកំពុងថតនាពេលនេះ។ អ្នកទាំងពីរនឹងនៅតែជាមិត្តរួមការងារដ៏ល្អ និងគាំទ្រគ្នាទៅវិញទៅមក។ពួកគេនឹងស្វាគមន៍អ្នកគាំទ្ររបស់ពួកគេជាមួយនឹងសកម្មភាពល្អៗតាមផ្លូវរៀងៗខ្លួននាពេលអនាគត»។
គួរបញ្ជាក់ថានៅថ្ងៃទី២៧ ខែកុម្ភៈ Dispatch បានបង្ហាញថា Karina និង Lee Jae Wook មានទំនាក់ទំនងស្នេហា។ ស្របពេលដែលភាគីទាំងសងខាងបញ្ជាក់ពីព័ត៌មាននេះ អ្នកគាំទ្រមួយចំនួនមិនបានទទួលយកទំនាក់ទំនងល្អនោះទេ ដោយអ្នកគាំទ្រមួយចំនួនរបស់ Karina បានរៀបចំពហិការប្រឆាំងនឹងនាង ដែលនាំឱ្យ Karina សរសេរសំបុត្រសូមទោសទៅកាន់អ្នកគាំទ្ររបស់នាង។
តារាសម្តែង Lee Jae Wook និង Karina សមាជិកក្រុម Aespa មានភាពស្និទ្ធស្នាលគ្នានិងបានក្លាយទៅជាទំនាក់ទំនងស្នេហា បន្ទាប់ពីបានចូលរួមក្នុងកម្មវិធីបង្ហាញម៉ូតម៉ាកយីហោជាមួយគ្នានៅប្រទេសអ៊ីតាលី កាលពីថ្ងៃទី១៤ មករា ហើយទំនាក់ទំនងរបស់ពួកគេបានបន្តនៅក្នុងទីក្រុងសេអ៊ូល៕