ហាមទទួលទានម្ហូបអាហារទាំងនេះក្រោយពេលវះកាត់រួច

យើងគ្រប់គ្នាតែងព្រួយបារម្ភរឿងម្ហូបអាហារដែលត្រូវបរិភោគក្រោយការវះកាត់រួចថា តើគួរចៀសវាងអាហារប្រភេទណាខ្លះ? ពីព្រោះអាហារមួយចំនួន នៅពេលយើងបរិភោគវារួចហើយអាចបណ្តាលឱ្យហូរឈាមកាន់តែច្រើន ឬស្នាមវះកាត់ជាសះស្បើយយឺត ។ ខាងក្រោមនេះ គឺជាអាហារមួយចំនួនដែលយើងពុំគួរបរិភោគក្រោយពេលវះកាត់រួច ដើម្បីការពារកុំឱ្យឈាមហូរច្រើនពេក ។

១-អាហារជ្រក់ ឬត្រាំ ៖
ក្រោយការវះកាត់រួច អ្នកពុំគួរបរិភោគអាហារជ្រក់ ឬត្រាំទេ ពីព្រោះវាជាអាហារពុំសូវមានអនាម័យ ។ នៅពេលបរិភោគអាហារប្រភេទនេះរួច វានឹងបណ្តាលឱ្យប៉ះពាល់ដល់ស្នាមដំបៅដែលកើតឡើងដោយសារការវះកាត់ ។

២-អាហារមានរសជាតិដិតខ្លាំង ៖
ការបរិភោគអាហារមានរសជាតិដិតខ្លាំង ដូចជា ៖ រសជាតិប្រៃខ្លាំង ឬផ្អែមខ្លាំង ដែលវាមានបរិមាណសូដ្យូម និងស្ករខ្ពស់ គឺអាចបណ្តាលឱ្យឈាមរបស់យើងខាប់ជាងធម្មតា ។ ហេតុនេះ វាបណ្តាលឱ្យសម្ពាធឈាមឡើងខ្ពស់ ហើយរារាំងសារធាតុចិញ្ចឹមផងដែរ ។ អាហារមានរសជាតិដិតខ្លាំងនឹងធ្វើឱ្យមុខរបួសរបស់យើងមិនងាយជាសះស្បើយទេ ។

៣-អាហារខ្លាញ់ ឬអាហារចៀន ៖
គឺជាប្រភេទអាហារចម្អិនឡើងដោយសារខ្លាញ់ ហើយវាជាមូលហេតុបណ្តាលឱ្យឈាមកក ។ ហេតុនេះ វាបណ្តាលឱ្យឈាមហូរមិនល្អ និងបំផ្លាញសារធាតុប្រឆាំងអុកស៊ីតកម្ម ។ ចុងក្រោយ បណ្តាលឱ្យមុខរបួសវះកាត់រលាក និងមិនងាយជា ។

៤-គ្រឿងស្រវឹង ៖
អ្នកទើបតែវះកាត់រួច គួរតែផ្អាកផឹកគ្រឿងស្រវឹងរយៈពេល១ខែ ដោយសារការផឹកគ្រឿងស្រវឹង ក៏អាចបណ្តាលឱ្យមុខរបួសក្រជាដែរ ហើយវានឹងរលាកមុខរបួស ។ ការផឹកស្រវឹងខ្លាំងរហូតដល់រាងកាយមិនបានសម្រាក វានឹងមានផលប៉ះពាល់ដល់មុខរបួសដូចគ្នា ។

៥-អាហារសមុទ្រ ៖
ការបរិភោគអាហារសមុទ្រអាចបណ្តាលឱ្យអ្នកជំងឺកើតកន្ទួល, រមាស់នៅលើខ្លួនប្រាណ រួមទាំងបរិវេណមុខរបួសផងដែរ ។ ហេតុនេះ វានឹងផ្តល់លទ្ធផលមិនល្អដល់មុខរបួសដោយសារការវះកាត់ ៕