បងប្អូនប្រជាពលរដ្ឋមួយចំនួនមានភាពងឺឆ្ងល់ជាខ្លាំង ចំពោះការមិនឱ្យប្រើប្រាស់អត្តសញ្ញាណបណ្ណមួយសន្លឹកឱ្យបានមួយជីវិត ដោយពលរដ្ឋខ្លះបានលើកឡើងថា ពួកគាត់ត្រូវចំណាយប្រាក់ច្រើន ត្រូវប្រើមន្រ្តីច្រើនដង និងពេលខ្លះគាត់ចាត់ទុកថាជាការខាតពេលវេលាផងដែរ។
ជាមួយនឹងចម្ងល់របស់បងប្អូនប្រជាពលរដ្ឋនេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ក៏បានចេញមុខពន្យល់ជូនពលរដ្ឋដែរ។
សម្ដេចក្រឡាហោម ស ខេង បានមានប្រសាន៍ថាមូលហេតុដែលកំណត់សុពលភាពអត្តសញ្ញាណបណ្ណ និងតម្រូវឱ្យពលរដ្ឋត្រូវទៅបន្តសុពលភាពអត្តសញ្ញាណបណ្ណថ្មី ឬធ្វើអត្តសញ្ញាណបណ្ណទុតិយាតា គឺដោយសារក្នុងរយៈពេល១០ឆ្នាំ មនុស្សម្នាក់ៗតែងតែមានការប្រែប្រួលតាមដំណើរធម្មជាតិ ក្នុងនោះរួមមានរូបថត និងខ្ចៅដៃ។
សម្ដេចក្រឡាហោមបញ្ជាក់ថា”យើងធ្វើថ្មីនេះ គឺដោយសារផ្លាស់ប្ដូរនូវឯកសារអត្តសញ្ញាណពីរយ៉ាង ទីមួយគឺរូបថត ដោយសារ១០ឆ្នាំ អត្តសញ្ញាណបណ្ណផុតសុពលភាពហើយ។ អ៊ីចឹង១០ឆ្នាំមនុស្សមានការប្រែប្រួល រូបថតពីមុនផ្សឹង ឥលូវវាផ្សេង! អ៊ីចឹងត្រូវតែដូរ។ ទីពីរខ្ចៅដៃរបស់យើងក៏វាប្រែប្រួលដែរ! សូម្បីតែយើងចុចទូរសព្ទរាល់ថ្ងៃនេះក៏អាចនាំឱ្យប៉ះពាល់ខ្ចៅដៃដែរ។ អ៊ីចឹងហេតុផលគឺមានតែពីរហ្នឹងទេ ហើយពលរដ្ឋគាត់ត្រូវមកបំពេញដើម្បីធ្វើអត្តសញ្ញាណបណ្ណថ្មី”។
អត្តសញ្ញាណប័ណ្ណគឺជាបណ្ណដែលប្រជាពលរដ្ឋខ្មែរគ្រប់គ្នាចាំបាច់ត្រូវតែមាន។ នៅក្នុងអត្តសញ្ញាណប័ណ្ណសញ្ជាតិខ្មែរមានបង្ហាញព័ត៌មានដូចជា ឈ្មោះ ភេទ ថ្ងៃខែឆ្នាំកំណើត ទីកន្លែងកំណើត អាសយដ្ឋាន ភិនភាគរបស់បុគ្គលសាមី។ ប្រជាពលរដ្ឋខ្មែរទាំង២ភេទមានអាយុ១៥ឆ្នាំឡើងទៅ មានសិទ្ធិទទួលបានអត្តសញ្ញាណប័ណ្ណសញ្ជាតិខ្មែរ។ ប្រជាពលរដ្ឋត្រូវទៅធ្វើអត្តសញ្ញាណប័ណ្ណសញ្ជាតិខ្មែរតាមការជូនដំណឹងរបស់អាជ្ញាធរមានសមត្ថកិច្ច៕