ស៊ូណាមិ (Tsunami) ជាពាក្យកម្ចីរបស់ប្រទេសជប៉ុន ដែលត្រូវបានគេប្រើជាទូទៅ សម្រាប់សម្គាល់ថាជារលកយក្សធំសម្បើម។
ពាក្យ ស៊ូណាមិ (Tsunami) នេះមានប្រភពចេញមកពីភាសាជប៉ុនគឺ “Tsu” ដែលមានន័យថា “កំពង់ផែ” និង “Nami” ដែលមានន័យថា “រលក”។ ពាក្យនេះ ត្រូវបានគេប្រើប្រាស់ និងទូទៅស្គាល់ជាសកលនៅក្នុងឆ្នាំ១៨៩៦ ដោយកាលនោះ ស៊ូណាមិ (Tsunami) បោកបក់មកកាន់ប្រទេសជប៉ុន ធ្វើឱ្យប្រទេសនេះធ្លាក់ចូលក្នុងវិបត្តិសេដ្ឋកិច្ចនាសម័យនោះ។
ដោយឡែក ចំពោះមូលហេតុដែលធ្វើឱ្យជប៉ុនងាយទទួលឥទ្ធិពលរលកយក្សស៊ូណាមិនេះ ក៏ដោយសារជប៉ុនជាប្រទេសដែនកោះ ស្ថិតនៅចំខ្សែអ័ក្សភ្នំភ្លើង និងនៅចំបន្ទាត់នៃតំបន់ងាយរងគ្រោះរញ្ជួយដី តាមបណ្តោយមហាសមុទ្រប៉ាសុីហ្វិក។
ជាទូទៅ រលកយក្សស៊ូណមិ កើតឡើងបានលុះត្រាតែមានការរញ្ជួយដីពីក្រោមបាតសមុទ្រនៅក្នុងកម្លាំង៧.៥រុិចទ័រ ឬក៏អាចឈានទៅដល់៨រុិចទ័រ។
សូមបញ្ជាក់ថា ជប៉ុន ធ្លាប់ជួបគ្រោះមហន្តរាយរលកយក្សស៊ូណាមិដល់ទៅ១៤៣លើក បើរាប់ចាប់តាំងពីឆ្នាំ៦៨៤៕
