ជារៀងរាល់ឆ្នាំពលរដ្ឋចិនតែងតែប្រារព្ធពិធីបុណ្យមួយ ដើម្បីដេញព្រលឹងបិសាច និងបួងសួងសុំសំណាងល្អ ដែលបុណ្យនេះគេហៅថា”បុណ្យចូលឆ្នាំចិន”។
នៅក្នុងពិធីបុណ្យនេះ ពលរដ្ឋចិនតែងតែធ្វើម្ហូបអាហារសែន និងសម្តែងការលោតមុងសាយជាដើម ដែលជាជំនឿរបស់ដូនតាប្រទេសចិនក្នុងការដេញកម្ចាត់ព្រាយបិសាច។
ជុំវិញការបណ្តេញព្រាយបិសាចនេះ ពលរដ្ឋចិនជំនាន់មុន ក៏ប្រើប្រាស់មធ្យោបាយមួយទៀត ដោយពួកគេនាំគ្នាប្រើដើមឫស្សីញាត់រំសេវ ហើយដុតវា ដើម្បីបង្កើតបានជាការផ្ទុះតូចមួយ ឬធំ តាមអ្វីដែលពួកគេដុតដើម្បីបណ្តេញព្រលឹងបិសាច។ លុះក្រោយមកការដុតនេះត្រូវបានគេហៅថា “ការដុតផាវ”។
ផាវ នីមួយៗត្រូវបានខ្ចប់ជាមួយក្រដាសពណ៌ក្រហមដែលពណ៌នេះមានន័យល្អចំពោះពិធីបុណ្យជាក់ស្តែងដូចជាពិធីបុណ្យចូលឆ្នាំចិនម្តងៗ ។ នៅពេលដែលដុតផាវមានលាន់ឮសំឡេងខ្លាំង ឬខ្សោយទៅតាមបរិមាណរំសេវនៅក្នុងក្រដាសក្រហមនោះ ។ ពេលរំសេវផ្ទុះចេញមកក្រៅមនុស្សប្រុស-ស្រីបន្ទរសំឡេងតាមក្រោយដើម្បីអបអរ សាទរ ហើយពួកគេមានជំនឿថាសំឡេងរបស់ផាវនឹងជួយបណ្តេញព្រាយបិសាច ឬព្រលឹងឧបទ្រពចង្រៃឱ្យអស់ ។
រហូតមកដល់ពេលបច្ចុប្បន្ននេះការដុតផាវបានក្លាយជាទំនៀមទម្លាប់មួយដ៏សំខាន់ ពោលគឺគេតែងមានការដុតផាវអំឡុងពេលចូលឆ្នាំចិនដែលខានមិនបានឡើយ៕