យោងតាមការស្រាវជ្រាវមួយលើកឡើងថា មិនថាវាជារឿងរ៉ាវផ្ទាល់ខ្លួន ឬព័ត៌មានសម្ងាត់យ៉ាងណាក្តី ហើយបើស្រីៗបានផឹកគ្រឿងស្រវឹងចូលក្នុងខ្លួនទៀតនោះ វានឹងកាន់តែធ្វើឱ្យពួកនាងនិយាយអាថ៌កំបាំងចេញមកក្រៅងាយជាងមុនទៅទៀត ។
ការស្រាវជ្រាវនេះធ្វើឡើងនៅប្រទេសអង់គ្លេស ដែលលើកឡើងពាក់ព័ន្ធនឹងប្រធានបទ «ការលាក់រឿងរ៉ាវអាថ៌កំបាំង» ។ នៅពេលដឹងរឿងអាថ៌កំបាំងអ្វីមួយ ស្រីៗភាគច្រើននឹងប្រាប់បន្តគ្នាក្នុងរយៈពេលត្រឹមតែ៤៧ម៉ោង និង១៥នាទីប៉ុណ្ណោះ (ឬរយៈពេលយូរបំផុត គឺមិនលើសពី២ថ្ងៃ) ។
ក្រុមការងារស្រាវជ្រាវបានប្រមូលទិន្នន័យដើម្បីសិក្សាលើបញ្ហានេះ តាមរយៈក្រុមនារីស្ម័គ្រចិត្តចំនួន៣.០០០នាក់ ដែលមានអាយុចាប់ពី១៨ឆ្នាំ ទៅ៦៥ឆ្នាំ ។ ពួកគេត្រូវឆ្លើយតបសំណួរផ្សេងៗ និងយកលទ្ធផលទៅវិភាគ ហើយការវិភាគលទ្ធផលរបស់ពួកគេបង្ហាញថា ៖
-អ្នកឆ្លើយសំណួរ៤០% ទទួលស្គាល់ថា ពួកនាងមិនអាចលាក់ទុកអាថ៌កំបាំងបានទេ មិនថាវាជារឿងផ្ទាល់ខ្លួន ឬព័ត៌មានសម្ងាត់យ៉ាងណាក្តី ។ លើសពីនេះ បើពួកនាងបានផឹកគ្រឿងស្រវឹងទៀតនោះ វានឹងធ្វើឱ្យពួកនាងនិយាយប្រាប់គេអស់ពីរឿងអាថ៌កំបាំង ។
-អ្នកឆ្លើយសំណួរជាង៥០% ទទួលស្គាល់ថា បើពួកនាងបានផឹកស្រាទំពាំងបាយជូរត្រឹមតែ១កែវ ឬ២កែវនោះ រឿងសម្ងាត់ខ្លាំងយ៉ាងណាក្តី ក៏ពួកនាងនឹងនិយាយចេញមកក្រៅទាំងអស់គ្មានសល់ ។ រីឯអ្នកបានដឹងរឿងសម្ងាត់ពីពួកនាងមុនគេ គឺម្តាយ, សង្សារ ឬមនុស្សជិតស្និទ្ធ ។
-អ្នកឆ្លើយសំណួរប្រមាណ២៥% ដែលពុំមានការចងចាំនោះ គឺពេលពួកនាងបានស្តាប់នូវរឿងអាថ៌កំបាំងត្រឹមតែ១ថ្ងៃ ក្រោយពីស្តាប់អ្នកណាម្នាក់រៀបរាប់រឿងអាថ៌កំបាំង គឺពួកគេតែងភ្លេចនៅពេលអ្នកនោះនិយាយចប់ ហើយពួកគេរង់ចាំស្តាប់រឿងអាថ៌កំបាំងពីអ្នកផ្សេងទៀត ។
ចំណែកការចែកចាយរឿងអាថ៌កំបាំងនោះ គឺពួកនាងអាចប្រាប់អាថ៌កំបាំងទៅអ្នកដទៃនៅគ្រប់ទីកន្លែង និងគ្រប់ពេលវេលា ដូចជា ៖ ការជជែកគ្នាក្នុងបណ្តាញសង្គម, ការទូរស័ព្ទប្រាប់ ឬការនិយាយប្រាប់គ្នាដោយផ្ទាល់ ៕
