មិនខុសពីឆ្នាំមុនៗនោះទេ ឱ្យតែជិតដល់ថ្ងៃបុណ្យចូលឆ្នាំចិន-វៀតណាម គេតែងឃើញមានបងប្អូនប្រជាពលរដ្ឋខ្មែរជាច្រើន នាំគ្នាប្រមូលទិញផ្កាអង្គារសិល្ប៍ពីខេត្តឆ្ងាយៗ ជាពិសេសខេត្តពោធិ៍សាត់ ដែលជាតំបន់សម្បូរព្រៃភ្នំ យកមកលក់នៅទីក្រុងភ្នំពេញ។ពលរដ្ឋខ្មែរ ដែលជាប់សែស្រឡាយកូនចៅចិន ជាតែងតែទិញដើមអង្គារសិល្ប៍ដាក់សែន ឬតាំងលម្អគេហដ្ឋាន ដោយអ្នកខ្លះក៏បានដាក់អាំងប៉ាវនៅលើដើមនោះផងដែរ ដោយពួកគេមានជំនឿថា ដើមអង្គារសិល្ប៍ជួយលើករាសី ឬរកស៊ីមានបាន និងបញ្ចៀសរឿងរ៉ាវអាក្រក់ដែលអ្នកដទៃប៉ងមកលើយើង ឬក្រុមគ្រួសារឱ្យក្លាយជាលាភផងដែរ។ដោយសារតែការមានជំនឿរបែបនេះហើយ ទើបធ្វើឱ្យផ្កាអង្គារសិល្ប៍ ក្លាយជាផ្កាម៉្យាងដែលស្ទើរតែមិនអាចខ្វះបាន សម្រាប់ការដាក់តាំងលម្អរនៅក្នុងគេហដ្ឋាន ក៏ដូចជាកន្លែងមួយចំនួនទៀត ពីសំណាកជនជាតិចិន និងបងប្អូនខ្មែរកាត់សែស្រឡាយចិន។សូមបញ្ជាក់ថា ឆ្នាំនេះពិធីបុណ្យចូលឆ្នាំចិន-វៀតណាម នឹងប្រព្រឹត្តទៅនៅថ្ងៃទី៩ដល់១២ ខែកុម្ភៈ ខណៈពិធីសែនដកជើងធូបនឹងចាប់ផ្តើមនៅថ្ងៃទី៣ ខែកុម្ភៈ៕
Home ចំណេះដឹងទូទៅ