អាចនិយាយបានថាគូព្រេងគឺមិនព្រាត់ទោះបីជាបែកគ្នាយូរយ៉ាងណាវាលវដ្តសង្សារនៅតែតម្រូវឱ្យមកជួបគ្នាវិញដដែល។ ជាក់ស្តែងដូចជា តារាសម្តែង-ពិធីការិនី ហ៊ិន ចាន់នីរ័ត្ន និងអនាគតស្វាមីជាដើម មុននឹងវិលមកជួបគ្នាហើយត្រៀមរៀបការឆាប់ៗនេះអ្នកទាំងពីរធ្លាប់បែកគ្នារហូតដល់ទៅ៨ឆ្នាំឯណោះថែមទាំងមិនដែលជួបមុខគ្នាទាល់តែសោះ។
នៅក្នុងការចាក់ផ្សាយកម្មវិធី 3Fun កាលពីយប់ថ្ងៃសុក្រ ទី១៥ ធ្នូ កញ្ញា ហ៊ិន ចាន់នីរ័ត្ន រួមទាំងពិធីករ ពិធីការិនីល្បីៗប្រចាំស្ថានីយ៍ទូរទស្សន៍បាយ័ន បានចូលរួមផ្តល់បទសម្ភាសក្នុងកម្មវិធីនេះពោរពេញដោយភាពសប្បាយរីករាយនិងផ្តល់សំណើចជូនអ្នកទស្សនារួមជាមួយការ Surprise ទៅកាន់កញ្ញា ហ៊ិន ច័ន្ទនីរ័ត្ន ដែលនឹងជិតក្លាយជាកូនក្រមុំឆាប់ៗនេះរហូតនាងរំភើបចិត្តដល់រលីងរលោងទឹកភ្នែក។
បន្ថែមពីការភ្ញាក់ផ្អើលត្រូវមិត្តៗពញាក់មួយតង់ ស្រាប់តែលោក ឌី ពេជ្រ អនាគតស្វាមីកញ្ញា ហ៊ិន ច័ន្ទនីរ័ត្ន ក៏បានកាន់បាច់ផ្កាកូលាបពណ៌ក្រហមមួយបាច់ចូលមក Surprise អនាគតភរិយានៅក្នុងកម្មវិធីផងដែរធ្វើឱ្យតារាស្រីរូបនេះកាន់តែរំភើបចិត្តថែមទៀត។
ឆ្លៀតក្នុងឱកាសនេះពិធីការិនីល្បីឈ្មោះ ហ៊ិន ច័ន្ទនីរ័ត្ន ក៏បានទម្លាយប្រាប់អ្នកគាំទ្រដែរថានាងនិងលោក ឌី ពេជ្រ ស្គាល់គ្នា១១ឆ្នាំមកហើយ មិនមែនទើបតែស្គាល់គ្នាហើយចូលរោងការនោះទេ។ លោក ឌី ពេជ្រ បាននិយាយថាអ្នកទាំងពីរបានជួបគ្នាកាលពីពាក់កណ្តាលឆ្នាំ២០១២ ដែលកាលនោះលោកមកលេងស្រុកខ្មែរពេលទៅរៀននៅអាម៉េរិក ហើយនីរ័ត្នបានរង់ចាំលោកដល់ឆ្នាំ២០១៣ ពេលលោករៀនចប់ហើយមករស់នៅស្រុកខ្មែរវិញ។
លោកបន្តថា អ្នកទាំងពីររស់នៅជាមួយគ្នាបាន៣ឆ្នាំ រួចហើយក៏បែកគ្នា៨ឆ្នាំដែលមិនដែលជួបមុខទាល់តែសោះ ។ មានពេលមួយមិត្តភក្តិពីអាម៉េរិករបស់លោកមកលេង ហើយបានណាត់គ្នារួចក៏បាននិយាយថា លោកក៏នៅលីវ ហើយ នីរ័ត្ន ក៏លីវ ដូចគ្នា ទើបលោកគិតពិចារណានិងសម្រេចចាប់ផ្តើមមានទំនាក់ទំនងឡើងវិញ ដោយបានដើរលេងជាមួយគ្នាដូចជាទៅក្រៅប្រទេសជាដើម។
ថ្លែងដោយអារម្មណ៍រំភើបលាយជាមួយទឹកភ្នែក ហ៊ិន ច័ន្ទនីរ័ត្ន បាននិយាយថាខ្លួនសប្បាយចិត្តដែលបានជួបមនុស្សដែលខ្លួនស្រលាញ់អស់រយៈពេលមកជាយូរហើយអាចចាប់ដៃគ្នាចូលរោងការ។ ពិធិការិនីរូបនេះ បន្ថែមទៀតថាមូលហេតុដែលសម្រេចចិត្តជ្រើសរើសលោក ឌី ពេជ្រ រៀបការព្រោះលោកជាមនុស្សស្លូតបូត យល់ពីនាងនិងក្រុមគ្រួសារច្រើន យកចិត្តទុកដាក់មិនត្រឹមតែនាងតែគ្រួសារទាំងមូល ខណៈអ្នកទាំងពីរក៏ស្រលាញ់គ្នាដោយស្មោះទៅវិញទៅមកដូចគ្នា។
គួរបញ្ជាក់ថា លោក ឌី ពេជ្រ និងកញ្ញា ហ៊ិន ច័ន្ទនីរ័ត្ន បានភ្ជាប់ពាក្យជាមួយគ្នាកាលពីថ្ងៃទី២៧ តុលា ឆ្នាំ២០២៣ និងចូលរោងជ័យនៅថ្ងៃទី២២ ខែធ្នូ ខាងមុខនេះ៕
